Mɔɔ Yɛ Alɔbɔlɛ Wɔ Ɛbɛlabɔlɛ Nwo La

FA YE kɛ ɛlɛnea awie mɔɔ ze bɔlo bɔ kpalɛ na ɛkulo ye edwɛkɛ la anwo vidio. Bɛyele mekɛ mɔɔ ɛnee ɔlɛsukoa kɛzi bɛbɔ bɔlo yɛɛ ndetelɛ ngakyile mɔɔ ɔnyianle wɔ ye ngakula nu la. Akee bɛyele mekɛ mɔɔ ɛnee ɔbɔ bɔlo ɔmaa bɔlo ɛbɔlɛ eku bie mɔɔ ɛlie duma la, nzinlii ɔhɔbɔle bɔlo wɔ abolokyi. Yeangyɛ, bɛvale mekɛ mɔɔ yeyɛ ɛrelera la bɛdoale zo, na awieleɛ bɔkɔɔ ne ɔwule.

Vidio ɛhye ɛnle nwɔra ala, ɔle nɔhalɛ edwɛkɛ mɔɔ zile. Saa ɛnee ahenle bɔ edwɛne, ɔle abɔdeɛ nwo nrɛlɛbɛvolɛ, ɔsu ɛnriandile anzɛɛ awie gyɛne biala mɔɔ ɛlie duma la a, anrɛɛ kɛ vidio ne awieleɛ bayɛ ala ɛne. Ɔbahola yeara ye kɛ ahenle yɛle ninyɛne dɔɔnwo, noko ɛnlie ɛnli kɛ saa tɛ mgbanyinliyɛlɛ yɛɛ ewule a anrɛɛ ɔbahola yeayɛ mɔɔ bo zɔ la ɔ?

Ɔyɛ nyane kpalɛ noko ɛhye a ɛlɛkendɛ yɛ muala a. (Nolobɔvo ne 9:5) Ɔnva nwo mɔdenle biala mɔɔ yɛbɔ la, yɛyɛ mrelera na yɛwu. Eza esiane anzɛɛ anwodolɛ ɛzulolɛ bie kola pɛ yɛ ngoane zo. Baebolo ne ka kɛ, yɛle kɛ nwonlomɔ ɛbɔlɛ mɔɔ “bɛnwu ye mekɛ ekyi bie na ɔ bo zo minli la.”​—Gyemise 4:14.

Bie mɔ afoa nu, ɔluakɛ bɛnze mɔɔ bazi kenle bie yɛɛ bɛte nganeɛ kɛ nvasoɛ ɛnle bɛ ɛbɛlabɔlɛ zo la ati, bɛka kɛ “bɛmaa yɛli na yɛnlo, ɔluakɛ ɛhyema ɛnee yɛwu.” (1 Kɔlentema 15:32) Noko asoo ɛnlie ɛndo nu kɛ menli ɛkpa ɛbɛlabɔlɛ ɛhye ɔluakɛ bɛze kɛ bɛkola bɛwu mekɛ biala yɛɛ bɛnlɛ kenle bie anyelazo la ati ɔ? Saa ɛlɛnwu amaneɛ a, bie a ɛbabiza kɛ, ‘Asoo ɛbɛlabɔlɛ ne ala ɛne?’ Nienwu a ɛbanwu mualɛ ne a?

Menli dɔɔnwo suzu kɛ abɔdeɛ nwo nrɛlɛbɛvoma lɛ mualɛ ne. Abɔdeɛ nwo nrɛlɛbɛvoma yɛɛ dɔketama ɛlɛbɔ mɔdenle kɛ bɛbamaa yɛ ngoane mekɛ awa. Bie mɔ noko ɛlɛbɔ mɔdenle ɛsesebɛ kɛ bɛbamaa sonla adɛnla aze ahyɛ kpalɛ. Wɔ bɛ mɔdenlebɔlɛ ne amuala anzi, kpuya ɛhye mɔ gyegye menli: Duzu ati a yɛyɛ mrelera na yɛwu a? Asoo bɛbali yɛ kpɔvolɛ ewule nwo zo konim kenle bie? Edwɛkɛ mɔɔ doa zo la bahilehile nu na yɛabua kpuya ɛhye: Asoo ɛbɛlabɔlɛ ne ala ɛne?