Deɛmɔti Nyamenle Se Yɛyɛ Asɔne La

Nyamenle se yɛva ye agɔnwolɛ.

Agɔnwolɛma di adwelie amaa bɛ agɔnwolɛvalɛ ne anu amia. Zɔhane ala a Nyamenle se, yɛ nee ye ɛdendɛ a, na yebuke adenle yemaa yɛ kɛ yɛva ye agɔnwolɛ kyengye. Ɔka kɛ: “Akee bɛbazonle me, na bɛara ɛke bɛarayɛ nzɛlɛlɛ, na mebadie bɛ.” (Gyɛlɛmaya 29:12) Saa ɛtendɛ ɛkile Nyamenle a ‘ɛbabikye [ye], na ɔdaye noko ɔbabikye wɔ.’ (Gyemise 4:8) Baebolo ne maa yɛnwu kɛ: “[Gyihova] bikye bɛdabɛ mɔɔ bɛfɛlɛ ye la amuala.” (Edwɛndolɛ 145:18) Mekɛ mɔɔ yɛlɛkɔ zo yɛazɛlɛ Nyamenle la, yɛ nee ye agɔnwolɛvalɛ ne anu bamia kpalɛ.

Nyamenle kulo kɛ ɔboa wɔ.

Gyisɛse hanle kɛ: “Bɛ nuhua boni yɛɛ saa ɔ ra biza ye kpanwo a ɔkɛva bolɛ ɔkɛmaa ye a? Anzɛɛ saa ɔbiza ye fɛlɛ a ɔkɛmaa ye ɛwɔlɛ a? Na saa bɛmɛ . . . bɛze kɛ ɔwɔ kɛ bɛfa ninyɛne kpalɛ bɛmaa bɛ mra a, ɛnee fane nyɛ yɛɛ bɛ Ze mɔɔ wɔ anwuma la ɛnrɛva ninyɛne kpalɛ ɛnrɛmaa bɛdabɛ mɔɔ bɛbiza ye la ɛ?” (Mateyu 7:9-11) Ɛhɛe, Nyamenle ɛlɛfɛlɛ wɔ kɛ ɛzɛlɛ ye ɔboalekɛ ‘ɔdwenle ɛ nwo’ na ɔkulo kɛ ɔboa wɔ. (1 Pita 5:7) Ɔfɛlɛ wɔ kɛ ɛva wɔ ngyegyelɛ ɛdo ɔ nyunlu. Baebolo ne ka kile yɛ kɛ: “Bɛmmadwenle debie biala anwo. Wɔ debie biala anu bɛyɛ moyɛlɛ nzɛlɛlɛ na bɛva mɔɔ bɛhyia nwolɛ la bɛdo Nyamenle anyunlu.”​—Felepaema 4:6.

Alesama hyia Nyamenle anwo.

Mbɔlɔba mɔɔ sukoa sonla subane nwo debie la ɛyɛ ye nzonlɛ kɛ menli mgbe dɔɔnwo te nganeɛ kɛ ɔwɔ kɛ bɛyɛ asɔne. Bɛdabɛ mɔɔ bɛnlie bɛnli kɛ Nyamenle wɔ ɛkɛ nee bɛdabɛ mɔɔ bɛngola bɛnnwu ye saa Nyamenle wɔ ɛkɛ la boka nwo.a Ɛhye le daselɛ mɔɔ kile kɛ alesama hyia Nyamenle anwo. Gyisɛse zele kɛ: “Tɛ aleɛ ngome a sonla di a ɔnyia ngoane a, na Nyamenle anloa edwɛkɛ biala maa ngoane.” (Mateyu 4:4) Adenle ko mɔɔ yɛbahola yɛalua zo la a le kɛ yɛ nee Nyamenle bali adwelie dahuu.

Saa yɛdie Nyamenle ɛsalɛdolɛ ne yɛto nu a, duzu nvasoɛ a yɛ nye la kɛ yɛbanyia a?