EDWƐKƐ TITILI | KƐZI ƐBANYIA BAEBOLO ƐGENGALƐ ZO NVASOƐ LA
Kɛmɔti A Ɔwɔ Kɛ Mekenga Baebolo Ne Ɛ?
“Ɛnee mesuzu kɛ Baebolo ne abo ɛdelɛ yɛ se.”—Jovy
“Mendele nganeɛ kɛ ɔbabu me nye.”—Queennie
“Menwunle kɛzi Baebolo ne kpole de la, me nye anlie nwo kɛ mebagenga.”—Ezekiel
Asoo wɔyɛ wɔ adwenle kɛ ɛkenga Baebolo ne na wɔgyakyi ɔluakɛ ɛnee ɛte nganeɛ kɛ menli ɛhye mɔ la ati ɔ? Wɔ menli dɔɔnwo afoa nu, Baebolo ne ɛgengalɛ bu bɛ nye. Noko, saa ɛnwu ye kɛ Baebolo ne bahola aboa wɔ yeamaa wɔanyia anyelielɛ nee ahunlundwolɛ wɔ ɛbɛlabɔlɛ nu ɛ? Eza saa ɛnwu ye kɛ yɛlɛ ndenle ngakyile mɔɔ ɛdua zo a ɔbamaa ye ɛgengalɛ ayɛ anyelielɛ noko ɛ? Asoo ɛbahulo kɛ ɛbanwu mɔɔ ɛbanyia wɔavi Baebolo ne anu la ɔ?
Suzu edwɛkɛ ekyi mɔɔ menli mɔɔ nwunle nvasoɛ mɔɔ wɔ Baebolo ɛgengalɛ zo hanle la anwo nea.
Ezekiel, mɔɔ wɔ ye ɛvolɛ 20 ne anu la ka kɛ: “Mekɛ bie mɔɔ ɛze la, ɛnee mele kɛ awie mɔɔ ɛlɛka kale mɔɔ ɔnze ɛleka mɔɔ ɔlɛkɔ la. Noko Baebolo ɛgengalɛ ɛboa me ɛmaa menyia asetɛnla kpalɛ. Folɛdulɛ kpalɛ wɔ nu mɔɔ mebahola meava meabɔ me ɛbɛla dahuu a.”
Frieda, mɔɔ ɔdaye noko ɔwɔ ye ɛvolɛ 20 ne anu la ka kɛ: “Ɛnee mekulo butule. Noko ɔlua Baebolo ɛgengalɛ ti, mezukoa kɛ mebahomo me nwo zo. Ɛhye ɛmmaa ɔnyɛ se kɛ me nee awie biala balua, yemɔti kɛkala melɛ agɔnwolɛma dɔɔnwo.”
Eunice mɔɔ wɔ ye ɛvolɛ 50 ne anu la ka ye wɔ Baebolo ne anwo kɛ, “Ɔlɛboa me yeamaa meayɛ sonlakpalɛ na meahakyi me subane ɛtane ne mɔ.”
Kɛ mɔɔ kengavoma zɔhane mɔ nee menli mgbe dɔɔnwo ɛnwu ye la, Baebolo ɛgengalɛ bahola aboa wɔ yeamaa wɔabɔ ɛbɛla mɔɔ yɛ anyelielɛ. (Ayezaya 48:17, 18) Bieko, ɔkola ɔboa wɔ ɔmaa (1) ɛsi kpɔkɛ kpalɛ, (2) ɛnyia agɔnwolɛma kpalɛ (3) ɛgyinla wɔ ngyegyelɛ nloa na (4) mɔɔ tɛla biala la, ɛsukoa Nyamenle anwo nɔhalɛ ne. Folɛdulɛ mɔɔ wɔ Baebolo ne anu la vi Nyamenle ɛkɛ, ɔti saa ɛdi zo a ɛnrɛvo ɛlɛ. Nyamenle ɛndu folɛ ɛtane ɛlɛ.
Mɔɔ hyia la a le kɛ ɛbabɔ ɔ bo. Ninyɛne boni mɔ a ɔnrɛmaa ɔnrɛyɛ se kɛ ɛbabɔ ɔ bo na yeayɛ anyelielɛ kpalɛ a?