Kɛzi Ɛbava Adwelielilɛ Nwo Neazo Ne Wɔali Gyima La

Yɛ mediema ne mɔ yɛ gyima ɛsesebɛ kpalɛ fa siezie adawubɔlɛ nwo neazo ne, na nolobɔlɛma dɔɔnwo ɛnwu kɛ ɔboa kpalɛ wɔ bɛ azɛlɛsinli ne anu. Noko akee wɔ daselɛlilɛ nu, kɛmɔ asolo maanle biala anu tɛnlabelɛ la ati, nolobɔlɛma bahola akpa edwɛkɛtile fofolɛ mɔɔ ɔbaboa bɛ azɛlɛsinli ne anu amra la. Yɛɛ yɛ muala yɛfa adehilelɛ mɔɔ bɛfa bɛmaa yɛ wɔ nolobɔlɛ titili nwo la yɛyɛ gyima. Yɛ bodane a le kɛ yɛbali Gyisɛse mɛla mɔɔ ɔvale ɔmaanle yɛ kɛ yɛbɔ Belemgbunlililɛ ne anwo edwɛkpa ne nolo la azo.​—Mt 24:14.

Saa yɛlɛyɛ sukoavoma gyimalilɛ a, ɔwɔ kɛ nolobɔlɛma fa adwelielilɛ nwo neazo edwɛkɛtile ne mɔɔ wɔ Yɛ Ɛbɛlabɔlɛ Nee Yɛ Ɛzonlenlɛ Nyianu Buluku ne anu la di gyima. Noko saa bɛanga ye zɔ a, bɛbahola bɛakpa kpuya gyɛne, ngɛlɛlera nee kpuya bieko mɔɔ ɔbafɛta bɛ azɛlɛsinli ne anu amra la. Ɛhye le nzenzaleɛ mɔɔ yɛyɛ ye wɔ edwɛkɛ mɔɔ ɔwɔ June 2020 nyianu buluku ne mukelɛ 8 ne anu la anu.