Duzu A Baebolo Ne Ka A?

Pɛlepɛlelilɛ bara azɛlɛ ye azo kenle bie ɔ?

Duzu a ɛbaha a?

• Ɛhɛe

• Kyɛkyɛ

• Bie a

Mɔɔ Baebolo ne ka la

‘Meze kɛ Gyihova di mɔɔ ɛlɛnwu amaneɛ la edwɛkɛ maa ye, na ɔbua mɔɔ ɛhyia la ndɛne nɔhalɛ nu ɔmaa ye.’ (Edwɛndolɛ 140:12) Nyamenle Belemgbunlililɛ ne bava pɛlepɛlelilɛ ara azɛlɛ ye azo.

Boni bieko a yɛsukoa yɛfi Baebolo ne anu a?

• Nyamenle nwu nzisi mɔɔ ɛlɛkɔ zo wɔ azɛlɛ ye azo la, na ɔbayɛ nwolɛ debie.​—Nolobɔvo ne 5:8.

• Nyamenle pɛlepɛlelilɛ ne bava anzodwolɛ nee banebɔlɛ ara azɛlɛ ye azo.​—Ayezaya 32:16-18.

Asoo Nyamenle yɛ nyeyenu?

Menli bie mɔ die di kɛ Nyamenle ɛyila anzɛɛ ɛwa menli ekpunli bie mɔ amonle, yɛɛ bie mɔ noko die di kɛ Nyamenle ɛnyɛ nyeyenu. Kɛzi ɛdwenle nwo ɛ?

Mɔɔ Baebolo ne ka la

“Nyamenle ɛnnea sonla nyunlu, na wɔ maanle biala anu awie biala mɔɔ sulo ye na ɔyɛ mɔɔ ɔle kpalɛ la, ɔdie ye ɔto nu.” (Gyima ne 10:34, 35) Wɔ Nyamenle anye zo menli kɔsɔɔti sɛ.

Boni bieko a yɛsukoa yɛfi Baebolo ne anu a?

• Baebolo ne lɛ “edwɛkpa” maa “maanle nee mbusua nee aneɛ nee menli kɔsɔɔti.”—Yekile 14:6.