Ue Solomɔn kɔ ama tɔgɛ nu a dap siraloo ɛrɛgebah nɛɛ a gaa taāŋabah Jɛhova. A dap dɔbu doo kirikiri pɔrɔ sa sɔ̄ esaa a kɛɛrɛ kɔ dɛ̄dɛɛ̄ nu ama bugia sira. Ale a dap kɔ, “A aadee sira.” Kerewo, lo a kɛɛrɛbu nu a sira a kaāna, edap muɛ kɔ a ɛrɛ pio nu a doo lo a naa bɔloo, lo a doo kɔ a doo lo pɔrɔ. Pio lo nu dap lu pɔrɔ gbo, ɛrɛ ekpeloo a naa bɔloo, ale sigara pya kɛ̄ a naa bɔloo sī le sī ale nyɔɔ intanɛt. Pio sɔ̄, dap lu kɔ a naa gaa bee yerena kara, buū Baibol, si enɔānu, ale si uwe zue ue. Doodoo nwiī zuguru alu ekɔ bu kpa Kam, naadabah ye pɔrɔ naa bugia sira. Ena i nɔ aāloo ani? Naale aba lo pɔrɔ na i ɔbɛ edoo a, lunage ebɛɛ̄ kɔ i ɔbɛ edoo pya nu ezū i kɔ i doo lo pɔrɔ. Solomɔn doo kɔ i suā lo ama sɔ̄ ekɔa nu akiiloo lo nwiī zuguru le waa-kiā-uwe a sah.—Mat 5:​29, 30. w24.07 16 ¶10-11

Ena alu lo zɔ a? Ɛɛ na tam zue le yereue Buɛ̄-mɛnɛ lo a kpɔā dum pya nɛɛ. (2 Kɔr 4:1) E ena alu lo ka-bā a? Lo ka-bā na pya zooro Bari lo ba zue le yereue nɛ pya dɔɔ̄na. Bu dee Pɔɔl, pya uradu wee su pya nu a si gbɛnɛ du doodoo kpugi, mii le nuede yerebu ka-bā alu esu baɛ̄ kwaā, sɔ̄ ba gaa kiā aa ziī kɛ̄ kii ziī. Bu aba lo sīdee, Jɛhova esua le yereue a si gbɛnɛ du i yere kɛ̄bah. Nyɔɔbee Jɛhova le i loo, i ɛrɛ mɛm esu zuema le yereue. Pio sɔ̄ bɔɔ dap i aa loo pya nɛɛ, ale bɔɔ dap i aa kɔ ba egbāna i sī. Bu mɛ sīdee na i dap be eebah taāŋa ama a? Naa kɛɛrɛbuloo kara pya nɛɛ lɛɛratam bee yere sɔ̄ a bee lu e’ɔbɛ wa kɔ ba aa zuena ue. Taā bɔɔ wa aa sɔ̄ ba wa ɔbɛ kɔ ba aa zuena ue, ba bee bara Jɛhova kɔ a yerebah wa nɛ lokwa ba dap “su e’agaloo kɔā ue Bari.” Aba lo sɔ̄, Jɛhova bee agara wa kara. (Doonu 4:​18, 29, 31) Lo bɔɔ aa a loo pya nɛɛ sɔ̄ i aa zue ue, bara Jɛhova kɔ a agɛrɛtɛ̄ wereloo o ɛrɛ kumaloo pya nɛɛ lokwa bɔɔ naa aa a lo ezue le yereue wa nɛ. w24.04 16 ¶8-9

Wereloo i ɛrɛ loo Jɛhova zū i kɔ i sere ye bee kaɛ. Lo ama kura kɔ i gbī ekɔ nɛ pya dɔɔ̄na kɔ dɛ̄dɛɛ̄ nu Setan bee kɔ kumaloo Jɛhova lu esah. (Jɛn 3:​1-5; Job 2:4; Jɔn 8:44) Sɔ̄ i kii wee zue ue, a taɛ i lo ekɔ dua nɛɛ Jɛhova lu nɛ ɛrɛgebah pya a gbī egbaɛ̄tɔ̄. I gbī edoo kɔ dɛ̄dɛɛ̄ nɛɛ a suā kɔ ye elap dogo a kuī eera na wereloo, ye bɛbɛɛ lu lo a kaāna sa lee, le kɔ sɔ̄ sɔ̄ naa binia ye Buɛ̄-mɛnɛ gaa le mmɛ kumaloo dɛ̄dɛɛ̄ mɔ̄na taāŋa sa su efɛɛloo le ɛɛbu nua loo dɛ̄dɛɛ̄ nɛɛ. (Yɔɔ 37:​10, 11, 29; 1 Jɔn 4:8) Sɔ̄ i kɔ pya nu akiiloo Jɛhova nɛ pya dɔɔ̄na sa ye kɔ ue lɛɛbee, i sere ye bee kaɛ. Bu i ɛɛ nyɔɔbee i gaa doo nu a bɔloo kɔ i doo doodoo Pya Ekeebee Jɛhova. w24.05 18 ¶12