BAEBOLO KPUYIA MƆƆ BƐBUA

Nienwu a Abɔnsam vi rale a?

Nyamenle ambɔ Abɔnsam. Emomu, Nyamenle bɔle anwumabɔvolɛ ne mɔɔ nzinlii yɛle ɔ nwo Abɔnsam, mɔɔ eza bɛfɛlɛ ye Seetan la. Gyisɛse hilele kɛ mekɛ bie ɛnee Abɔnsam di nɔhalɛ na ɛtane ɛnle ɔ nwo. Ɛhye ati, mɔlebɛbo ne, ɛnee Abɔnsam le Nyamenle anwumabɔvolɛ ralɛ mɔɔ le tenlene la.—Kenga Dwɔn 8:44.

Kɛzi anwumabɔvolɛ kola yɛ Abɔnsam ɛ?

Anwumabɔvolɛ ne mɔɔ yɛle ɔ nwo Abɔnsam la dwazole tiale Nyamenle na ɔmanle alesama nwiɔ ne mɔɔ lumua la bokale ɔ nwo. Ɛhye ati, ɔyɛle ɔ nwo Seetan, mɔɔ kile “Dwazotiavolɛ” la.—Kenga Mɔlebɛbo 3:1-5; Yekile 12:9.

Kɛmɔ ɔde wɔ abɔdeɛ mɔɔ ze nrɛlɛbɛ afoa nu la, anwumabɔvolɛ ne mɔɔ yɛle ɔ nwo Abɔnsam la ɛnee lɛ fanwodi kɛ ɔbayɛ mɔɔ le kpalɛ anzɛɛ ɛtane la, noko ɔhulole kɛ bɛkɛzonle ye. Anyunlunyia nwo ɛhulolɛ mɔɔ ɔnyianle la yɛle kpole dɛlale ɛhulolɛ mɔɔ ɔnyianle kɛ ɔkɛzɔ Nyamenle anye la.—Kenga Mateyu 4:8, 9; Gyemise 1:13, 14.

Kɛzi Abɔnsam ɛlɛkɔ zo ali alesama anwo zo tumi ɛ? Asoo ɔwɔ kɛ ɛsulo ye? Ɛbahola wɔanwu kpuyia ɛhye mɔ mualɛ wɔ Baebolo ne anu.