Kɛzi Yɛbade Yizikeɛle Ngapezo Ne Mɔ Abo La

NGILENU​—DUZU A LE NGAPEZO?

Wɔ Baebolo ne anu, mɔɔ Hibulu yɛkpɔkɛ na·vaʼʹ mɔɔ bɛhile ɔ bo “ngapezo” la kile titili la a le sunsum nu edwɛkɛ, ndɛnebualɛ, ɛbɛlabɔlɛ nwo ngilehilelɛ anzɛɛ Nyamenle mɛla mɔɔ bɛbɔ ye nolo la. Eza ɔkola ɔkile debie mɔɔ bazi kenle bie mɔɔ bɛbɔ ye nolo. Ndenle ngakyile ɛhye mɔ mɔɔ Nyamenle dua zo ye debie kile la biala bie wɔ Yizikeɛle ngapezo ne mɔ anu.​—Yiz. 3:10, 11; 11:4-8; 14:6, 7; 37:9, 10; 38:1-4.

KƐZI Ɔ SA HANLE YE LA

• 

  ƐNYELƐZODEƐNWUNLƐ

• 

  NDONWO

• 

  YƐKILE

Ɛnyelɛzodeɛnwunlɛ, ndonwo, mrɛlɛ yɛɛ ngapezo mɔɔ bɛyɛ nwolɛ yɛkile la a wɔ ye buluku ne anu a.

KƐZI BƐRALE NU LA

Ɔdwu mekɛ ne bie a ye ngapezo ne mɔ bie kola ba nu fane dɔɔnwo. Kɛ neazo la, nɔhalɛ ɛzonlenlɛ mɔɔ bɛfa bɛazie ɛkɛ ne bieko la rale nuhua ekyi wɔ mekɛ mɔɔ Nyamenle menli ne ziale hɔle Ɛwɔkɛ Azɛlɛ ne azo la. Noko kɛ mɔɔ bɛhilehile nu wɔ Tile 9 ne la, ngapezo zɔhane anu dɔɔnwo ɛra nu bieko ɛnɛ na bɛbara nu bieko kenle bie.

Dɛba ne, yɛbule ye ngapezo ne anu ninyɛne dɔɔnwo kɛ bɛle edwɛkɛ bie mɔ mɔɔ gyi ɛkɛ maa debie kpole mɔɔ bara nu kenle bie la anwo ngyinlazo. Noko buluku ɛhye ɛnga kɛ bɛle ngapezo mɔɔ bɛbara nu kenle bie, kyesɛ nwolɛ ngyinlazo bie wɔ Ngɛlɛlera ne anu kolaa na yeaha ye zɔ.a Emomu, ɔbahwe adwenle yeahɔ Yizikeɛle ngapezo ne anu dɔɔnwo mɔɔ ɛlɛba nu kpole la azo. Eza ɔbaha mɔɔ yɛsukoa yɛfi Yizikeɛle edwɛkɛ ne, menli ne, ɛleka yɛɛ edwɛkɛ mɔɔ sisile anu la anwo edwɛkɛ.