BAEBOLO KPUYIA MƆƆ BƐBUA

Duzu ati a ɔwɔ kɛ yɛyɛ asɔne a?

Gyihova Nyamenle kpondɛ kɛ yɛfi yɛ ahonle nu yɛka yɛ ngyianlɛ nwo edwɛkɛ yɛkile ye dahuu. (Luku 18:1-7) Kɛmɔ ɔ nye die yɛ nwo la ati ɔtie yɛ. Saa yɛ anwuma Selɛ ne ɛvɛlɛ yɛ kɛnlɛma kɛ yɛyɛ asɔne a, kɛmɔti a ɔnle kɛ yɛdie ɛsalɛdolɛ ne azo ɛ?​—Kenga Felepaema 4:6.

Asɔneyɛlɛ ɛnle adenle sikalɛ mɔɔ yɛdua zo yɛbiza moalɛ a. Emomu, asɔneyɛlɛ boa yɛ maa yɛbikye Nyamenle. (Edwɛndolɛ 8:3, 4) Saa dahuu yɛka yɛ nganeɛdelɛ nwo edwɛkɛ yɛkile Nyamenle a, ɔmaa yɛ nee ye yɛ agɔnwolɛ kpalɛ.​—Kenga Gyemise 4:8.

Kɛzi ɔwɔ kɛ yɛyɛ asɔne ɛ?

Saa yɛlɛyɛ asɔne a, Nyamenle ɛngulo kɛ yɛka edwɛkɛ mgbole anzɛɛ yɛsia yɛka asɔneyɛlɛ mɔɔ yɛhye yɛgua yɛ ti anu la bieko. Ɔngyia noko kɛ yɛgyinla wɔ adenle titile bie azo. Gyihova ka kile yɛ kɛ yɛvi yɛ ahonle nu yɛyɛ asɔne. (Mateyu 6:7) Kɛ neazo la, wɔ tete Yizilayɛ, Hana yɛle abusua ngyegyelɛ bie anwo asɔne. Nzinlii, mɔɔ ye nyanelilɛ ne hakyile anyelielɛ la, ɔvile ye ahonle nu ɔyɛle asɔne ɔvale ɔyɛle Nyamenle mo.​—Kenga 1 Samoɛle 1:10, 12, 13, 26, 27; 2:1.

Nea adenle kɛnlɛma mɔɔ yɛnyia a! Yɛkola yɛka yɛ ngyegyelɛ nwo edwɛkɛ yɛkile Bɔvolɛ ne. Eza yɛkola yɛyeyɛ ye na yɛyɛ ye mo wɔ mɔɔ ɔyɛ la anwo. Nɔhalɛ nu, ɔnle kɛ yɛbu yɛ nye yɛgua adenlenyianlɛ zɛhae mɔɔ sonle bolɛ la azo.​—Kenga Edwɛndolɛ 145:14-16.