ଜୀବନ କାହିଁକି ବହୁମୂଲ୍ୟ ?

ପୂର୍ବ ଲେଖାଗୁଡ଼ିକରେ ଆମେ ଦେଖିଲୁ ଯେ ଅନେକ ଥର ଜୀବନରେ ଏପରି ଘଟଣା ସବୁ ହୋଇଯାଏ, ଯାହା ଯୋଗୁଁ ବଞ୍ଚିବା ପାଇଁ ଇଚ୍ଛା ହିଁ ହୁଏ ନାହିଁ । ନିଜ ଚିନ୍ତାଗୁଡ଼ିକର ବୋଝ ଉଠାଇବା ଯୋଗୁଁ ବେଳେବେଳେ ଆପଣଙ୍କ ମନରେ ମଧ୍ୟ ଏଭଳି ଭାବନା ଆସୁଥିବ, କʼଣ ମୋର ବଞ୍ଚିବାର କିଛି ଲାଭ ଅଛି । ହୁଏତ ଆପଣ ଏହା ମଧ୍ୟ ଭାବୁଥିବେ, ଜଣା ନାହିଁ କେହି ମୋର ଚିନ୍ତା କରନ୍ତି ନା ନାହିଁ । କିନ୍ତୁ ଭରସା ରଖନ୍ତୁ, ଯିହୋବା ଈଶ୍ୱର ଆପଣଙ୍କର ଚିନ୍ତା କରନ୍ତି । ଆପଣ ତାଙ୍କ ପାଇଁ ବହୁମୂଲ୍ୟ ଅଟନ୍ତି ।

ଈଶ୍ୱରଙ୍କ ଜଣେ ସେବକଙ୍କୁ ପୂରା ଭରସା ଥିଲା ଯେ ଈଶ୍ୱର ତାଙ୍କୁ ସାହାଯ୍ୟ କରିବେ । ତେଣୁ ସେ ଈଶ୍ୱରଙ୍କୁ ବିନତି କରି କହିଲେ: “ମୋହର ସଙ୍କଟ ଦିନରେ ମୁଁ ତୁମ୍ଭଙ୍କୁ ଡାକିବି; କାରଣ ତୁମ୍ଭେ ମୋତେ ଉତ୍ତର ଦେବ ।” (ଗୀତସଂହିତା ୮୬:୭) କିନ୍ତୁ ହୁଏତ ଆପଣ ଭାବିବେ, ଯେବେ ମୁଁ ନିଜ ‘ସଙ୍କଟରେ’ ଈଶ୍ୱରଙ୍କୁ ଡାକିବି, ତେବେ ସେ କିପରି ମୋତେ ସାହାଯ୍ୟ କରିବେ ?

ଆପଣଙ୍କ ପ୍ରାର୍ଥନା ଶୁଣି ଈଶ୍ୱର ହୁଏତ ଆପଣଙ୍କ ସବୁ କଷ୍ଟକୁ ଦୂର କରିବେ ନାହିଁ, କିନ୍ତୁ ସେ ଆପଣଙ୍କୁ ମନର ଶାନ୍ତି ଦେଇପାରିବେ, ଯାହାଦ୍ୱାରା ଆପଣ ନିଜ ପରିସ୍ଥିତିକୁ ସଠିକ୍‌ ଭାବେ ସାମନା କରିପାରିବେ । ବାଇବଲରେ ଲେଖାଅଛି, ‘କୌଣସି ବିଷୟରେ ଚିନ୍ତିତ ହୁଅ ନାହିଁ, କିନ୍ତୁ ସମସ୍ତ ବିଷୟରେ ପ୍ରାର୍ଥନା ଓ ବିନତି ଦ୍ୱାରା ଧନ୍ୟବାଦ ସହ ତୁମ୍ଭମାନଙ୍କର ନିବେଦନସବୁ ଈଶ୍ୱରଙ୍କ ନିକଟରେ ଜଣାଅ । ସେଥିରେ ସମସ୍ତ ବୋଧର ଅଗମ୍ୟ ଯେ ଈଶ୍ୱରଙ୍କ ଶାନ୍ତି, ତୁମ୍ଭମାନଙ୍କର ହୃଦୟ ଓ ମନକୁ ସୁରକ୍ଷା କରି ରଖିବ ।’ (ଫିଲିପ୍‌ପୀୟ ୪:୬, ୭) ଏବେ ବାଇବଲର କିଛି କଥା ଉପରେ ଧ୍ୟାନ ଦିଅନ୍ତୁ, ଯେଉଁଥିରୁ ଜଣାପଡ଼େ ଯେ ଈଶ୍ୱର ଆପଣଙ୍କର ଚିନ୍ତା କରନ୍ତି ।

ଈଶ୍ୱର ଆପଣଙ୍କ ଚିନ୍ତା କରନ୍ତି

‘ଈଶ୍ୱର ଗୋଟିଏ ମଧ୍ୟ ଘରଚଟିଆକୁ ଭୁଲନ୍ତି ନାହିଁ । ତୁମ୍ଭେମାନେ ଅନେକ ଘରଚଟିଆଠାରୁ ଶ୍ରେଷ୍ଠ ।’—ଲୂକ ୧୨:୬, ୭.

ଧ୍ୟାନ ଦିଅନ୍ତୁ: ହୁଏତ ମଣିଷ ପାଇଁ ଛୋଟ ଛୋଟ ଘରଚଟିଆର ମୂଲ୍ୟ ନ ଥିବ, କିନ୍ତୁ ଈଶ୍ୱର ସେମାନଙ୍କର ମଧ୍ୟ ଚିନ୍ତା କରନ୍ତି । ସେ ଗୋଟିଏ ବି ଘରଚଟିଆକୁ ଭୁଲନ୍ତି ନାହିଁ । କିନ୍ତୁ ଯଦି ମଣିଷ ବିଷୟରେ ଦେଖିବା, ତେବେ ସେମାନେ ଈଶ୍ୱରଙ୍କ ଦୃଷ୍ଟିରେ ଅନେକ ଘରଚଟିଆଠାରୁ ବି ଅଧିକ ଶ୍ରେଷ୍ଠ । ଈଶ୍ୱର ପୃଥିବୀରେ ଯେତେ ବି ପ୍ରାଣୀ ସୃଷ୍ଟି କରିଛନ୍ତି, ସେମାନଙ୍କ ମଧ୍ୟରୁ ମଣିଷ ବହୁତ ଖାସ୍‌ । ସେ ମଣିଷମାନଙ୍କୁ ନିଜ ‘ପ୍ରତିମୂର୍ତ୍ତିରେ’ ସୃଷ୍ଟି କରିଛନ୍ତି । ତେଣୁ ସେମାନେ ଈଶ୍ୱରଙ୍କ ଭଳି ଭଲ ଗୁଣ ବଢ଼ାଇପାରନ୍ତି ଏବଂ ତାହା ଦେଖାଇ ମଧ୍ୟ ପାରନ୍ତି ।—ଆଦି ପୁସ୍ତକ ୧:୨୬, ୨୭.

‘ହେ ଯିହୋବା, ତୁମ୍ଭେ ମୋହର ଅନୁସନ୍ଧାନ କରିଅଛ ଓ ମୋହର ପରିଚୟ ନେଇଅଛ । ତୁମ୍ଭେ ମୋହର ସଙ୍କଳ୍ପ ବୁଝୁଅଛ । ମୋତେ ପରୀକ୍ଷା କର ଓ ମୋହର ସଙ୍କଳ୍ପସବୁ ଜ୍ଞାତ ହୁଅ ।’—ଗୀତସଂହିତା ୧୩୯:୧, ୨, ୨୩.

ଧ୍ୟାନ ଦିଅନ୍ତୁ: ଈଶ୍ୱର ଆପଣଙ୍କ ପ୍ରତ୍ୟେକ କଥା ଜାଣନ୍ତି । ଆପଣଙ୍କ ଜୀବନରେ କʼଣ ଚାଲିଛି, ଆପଣ କେଉଁ ସମସ୍ୟାର ସାମନା କରୁଛନ୍ତି, ସେ ସବୁ ଜାଣନ୍ତି । ହୁଏତ କେହି ଆପଣଙ୍କ ପରିସ୍ଥିତିକୁ ବୁଝିପାରିବେ ନାହିଁ, କିନ୍ତୁ ସେ ବୁଝିପାରିବେ । ସେ ଆପଣଙ୍କ ଚିନ୍ତା କରନ୍ତି ଏବଂ ସେ ଆପଣଙ୍କୁ ସାହାଯ୍ୟ କରିବା ପାଇଁ ଚାହାନ୍ତି । ତେଣୁ ନିଜ ଜୀବନକୁ ବହୁମୂଲ୍ୟ ଭାବନ୍ତୁ ।

ଆପଣଙ୍କ ଜୀବନର ମହତ୍ତ୍ୱ ରହିଛି

‘ହେ ସଦାପ୍ରଭୋ, ମୋହର ପ୍ରାର୍ଥନା ଶୁଣ ଓ ମୋʼ କାକୁକ୍ତି ତୁମ୍ଭ ନିକଟରେ ଉପସ୍ଥିତ ହେଉ । ମୋʼ ପ୍ରତି ଆପଣା କର୍ଣ୍ଣ ଡେର; ମୁଁ ପ୍ରାର୍ଥନା କରିବା ଦିନରେ ମୋତେ ଶୀଘ୍ର ଉତ୍ତର ଦିଅ । ଈଶ୍ୱର ଦୀନହୀନମାନଙ୍କ ପ୍ରାର୍ଥନାରେ ମନୋଯୋଗ କରିଅଛନ୍ତି ।’—ଗୀତସଂହିତା ୧୦୨:୧, ୨, ୧୭.

ଧ୍ୟାନ ଦିଅନ୍ତୁ: ଆଜି ଯାଏଁ ମଣିଷ ଯେତେ ବି ଦୁଃଖକୁ ସହିଛି, ତାʼର ଯେତେ ବି ଲୁହ ଝରିଛି ସେସବୁ ବିଷୟରେ ଈଶ୍ୱର ସତେ ଯେପରି ଗୋଟିଏ ବହିରେ ଲେଖି ରଖିଛନ୍ତି । (ଗୀତସଂହିତା ୫୬:୮) ସେ ଆପଣଙ୍କର ମଧ୍ୟ ଲୁହ ଦେଖିଛନ୍ତି । ଆପଣ ଜୀବନରେ ଯାହା ଯାହା ଦୁଃଖ ସହିଛନ୍ତି, ଯେଉଁ ସମସ୍ୟାଗୁଡ଼ିକର ସାମନା କରିଛନ୍ତି, ସେସବୁ ତାଙ୍କୁ ମନେ ଅଛି, କାରଣ ଆପଣ ତାଙ୍କ ପାଇଁ ବହୁମୂଲ୍ୟ ।

‘ନିରାଶ ହୁଅ ନାହିଁ, କାରଣ ଆମ୍ଭେ ତୁମ୍ଭର ପରମେଶ୍ୱର; ଆମ୍ଭେ ତୁମ୍ଭକୁ ସବଳ କରିବା; ହଁ, ଆମ୍ଭେ ତୁମ୍ଭର ସାହାଯ୍ୟ କରିବା । କାରଣ ଆମ୍ଭେ ସଦାପ୍ରଭୁ ତୁମ୍ଭର ପରମେଶ୍ୱର, ତୁମ୍ଭକୁ କହିବା, ଭୟ କର ନାହିଁ; ଆମ୍ଭେ ତୁମ୍ଭର ସାହାଯ୍ୟ କରିବା ।’—ଯିଶାଇୟ ୪୧:୧୦, ୧୩.

ଧ୍ୟାନ ଦିଅନ୍ତୁ: ଈଶ୍ୱର ଆପଣଙ୍କୁ ସାହାଯ୍ୟ କରିବା ପାଇଁ ଚାହାନ୍ତି । ଯଦି ଆପଣଙ୍କୁ କେବେ ଲାଗେ ଯେ ଆପଣ ହାର୍‌ ମାନିଯିବେ, ତେବେ ସେ ଆପଣଙ୍କ ହାତକୁ ଧରି ପକାଇବେ ଏବଂ ଆପଣଙ୍କୁ ସାହାରା ଦେବେ ।

ଭଲ ଭବିଷ୍ୟତର ଗୋଟିଏ ଆଶା ଅଛି

“ଈଶ୍ୱର ଜଗତକୁ ଏଡ଼େ ପ୍ରେମ କଲେ ଯେ, ସେ ଆପଣା ଅଦ୍ୱିତୀୟ ପୁତ୍ରଙ୍କୁ ଦାନ କଲେ, ଯେପରି ଯେକେହି ତାହାଙ୍କଠାରେ ବିଶ୍ୱାସ କରେ, ସେ ବିନଷ୍ଟ ନ ହୋଇ ଅନନ୍ତ ଜୀବନ ପ୍ରାପ୍ତ ହୁଏ ।”—ଯୋହନ ୩:୧୬.

ଧ୍ୟାନ ଦିଅନ୍ତୁ: ଈଶ୍ୱର ଆପଣଙ୍କୁ ଏତେ ପ୍ରେମ କଲେ ଯେ ସେ ଆପଣଙ୍କ ପାଇଁ ନିଜ ପୁତ୍ର ଯୀଶୁଙ୍କ ଜୀବନ ବଳିଦାନ କରିଦେଲେ । ଏହି ବଳିଦାନ ଯୋଗୁଁ ଆପଣ ଭବିଷ୍ୟତରେ ସବୁଦିନ ପାଇଁ ଖୁସିରେ ବଞ୍ଚିପାରିବେ ।a