«Куыд райхъал кӕнӕм нӕ аргъуанмӕ цӕуджыты?»
ЦЫ фарст лӕвӕрд ӕрцыд французаг католикон журналы «Чырыстон бинонтӕ» («Famille Chrétienne»), ӕмӕ йыл бирӕтӕ дис дӕр нӕ бакодтой. Бритайнаг кардинал Хьюм аргъуанты схуыдта «фынӕй уӕйгуытӕ». Аргъуантӕн загъдӕуыд, цӕмӕй саразой уацамындон къордтӕ адӕмы райхъал кӕнынӕн. Уый иу италиаг сауджын схуыдта «евангелизацийы ног методтӕ». Кӕд ӕрӕджы уыцы хъуыдыйыл сразы Ромы папӕ, уӕддӕр се ’ппӕты нӕ бафӕндыд сӕ дины тыххӕй адӕмӕн дзурын.
Пиджи Перини, Миланы викарий, ӕрӕджы Африкӕйы куы уыд, уӕд ын уым иу ус-моладзан загъта: «Ӕз ам цӕрын 40 азы, ӕмӕ цӕмӕй африкӕйаг ӕгъдӕуттӕ ма фехӕлдтаин, уый тыххӕй Йесойы ном иу хатт дӕр нӕ загътон». Пиджи Перини сразы: «Мах Йесойы тыххӕй нал дзурӕм, кӕй йыл ӕууӕндӕм, уый тыххӕй никӕмӕн уал дзурӕм, Евангели нал хъусын кӕнӕм!» Фӕлӕ бирӕ ӕндӕр адӕмтӕн уацамынд сӕ царды хай у, уый сын ӕххуыс кӕны духовон ӕгъдауӕй фидар лӕууынӕн. Пиджи Перини ӕмбарын кӕны: «Базары куы фембӕлат, Йесойы тыххӕй чи дзуры кӕнӕ Библи йӕ къухы кӕмӕн ис, ахӕм дыууӕ адӕймагыл, уӕд сӕ уайтагъд базондзыстут, уыдон Иегъовӕйы Ӕвдисӕнтӕ кӕй сты!»
Милуангай адӕймӕгтӕн Иегъовӕйы Ӕвдисӕнтимӕ Библийыл ныхас кӕнын ӕхсызгон у. Кӕй зӕгъын ӕй хъӕуы, ды кӕм цӕрыс, уым дӕр Ӕвдисӕнтӕ Библийыл ныхас кӕнынц. Фыццаг ӕнусы чырыстӕтты фӕзмгӕйӕ, Ӕвдисӕнтӕ кӕрӕдзи зӕрдиагӕй разӕнгард кӕнынц, цӕмӕй сӕ дины тыххӕй адӕмӕн дзурой. Фембӕлдтӕ сын кӕм вӕййы (хонынц сӕ Паддзахады Залтӕ), уым се ’хсӕн ис хӕлардзинад. Хорз нӕ уаид, Иегъовӕйы Ӕвдисӕнтӕн цы фембӕлдтӕ вӕййы, уыдонӕй сӕ иумӕ куы бацӕуис ӕмӕ куы фенис, духовон хуыссӕгимӕ тохгӕнӕн куыд ис, уый?