“Ɛnee Menli Dɔɔnwo Kpɔ Me”

ME ƐBƐLA DƐBA:

Bɛtetele me wɔ Santiago, mɔɔ le Chile suakpole ne kpalɛ bie mɔɔ nyiletane, basabasayɛlɛma yɛɛ amumuyɛ ɛbu zolɛ wɔ ɛkɛ la azo. Mekɛ mɔɔ ɛnee menyia ɛvolɛ nnu la, bɛhunle me papa. Ɛhye anzi, me mame nee nrenya bie mɔɔ ati yɛ se kpalɛ la dɛnlanle. Ɛnee ɔta ɔbo yɛ mu nwiɔ. Kɛzi ɛnee ɔbo yɛ wɔ zɔhane mekɛ ne anu la tɛbɔ me adwenle nu.

Mekɛ mɔɔ melɛnyi la, zɔhane subane ɛtane ne manle menyianle ahonle ɛtane. Ɛnee metie edwɛne mɔɔ yɛ dede, mebo nza kpole na ɔdwu mekɛ ne bie a meno nyiletane. Ɛnee meta me nee menli mɔɔ tɔne nyiletane la ko wɔ gua zo, na mekɛ dɔɔnwo ne ala bɛbɔle mɔdenle kɛ bɛku me. Mekɛ bie, basabasayɛlɛma bie mɔɔ yɛ nee bɛ ɛnga la bɔle nrenya bie mɔɔ anwo yɛ se la ɛkpa kɛ ɔhu me, noko ɔbodale me la menvale menriandile. Mekɛ bieko anu, menli ekpunli bie mɔɔ tɔne nyiletane la hwenle etu ziele me ti anwo na bɛbɔle mɔdenle kɛ bɛku me.

Wɔ 1996, me nye liele raalɛ bie mɔɔ bɛfɛlɛ ye Carolina la anwo, na yɛgyale wɔ 1998. Mekɛ mɔɔ yɛwole yɛ ra nrenya ne mɔɔ lumua la, ɛnee mesulo kɛ me subane ɛtane ne bamaa meayɛ kɛ me papa ne mɔɔ tetele me la na meayɛ me abusua ne amumuyɛ. Yemɔti memkpondɛle moalɛ wɔ ɛleka mɔɔ bɛmaa menli gyakyi nyiletane la. Bɛyɛle me ayile, noko yeanyɛ me ɛhwee. Ɛnee debie ekyi bie ala maa mefa ɛya; ɛnee mengola me nwo zo komo. Amaa meanyɛ me abusua ne amumuyɛ la, menyianle adwenle ɛtane kɛ meku me nwo. Me ti yɛle boɛ kɛ meangola meanyɛ zɔ la.

Wɔ ɛvolɛ dɔɔnwo anu ɛnee menze Nyamenle, noko ɛnee mekulo kɛ menyia Nyamenle anu diedi. Yemɔti mekɛ bie anu mengɔle asɔne bie. Mekɛ ne anu, ɛnee me ye nee Gyihova Alasevolɛ ɛlɛsukoa Baebolo ne. Ɛnee mekpɔ Alasevolɛ ne mɔ na mekɛ dɔɔnwo ne ala mebɔ bɛ aholoba. Noko ɛnee dahuu bɛtendɛ anzondwolɛ nu bɛkile me, ɔwɔ nuhua kɛ ɛnee me nye ɛnla kɛ bɛbayɛ zɔ ɛdeɛ.

Kenle ko bie, Carolina hanle hilele me kɛ megenga Edwɛndolɛ 83:18 wɔ me Baebolo ne anu. Zɔhane ngyehyɛnu ne ka ye wienyi kɛ Nyamenle duma a le Gyihova. Ɔzinle me nwo kɛ mezukoa nyamenle bie anwo debie wɔ me asɔne ne anu, noko tɛ Gyihova anwo debie la. Ɛvolɛ 2000 ne mɔlebɛbo, medame noko me nee Alasevolɛ ne mɔ bɔle ɔ bo zukoale Baebolo ne.

KƐZI BAEBOLO NE HAKYILE ME SUBANE LA:

Mekɛ mɔɔ melɛnyia anyuhɔlɛ la, me rɛle kyekyele wɔ mekɛ mɔɔ menwunle kɛ Gyihova le anwunvɔnezelɛ nee fakyɛ Nyamenle la. Kɛ neazo la, Baebolo ne ka Gyihova anwo edwɛkɛ wɔ Adendulɛ 34:6, 7 kɛ, ‘anwunvɔnezelɛ nee atiakunlukɛnlɛma Nyamenle, ɔnva ɛya mgbane mgbane, yɛɛ ɛhulolɛ kpundii nee nɔhalɛlilɛ ɛyi ye tɛkɛɛ. Ye ɛhulolɛ kpole ne keda apenle apenle nwo zo. Ɔfa amumuyɛ, mɛladonlɛ yɛɛ ɛtane ɔkyɛ.’

Ɔle zɔ bɔbɔ ɛdeɛ, noko ɛnee ɔnla aze kɛ mebava mɔɔ melɛsukoa la meabɔ me ɛbɛla. Ɛnee meze kɛ menrɛhola menrɛhomo me ahonle ɛtane ne azo. Mekɛ biala mɔɔ meangola nwolɛ gyima di la, Carolina fi ɛlɔlɛ nu maa me anwosesebɛ. Ɛnee ɔkakye me kɛ Gyihova nwu me mɔdenlebɔlɛ ne. Ye moalɛ ne manle menyianle anwosesebɛ kɛ ɔwɔ kɛ mekɔ zo mesɔ Gyihova anye, ɔnva nwo kɛ ɛnee mete nganeɛ kɛ ɔnrɛyɛ boɛ la.

Kenle ko bie, Alejandro, mɔɔ nee me sukoa la, hanle kɛ mengenga Galeehyeama 5:22, 23. Zɔhane ngyehyɛnu ne mɔ ka kɛ Nyamenle sunsum ne ma a le ‘ɛlɔlɛ, anyelielɛ, anzondwolɛ, abotane, atiakunlukɛnlɛma, kpalɛyɛlɛ, diedi, mɛlɛbɛnwoaze yɛ bɛnwozohomolɛ.’ Alejandro hanle kɛ zɔhane subane ne mɔɔ mebanyia la ɛngyi me anwosesebɛ zo, emomu, ɔgyi Nyamenle sunsum nwuanzanwuanza ne azo. Zɔhane nɔhalɛ edwɛkɛ ne manle mengakyile me adwenle bɔkɔɔ!

Nzinlii, mengɔle Gyihova Alasevolɛ nyianu mgbole bie. Ngyehyɛleɛ kpalɛ, bɔkɔbɔkɔyɛlɛ nee agɔnwolɛvalɛ mɔɔ menwunle ye wɔ ɛkɛ la manle menliele menlile kɛ menwu nɔhalɛ ɛzonlenlɛ ne. (Dwɔn 13:34, 35) Bɛzɔnenle me wɔ February 2001.

KƐZI YEBOA ME:

Gyihova ɛmaa megyakyi ahonle ɛtane na meyɛ awie mɔɔ kulo anzondwolɛ. Mete nganeɛ kɛ yeye me yevi ndɛtɛlɛ ne mɔɔ ɛnee mela nu la anu. Ɛnee menli dɔɔnwo kpɔ me, na tɛ mgbane ala ɔ. Noko, kɛkala, me nye die kɛ me nee me ye yɛɛ yɛ mra mrenya nwiɔ ne ɛlɛsonle Gyihova wɔ anzondwolɛ nu la.

Me nwo amra nee me gɔnwo mɔ dɛba ɛnlie ɛnli kɛ meyɛ nzenzaleɛ kpole zɛhae la. Ɔlua ɛhye ati, bɛ nuhua dɔɔnwo anye ɛlie kɛ bɛbazukoa Baebolo ne anu nɔhalɛ ne. Menyia adenle meboa awie mɔ noko memaa bɛnwu Gyihova. Nea kɛzi me nye ɛlie kɛ menwu kɛ Baebolo ne anu nɔhalɛ ne ɛhakyi bɛdabɛ noko bɛ subane la!