Duzu Ati A Gyihova Alasevolɛ Fi Ɛbulɛ Nu Twe Bɛ Nwo Fi Maanlehulolɛ Nwo A?
Gyihova Alasevolɛ bu arane ngakyile nee bɛ sɛkɛlɛneɛ ne mɔ. Yɛdie yɛto nu kɛ bie a menli bakpa kɛ bɛbaha ndane, bɛbabiza fɛlɛnra ahye anzɛɛ bɛbado maanle edwɛne.
Noko, Gyihova Alasevolɛ ɛnyɛ ninyɛne ɛhye mɔ ɔluakɛ yɛdie yɛdi kɛ ninyɛne ɛhye mɔ nee mɔɔ yɛzukoa wɔ Baebolo ne anu la ɛnle ko. Yɛdie awie mɔ kpɔkɛzilɛ yɛto nu, na yɛkulo kɛ bɛdie yɛ ɛdeɛ noko bɛto nu.
Wɔ edwɛkɛ ɛhye anu
Baebolo ngyinlazo boni mɔ a maa yɛyɛ zɔ a?
Baebolo ngyinlazo nwiɔ ɛhye mɔ a maa yɛyɛ zɔ a:
Nyamenle angomekye a ɔfɛta kɛ yɛsonle ye a. Baebolo ne ka kɛ: “Gyihova wɔ Nyamenle ne a ɔwɔ kɛ ɛsonle ye a, na ɔ ngome ala a ɔwɔ kɛ ɛkoto ye a.” (Luku 4:8) Edwɛkɛ mɔɔ wɔ maanle edwɛne nee ndane mɔɔ bɛka la anu la maa awie bɔ ɛwɔkɛ kɛ ɔbahulo ye maanle ne yeadɛla debie biala. Ɔti Gyihova Alasevolɛ bu ye kɛ ɔnle kpalɛ kɛ bɛbayɛ ninyɛne zɛhae mɔ.
Eza Gyihova Alasevolɛ bu ye kɛ fɛlɛnra mɔɔ bɛbiza ye ahye la le ɛzonlenlɛ anzɛɛ awozonlezonlenlɛ mɔɔ Baebolo ne se ɔnle kpalɛ la. (1 Kɔlentema 10:14) Tetedwɛkɛ kɛlɛvoma bie mɔ ka kɛ fɛlɛnra le ɛzonlenlɛ nwo sɛkɛlɛneɛ. Tetedwɛkɛ kɛlɛvo Carlton J. H. Hayes hɛlɛle kɛ, “Maanlehulolɛ le kɛ ɛzonlenlɛ la na ye sɛkɛlɛneɛ nee nwolɛ debie titili mɔɔ bɛsonle ye la a le fɛlɛnra ne.”a Kɛlɛvolɛ Daniel P. Mannix hanle kɛ: alimoa “Kilisienema ambɔ afɔle ammaa . . . [Wulomu] maanle kpanyinli ne ananze ne—ɛnɛ ɔle kɛ awie ɛkpo kɛ ɔbabiza fɛlɛnra ahye la.”b
Gyihova Alasevolɛ ɛmbiza fɛlɛnra ahye ɛdeɛ, noko yɛnzɛkye ye, yɛnyela ye yɛɛ yɛnyɛ debie biala mɔɔ kile kɛ yɛmbu fɛlɛnra ne anzɛɛ maanle sɛkɛlɛneɛ gyɛne biala la.
Menli kɔsɔɔti le ko wɔ Nyamenle anye zo. (Gyima ne 10:34, 35) Baebolo ne ka kɛ Nyamenle maanle “menli mɔɔ wɔ maanle kɔsɔɔti anu la luale sonla ko anwo zo rale.” (Gyima ne 17:26) Ɛhye ati, Gyihova Alasevolɛ die di kɛ ɔnle kpalɛ kɛ awie babu menli ekpunli bie anzɛɛ maanle bie anu amra kɛ bɛle kpalɛ bɛtɛla awie mɔ. Yɛdi menli kɔsɔɔti eni ɔnva nwo ɛleka mɔɔ bɛvi anzɛɛ bɛde la.—1 Pita 2:17.
Na saa mɛla ka kɛ yɛyɛ ninyɛne ɛhye mɔ ɛ?
Gyihova Alasevolɛ ɛndwazo ɛntia arane. Yɛdie yɛdi kɛ arane ne mɔ boka “ngyehyɛleɛ mɔɔ Nyamenle” ɛmaa nwolɛ adenle la anwo. (Wulomuma 13:1-7) Eza yɛdie yɛdi kɛ ɔwɔ kɛ Kilisienema bu tumivolɛma.—Luku 20:25.
Na saa arane mɛla bie tia Nyamenle mɛla ɛ? Wɔ tɛnlabelɛ bie mɔ anu, bɛbahola bɛalua mɛla adenle zo bɛazɛlɛ arane ne kɛ ɔyɛ nzenzaleɛ ɔmaa bɛ.c Saa bɛyɛ nzenzaleɛ a ɔnrɛyɛ boɛ a, Gyihova Alasevolɛ fi ɛbulɛ nu tie “Nyamenle kɛ tumivolɛ na tɛ menli ɔ.”—Gyima ne 5:29.
Asoo Gyihova Alasevolɛ gyi maanyɛlɛ anzɛɛ menli ekpunli bie anzi ɔ?
Kyɛkyɛ. Gyihova Alasevolɛ ɛngyinla afoa biala wɔ eku anzɛɛ maanyɛlɛ bie edwɛkɛ nu. Yɛnga ndane yɛngile maanle bie, yɛmbiza fɛlɛnra ahye yɛɛ yɛndo maanle edwɛne, tɛ kɛ yɛgyi maanyɛlɛ eku bie anzi la ati ɔ. Emomu, yɛfa mɔɔ yɛzukoa wɔ Baebolo ne anu wɔ ninyɛne ɛhye mɔ anwo la yɛbɔ yɛ ɛbɛla la ati ɔ.