Рынчын адӕймагмӕ кӕсгӕйӕ дӕр уӕ циндзинад ма ӕрмынӕг уӕд

1, 2. Рынчын адӕймагмӕ чи кӕсы, уыдонмӕ Йегъовӕ цы зӕрдӕ дары? (Ӕмбисӕндтӕ 19:17). (Кӕс нывтӕм дӕр.)

«МӔ ЦАРДӔМБАЛИМӔ иумӕ стӕм 32 азӕй фылдӕр,– зӕгъы, Хуссар Корейы чи цӕры, иу ахӕм ӕфсымӕр, Чин Ёль.– Фӕлӕ ныр фондз азы дӕргъы кӕсинаг у. Паркинсоны низӕй рынчын у, ӕмӕ тыххӕйты цӕуы. Бирӕ йӕ уарзын ӕмӕ йын мӕ бон ӕххуыс кӕнын кӕй у, уый мын ӕхсызгон у. Ӕхсӕв фӕфынӕй кӕны медицинон сынтӕгыл, мӕ сынтӕг та ис йӕ фарсмӕ. Ӕмӕ, цалынмӕ нӕ бафынӕй вӕййӕм, уӕдмӕ кӕрӕдзийы къухтыл фӕхӕцӕм».

² Чи зоны, дӕуӕн дӕр, кӕсинаг чи у, ахӕм исчи ис, зӕгъӕм, дӕ фыд кӕнӕ дӕ мад, дӕ цардӕмбал, дӕ сывӕллон кӕнӕ де ’мбал. Кӕй зӕгъын ӕй хъӕуы, уыцы адӕймагӕн ӕххуыс кӕнын дын ӕхсызгон у, уымӕн ӕмӕ йӕ бирӕ уарзыс. Фӕлӕ ма уый аразыс, Йегъовӕйыл иузӕрдион кӕй дӕ, уый тыххӕй дӕр (1 Тим. 5:4, 8; Иак. 1:27). Фӕлӕ искӕмӕ кӕсын алкӕд ӕнцон нӕ вӕййы. Ӕвӕццӕгӕн дӕм хатт афтӕ фӕкӕсы, ӕмӕ дын куыд зын у, уый дӕхи йеддӕмӕ ничи ӕмбары. Чи зоны, иннӕты раз худгӕ фӕкӕныс, фӕлӕ, иунӕгӕй куы вӕййыс, уӕд та дӕхи дӕ цӕссыгӕй фехсыс (Пс. 6:6). Дӕ зӕрдӕйы цытӕ цӕуы, уый иннӕтӕ куы нӕ зоной, уӕддӕр ӕй Йегъовӕ хорз зоны. (Абар Рацыд 3:7.) Уый дын уыны дӕ цӕссыгтӕ ӕмӕ, дӕхи цӕмӕйты цух кӕныс, уый, ӕмӕ дӕ бирӕ уарзы (Пс. 56:8; 126:5). Кӕд рынчын адӕймагмӕ кӕсыс, уӕд, зӕгъӕн ис, ӕфстау дӕттыс Йегъовӕйӕн, ӕмӕ дын уый дӕ хорздзинад ӕнӕмӕнгӕй бафиддзӕнa. (Бакӕс Ӕмбисӕндтӕ 19:17.)

3. Авраам ӕмӕ Саррӕйӕн зын цӕмӕн уыдаид Фаррӕмӕ кӕсын?

³ Библийы ис, йӕ хиуӕттӕй чидӕр кӕсинаг кӕмӕн уыд, бирӕ ахӕм адӕмы кой. Зӕгъӕм, Авраам ӕмӕ Саррӕ. Урӕй куы рацыдысты, уӕд семӕ рацыд сӕ фыд Фаррӕ дӕр, цыди йыл 200 азы бӕрц. Харранмӕ сӕ цӕуын хъуыди иу-960 километры (Райд. 11:31, 32). Цӕугӕ та, ӕвӕццӕгӕн, кодтой теуатыл ӕмӕ хӕрджытыл. Уыцы фӕндаг сфӕразын ацӕргӕ Фаррӕйӕн ӕнцон кӕцӕй уыдаид. Уӕдӕ Авраам ӕмӕ Саррӕйӕн дӕр уыцы дард фӕндагыл Фаррӕмӕ кӕсын зын куыннӕ уыдаид. Кӕй зӕгъын ӕй хъӕуы, Авраам ӕмӕ Саррӕ уарзтой Фаррӕйы, фӕлӕ-иу хатт, ӕвӕццӕгӕн, тынг бафӕлладысты. Чи зоны-иу сӕм тыхы мур дӕр нал баззад. Фӕлӕ куыдфӕнды ма уыдаид,– Йегъовӕ сын тыхтӕ лӕвӕрдта. Ӕмӕ дӕуӕн дӕр дӕтдзӕн тыхтӕ (Пс. 55:22).

4. Ацы статьяйы цӕуыл аныхас кӕндзыстӕм?

⁴ Кӕд дӕ бинонтӕй кӕнӕ де ’мбӕлттӕй чидӕр кӕсинаг у, уӕд дын уыцы адӕймагмӕ кӕсын ӕнцондӕр уыдзӕн, дӕ зӕрдӕйы циндзинад куы уа, уӕд (Ӕмб. 15:13). Фӕлӕ цымӕ уый гӕнӕн ис, цӕмӕй-иу зын уавӕрты дӕр дӕ циндзинад ма ’рмынӕг уа? Ис! (Иак. 1:2, 3). Уымӕн дын цы баххуыс кӕндзӕн? Йегъовӕйӕ ӕххуыс кур, цӕмӕй дӕ уавӕры дӕ бон цин кӕнын уа. Ацы статьяйы ӕркӕсдзыстӕм, рынчынмӕ чи кӕсы, уыдонӕн ма ноджыдӕр сӕ бон цы у аразын, цӕмӕй сӕ циндзинад ма ӕрмынӕг уа. Стӕй ма аныхас кӕндзыстӕм, иннӕтӕн сын сӕ бон куыд у ӕххуыс кӕнын, ууыл. Фӕлӕ уал фыццаг базондзыстӕм, ахсджиаг цӕмӕн у, цӕмӕй сӕ циндзинад ӕрмынӕг кӕнын ма бауадзой ӕмӕ фендзыстӕм, сӕ циндзинад цӕй тыххӕй ӕрмынӕг вӕййы.

СӔ ЦИНДЗИНАД ЦӔЙ ТЫХХӔЙ ӔРМЫНӔГ ВӔЙЙЫ?

5. Ахсджиаг цӕмӕн у, цӕмӕй рынчынмӕ кӕсӕг йӕ циндзинад мынӕг кӕнын ма уадза?

⁵ Рынчын адӕймагмӕ чи фӕкӕсы, уыдонӕн сӕ циндзинад куы ’рмынӕг вӕййы, уӕд сӕм фаг тыхтӕ нал вӕййы, ӕмӕ уайтагъд афӕллайынц (Ӕмб. 24:10). Ӕмӕ фӕлладӕй та сӕ бон нал вӕййы рынчынӕн, куыд сӕ фӕнды, афтӕ ӕххуыс кӕнын. Фӕлӕ цымӕ сӕ циндзинад цӕй тыххӕй ӕрмынӕг вӕййы?

6. Искӕмӕ чи кӕсы, уыдон тынг цӕмӕн бафӕллайынц?

⁶ Адӕймаг, гӕнӕн ис, афтӕ бафӕллайа, ӕмӕ йӕм тыхы мур мауал уа. Хо Ли́йӕ радзырдта: «Алцыдӕр хорз куы вӕййы, уӕд дӕр арӕх изӕрмӕ афтӕ бафӕллайын, ӕмӕ мӕ бон ницыуал вӕййы. Хатт мӕм сообщенийӕн дзуапп раттынӕн дӕр тых нал вӕййы». Кӕмӕндӕрты та нӕ фӕуайы фаг фынӕй кӕнын кӕнӕ улӕфын. Хо Ине́с загъта: «Фаг фынӕй цы у, уый зонгӕ дӕр нал кӕнын. Арӕх ӕхсӕвы ме ’фсинмӕ сыстын дыууӕ сахатӕй дыууӕ сахатмӕ. Мӕ сӕрыхицауимӕ ныр цалдӕр азы нӕ бон нӕу искуыдӕм баулӕфынмӕ ацӕуын». Иуӕй-иутӕ та, уазӕгуаты сӕ куы фӕхонынц кӕнӕ сын Хуыцауы хъуыддаджы исты бахӕс кӕнинаг куы вӕййынц, уӕд не сразы вӕййынц, уымӕн ӕмӕ сӕ рынчыны иунӕгӕй ныууадзӕн нӕ вӕййы. Уымӕ гӕсгӕ сӕхимӕ иунӕг фӕкӕсынц ӕмӕ фӕмаст кӕнынц, ахӕм уавӕры кӕй сты, ууыл.

7. Иуӕй-иутӕ сӕхи цӕмӕн фӕхӕрынц кӕнӕ цӕуыл фӕмаст кӕнынц?

⁷ Адӕймаг, гӕнӕн ис, йӕхи хӕра кӕнӕ маст кӕна. Иуӕй-иутӕ фӕмӕт кӕнынц, зӕгъгӕ, кӕсинаг мын чи у, уымӕн фаг не ’ххуыс кӕнын. Иу хо, Джессикӕ, загъта: «Арӕх мӕм афтӕ фӕкӕсы, ӕмӕ мӕ фыдмӕ, куыд ӕмбӕлы, афтӕ нӕ кӕсын. Ӕмӕ иу гыццыл дӕр мӕ фӕллад куы фӕуадзын, уӕд цыма ӕрмӕстдӕр мӕхи мӕт фӕкӕнын, афтӕ мӕм фӕкӕсы». Кӕмӕдӕрты та афтӕ фӕкӕсы, ӕмӕ сӕ рынчынмӕ кӕсын сӕ бон нал у. Ӕмӕ фырфӕлладӕй, гӕнӕн ис, ӕнӕрхъуыдыйӕ исты зӕгъой кӕнӕ саразой. Ӕмӕ уыдӕтты тыххӕй сӕхи фӕхӕрынц (Иак. 3:2). Иуӕй-иутӕ та тынг фӕмаст кӕнынц, хъаруджын ӕмӕ ӕнӕниз адӕймагӕй кӕй зыдтой, уый ныр цы уавӕры ис, уымӕ кӕсгӕйӕ. Хо Ба́рбарӕ зӕгъы: «Ме ’мбалӕн йе ’нӕниздзинад бонӕй-бонмӕ ӕвзӕрдӕр кӕны, ӕмӕ йыл мӕ зӕрдӕ тынг риссы».

8. Цалдӕр бузныджы ныхасӕн дӕр стыр тых кӕй ис, уымӕн цӕвиттон ӕрхӕсс.

⁸ Адӕймагмӕ, гӕнӕн ис, афтӕ кӕса, ӕмӕ йын иннӕтӕ йӕ фыдӕбонӕн нӕ аргъ кӕнынц. Цӕмӕн? Уымӕн ӕмӕ сын бузныг арӕх нӕ фӕзӕгъынц кӕнӕ сӕ арӕх нӕ раппӕлынц, цы аразынц, уый тыххӕй. Цалдӕр бузныджы ныхасӕн дӕр стыр тых ис (1 Фес. 5:18). Хо Мели́ссӕ радзырдта: «Хатт ахӕм фӕллад ӕмӕ ныфссаст вӕййын, ӕмӕ мӕхи кӕуынӕй амарын. Фӕлӕ, кӕмӕ кӕсын, уыдон мын, цы аразын, уый тыххӕй бузныг куы фӕзӕгъынц, уӕд мыл базыртӕ базайы. Ногӕй та мӕм тыхтӕ фӕзыны, ӕмӕ сӕм дарддӕр мӕ бон кӕсын вӕййы». Ӕфсымӕр Ама́дуйӕн йӕ усы хойы чызг рынчын у эпилепсийӕ. Чызг семӕ цӕры, ӕмӕ йӕм дыууӕйӕ кӕсынц. Амаду дзуры: «Цас тыхтӕ нӕ хъӕуы, уый, чи зоны, кӕронмӕ не ’мбары. Фӕлӕ нын бузныг куы фӕзӕгъы кӕнӕ нын гӕххӕттыл куы афыссы, бирӕ уӕ уарзын, зӕгъгӕ, уӕд мӕ зӕрдӕ цинӕй байдзаг вӕййы».

ЦЫ АРАЗЫН ДӔ ХЪӔУЫ, ЦӔМӔЙ ДӔ ЦИНДЗИНАД МА ӔРМЫНӔГ УА?

9. Рынчынмӕ кӕсӕг бонзонгӕ кӕй у, уый цӕмӕй уыдзӕн бӕрӕг?

⁹ У бонзонгӕ (Ӕмб. 11:2). Алкӕд нын фаг рӕстӕг кӕнӕ нӕм фаг тыхтӕ нӕ вӕййы, цы нӕ фӕфӕнды, уый саразынӕн. Уымӕ гӕсгӕ ахъуыды кӕн, дӕ бон цы у ӕмӕ цы нӕу, ууыл. Ӕмӕ дӕ зӕрдыл дар, хатт «нӕ» зӕгъын дӕр кӕй фӕхъӕуы. Уый дзурӕг у бонзонгӕдзинадыл. Иннӕтӕ дын ӕххуыс кӕнынмӕ куы хъавой, уӕд-иу сразы у. Ӕфсымӕр Джей загъта: «Адӕймаг иу бонмӕ алцӕуыл нӕ аххӕссы. Нӕ бон цас у, уымӕй фылдӕр саразыныл-иу куы нӕ архайӕм, уӕд нӕ циндзинад не ’рмынӕг уыдзӕн».

10. Рынчынмӕ кӕсӕг арфуынӕг цӕмӕн хъуамӕ уа? (Ӕмбисӕндтӕ 17:27).

¹⁰ У арфуынӕг. (Бакӕс Ӕмбисӕндтӕ 17:27.) Арфуынӕг куы уай, уӕд-иу не смӕсты уыдзынӕ, кӕмӕ кӕсыс, уый ӕнӕрхъуыдыйӕ исты куы зӕгъа кӕнӕ куы сараза, уӕд. Арфуынӕг адӕймаг фӕархайы, цӕмӕй бамбара, рынчын йӕхи афтӕ цӕмӕн дары, уый. Иуӕй-иу низтӕ адӕймагыл афтӕ фӕзынынц, ӕмӕ, раздӕр цы нӕ загътаид кӕнӕ сарӕзтаид, ахӕм исты фӕзӕгъы кӕнӕ саразы (Еккл. 7:7). Зӕгъӕм, фӕлмӕн ӕмӕ ӕмбаргӕ адӕймаг, гӕнӕн ис, суа загъдгӕнаг, хъуырхъуыргӕнаг, мӕстыгӕр кӕнӕ домаг. Кӕд уӕззау низӕй рынчын адӕймагмӕ кӕсыс, уӕд хорз уаид, йӕ низы тыххӕй йын фылдӕр куы базонис. Уый дын баххуыс кӕндзӕн, цӕмӕй ӕмбарай, йӕхи афтӕ йӕ низы тыххӕй кӕй дары (Ӕмб. 14:29).

11. Цавӕр ахсджиаг хъуыддӕгтӕн-иу хъуамӕ ссарай рӕстӕг? (Псалом 132:4, 5).

¹¹ Рӕстӕг-иу ссар, цӕмӕй Йегъовӕимӕ ӕнгомдӕр кӕнай. Хатт иуӕй-иу хъуыддӕгты бӕсты фӕхъӕуы, ахсджиагдӕр чи сты, уыцы хъуыддӕгтӕ саразын (Фил. 1:10). Ӕмӕ уыцы хъуыддӕгтӕй иу у, Йегъовӕимӕ нын цы хӕлардзинад ис, уый фидар кӕнын. Кӕд паддзах Давид ӕнӕвдӕлон адӕймаг уыд, уӕддӕр ын царды фыццаг бынаты уыди Йегъовӕйӕн лӕггад кӕнын. (Бакӕс Псалом 132:4, 5.) Ӕмӕ нын уымӕй у фӕзминаг. Алы бон дӕр-иу рӕстӕг ссар Библи кӕсынӕн ӕмӕ кувынӕн, кӕд тынг ӕнӕвдӕлон дӕ, уӕддӕр. Хо Эли́шӕ загъта: «Йегъовӕмӕ куы фӕкувын, псаломтӕ куы фӕкӕсын ӕмӕ дзы цы зӕрдӕфидаргӕнӕн ныхӕстӕ ис, уыдоныл куы фӕхъуыды кӕнын, уӕд мӕ зӕрдӕйы вӕййы циндзинад ӕмӕ фарн».

12. Де ’нӕниздзинадмӕ дӕ хъус цӕмӕн хъуамӕ дарай?

¹² Де ’нӕниздзинадмӕ дӕ хъус дар. Чи зоны дын рӕстӕг нӕй пайда продукттӕ ӕлхӕнынӕн ӕмӕ пайда хӕринӕгтӕ кӕнынӕн. Пайда хӕринӕгтӕ ӕмӕ упражненитӕ хуыздӕрырдӕм фӕзынынц адӕймаджы ӕнӕниздзинадыл, стӕй хъӕлдзӕгдӕр вӕййы ӕмӕ йын ӕнцондӕр вӕййы зындзинӕдтӕн быхсын. Уӕдӕ кӕд тынг ӕнӕвдӕлон дӕ, уӕддӕр архай, цӕмӕй пайда хӕринӕгтӕ хӕрай ӕмӕ ӕдзухдӕр упражненитӕ кӕнай (Еф. 5:15, 16). Стӕй архай, цӕмӕй фаг фынӕй кӕнай (Еккл. 4:6). Ахуыргӕндтӕ куыд зӕгъынц, афтӕмӕй, фынӕй куы фӕкӕнӕм, уӕд нӕ сӕрымагъз йӕхи асыгъдӕг кӕны. Иу медицинон статьяйы фыст уыд, зӕгъгӕ, адӕймаг фаг куы фынӕй кӕна, уӕд къаддӕр мӕт кӕндзӕн ӕмӕ-иу зын уавӕры бахаугӕйӕ нӕ фӕтыхсдзӕн. Уымӕй уӕлдай, адӕймаджы хъӕуы улӕфын дӕр (Еккл. 8:15). Иу хо мӕнӕ цы загъта, йӕ зӕрдӕйы циндзинад цӕй фӕрцы ис, уый тыххӕй: «Хорз бон куы вӕййы, уӕд ӕддӕмӕ рацӕуын ӕмӕ хурыл фӕцин кӕнын. Стӕй мӕ хъуыддӕгтӕ афтӕ спълан кӕнын, цӕмӕй-иу ме ’мбӕлттӕй искӕимӕ мӕйы мидӕг иу бон уӕддӕр арвитон».

13. Ахудын хорз цӕмӕн у? (Ӕмбисӕндтӕ 17:22).

¹³ Ахудын дӕр зон. (Бакӕс Ӕмбисӕндтӕ 17:22; Еккл. 3:1, 4.) Адӕймаг куы фӕхуды, уӕд уый дӕр хуыздӕрырдӕм фӕзыны йе ’нӕниздзинадыл ӕмӕ йын йӕ зындзинӕдтӕн быхсын ӕнцондӕр вӕййы. Кӕд искӕмӕ кӕсыс, уӕд ӕй дӕхицӕй зоныс, адӕймагӕн йӕ хъуыддӕгтӕ арӕх, куыд спълан кӕны, афтӕ кӕй нӕ рауайынц. Фӕлӕ-иу ахӕм уавӕрты дӕр ахудын куы зонай, уӕд-иу дын ӕнцондӕр уыдзӕн. Ӕмӕ, кӕмӕ кӕсыс, уыимӕ-иу истӕуыл куы ахудат, уӕд уӕ уый кӕрӕдзийыл ноджы тынгдӕр бӕтдзӕн.

14. Де ’ввахс ӕмбалимӕ куы аныхас кӕнай, уӕд дын уый куыд баххуыс кӕндзӕн?

¹⁴ Де ’ввахс ӕмбалимӕ-иу аныхас кӕн. Кӕд тынг архайыс, цӕмӕй дӕ циндзинад ма ӕрмынӕг уа, уӕддӕр-иу хатт, гӕнӕн ис, стыхсай. Ахӕм рӕстӕджыты дӕ бон у аныхас кӕнын, уайдзӕфтӕ дын чи нӕ кӕндзӕн, ахӕм хорз ӕмбалимӕ (Ӕмб. 17:17). Уый дӕм лӕмбынӕг байхъусдзӕн ӕмӕ дӕ ныфс бауадздзӕн. Ӕмӕ та уӕд дӕ бон цин кӕнын уыдзӕн (Ӕмб. 12:25).

15. Хорз цӕмӕн у, цӕмӕй-иу дӕ цӕстытыл ауайын кӕнай, дзӕнӕты куыд цӕрдзыстӕм, уый?

¹⁵ Дӕ цӕстытыл-иу ауайын кӕн, иумӕ дзӕнӕты куыд цӕрдзыстут. Кӕд рынчын адӕймагмӕ кӕсыс, уӕд дӕ рох ма уӕд, афтӕ цӕрӕнбонты кӕй нӕ уыдзӕн. Йегъовӕмӕ ахӕм фӕнд никуы уыд, цӕмӕй чидӕр кӕсинаг уа ӕмӕ йӕм исчи кӕса (2 Кор. 4:16–18). Тагъд нӕ мондӕгтӕ «ӕцӕг цардӕй» уадздзыстӕм (1 Тим. 6:19). Кӕмӕ кӕсыс, уыимӕ-иу иумӕ уӕ цӕстытыл ауайын кӕнут, дзӕнӕты цы араздзыстут, уый. Ӕмӕ уын уый стыр цины хос уыдзӕн (Ис. 33:24; 65:21). Хо Хе́дер радзырдта: «Кӕмӕ кӕсын, уыдонӕн арӕх фӕдзурын, тагъд иумӕ цытӕ араздзыстӕм. Иумӕ дзаумӕттӕ хуыйдзыстӕм, згъордзыстӕм, велосипедтыл цӕудзыстӕм. Чи райгас уыдзӕн, уыдонӕн та дзул фыцдзыстӕм ӕмӕ сын хӕринаг кӕндзыстӕм. Ӕмӕ нын цы диссаджы ныфс ис, уый тыххӕй иумӕ Йегъовӕйӕн бузныг фӕдзурӕм».

ИННӔТӔН СЫН СӔ БОН КУЫД У ӔХХУЫС КӔНЫН?

16. Рынчын адӕймагмӕ чи кӕсы, уыдонӕн нӕ бон куыд у ӕххуыс кӕнын? (Кӕс нывмӕ дӕр.)

¹⁶ Ӕххуыс сын кӕнут, цӕмӕй-иу сын сӕхицӕн дӕр рӕстӕг уа. Ӕмбырды хотӕ ӕмӕ ӕфсымӕртӕн сӕ бон у, рынчынмӕ чи кӕсы, уыдонӕн ӕххуыс кӕнын, цӕмӕй-иу баулӕфой ӕмӕ-иу сӕхи хъуыддӕгтӕ дӕр саразой (Гал. 6:2). Иуӕй-иу хотӕ ӕмӕ ӕфсымӕртӕ алы къуырийӕн дӕр график скӕнынц – ныффыссынц, рынчынӕн чи кӕд ӕххуыс кӕндзӕн, уый. Хо Натальяйӕн йӕ сӕрыхицауы паралич ныццавта, ӕмӕ у инвалид. Наталья радзырдта: «Не ’мбырдӕй нӕм иу ӕфсымӕр къуыри иу кӕнӕ дыууӕ хатты ӕрбацӕуы, цӕмӕй-иу мӕ сӕрыхицауимӕ иумӕ рӕстӕг арвитой. Иумӕ фӕхъусын кӕнынц, фӕныхӕстӕ кӕнынц ӕмӕ ма кинотӕм дӕр фӕкӕсынц. Мӕ сӕрыхицауӕн йӕ зӕрдӕмӕ тынг цӕуы йе ’мбалимӕ рӕстӕг ӕрвитын. Мӕнӕн та уый вӕййы хорз фадат, цӕмӕй-иу мӕ фӕллад суадзон кӕнӕ-иу мӕхи аирхӕфсон». Кӕсинаг чи у, уыдонӕй кӕмӕдӕрты ӕхсӕвы стын фӕхъӕуы. Ахӕм адӕймагимӕ-иу уӕ бон нӕ уаид ӕхсӕвы баззайын, цӕмӕй, чи йӕм кӕсы, уый-иу дзӕбӕх бафынӕй кӕна?

17. Рынчын адӕймагмӕ чи кӕсы, уыдонӕн нӕ бон куыд у фембӕлдты рӕстӕг ӕххуыс кӕнын?

¹⁷ Фембӕлдты рӕстӕг-иу сын ӕххуыс кӕнут. Рынчынмӕ чи кӕсы, уыдонӕн ӕнцон нӕ вӕййы ӕмбырдты ӕмӕ конгрессты лӕмбынӕг хъусын. Иннӕтӕн сын сӕ бон куыд у ӕххуыс кӕнын? Зӕгъӕм, программӕйы рӕстӕг кӕнӕ программӕйы кӕцыдӕр хӕйтты рӕстӕг нӕ бон у абадын, кӕсын кӕмӕ хъӕуы, уыимӕ. Кӕд рынчынӕн йӕ бон хӕдзарӕй ӕддӕмӕ цӕуын нӕу, уӕд та йӕм нӕ бон у хӕдзармӕ бацӕуын, цӕмӕй иумӕ ӕмбырдмӕ видеоконференцийы фӕрцы баиу уӕм. Ӕмӕ уӕд, чи йӕм кӕсы, уымӕн йӕ бон уыдзӕн ӕмбырдмӕ ацӕуын.

18. Рынчын адӕймагмӕ чи кӕсы, уыдонӕн ма куыд ис ӕххуыс кӕнӕн?

¹⁸ Раппӕлут-иу сӕ ӕмӕ-иу уыдоны тыххӕй кувут. Хистӕр нӕлгоймӕгтӕ-иу хъуамӕ рӕстӕг ссарой, рынчынмӕ чи кӕсы, уыдоны бафидар кӕнынӕн (Ӕмб. 27:23). Ӕмӕ нӕхӕдӕг цыфӕнды уавӕры ма уӕм, уӕддӕр нӕ алкӕй бон дӕр у ахӕм хотӕ ӕмӕ ӕфсымӕртӕй зӕрдиагӕй ӕппӕлын, ӕмӕ, цас арӕхдӕр, уыйас хуыздӕр. Стӕй ма нӕ бон у Йегъовӕмӕ кувын, цӕмӕй сын тыхтӕ дӕтта ӕмӕ сын ӕххуыс кӕна, цӕмӕй сӕ циндзинад ма ӕрмынӕг уа (2 Кор. 1:11).

19. Тынг цӕмӕ ӕнхъӕлмӕ кӕсӕм?

¹⁹ Тагъд Йегъовӕ се ’ппӕтӕн дӕр сӕ масты цӕссыгтӕ ныссӕрфдзӕн. Низтӕ ӕмӕ мӕлӕт нал уыдзӕн (Рарг. 21:3, 4). «Къуылых чи у, уый сагау згъордзӕн» (Ис. 35:5, 6). Зӕронд ӕмӕ рынчын ничиуал кӕндзӕн – нӕдӕр нӕхӕдӕг, нӕдӕр нӕ хиуӕттӕ ӕмӕ не ’мбӕлттӕ. Зӕрондӕй адӕймаг цы зындзинӕдтӕ февзары, уыдон ничиуал ӕвзардзӕн. Иу дзырдӕй, «раздӕр цы уыд, уыдон хъуыды дӕр ничиуал ӕркӕндзӕн» (Ис. 65:17). Тагъд Йегъовӕ йӕ диссаджы зӕрдӕвӕрдтӕ сӕххӕст кӕндзӕн. Фӕлӕ цалынмӕ уыцы рӕстӕг нӕ ралӕууыд, уӕдмӕ дӕр Йегъовӕ ӕдзух нӕ фарсмӕ уыдзӕн ӕмӕ нын ӕххуыс кӕндзӕн. Ӕмӕ йыл дарддӕр дӕр нӕ ныфс куы дарӕм ӕмӕ дзы тыхтӕ куы курӕм, уӕд нын баххуыс кӕндзӕн, «цӕмӕй цингӕнгӕйӕ ӕмӕ фӕразонӕй кӕронмӕ фидар фӕлӕууӕм» (Кол. 1:11).