Bɛgya Nɔhalɛ “Keleseɛnenli” Ala Asoo Nrɛlɛbɛ Tɛbɔ Nu?

Nyamenle azonvolɛ bie mɔ mɔɔ bɛtɛgyale la ɛha edwɛkɛ zɛhae bie. Bɛze kɛ Gyihova kulo kɛ ye azonvolɛ gya “Keleseɛnenli,” kile kɛ ɔwɔ kɛ bɛgya awie mɔɔ ɔle nɔhalɛ Keleseɛnenli la. (1 Kɔlentema 7:39) Ɛnee duzu ati a Keleseɛnema bie mɔ ka edwɛkɛ ɛhye mɔ a?

DEƐMƆTI ƆBA YE ZƆ LA

Bie a Keleseɛnema mɔɔ ka edwɛkɛ ɛhye mɔ la te nganeɛ kɛ mediema mraalɛ mɔɔ bɛtɛgyale la zonle tɛla mediema mrenya. Ɛhye le zɔ wɔ maanle dɔɔnwo anu. Kɛ neazo la wɔ Korea, Keleseɛnema mɔɔ bɛtɛgyale la anu ɛya ko ngyɛnu 57 le mraalɛ yɛɛ 43 le mrenya. Yɛɛ wɔ Colombia, Keleseɛnema mɔɔ bɛtɛgyale la anu ɛya ko ngyɛnu 66 le mraalɛ yɛɛ 34 le mrenya.

Wɔ ɛleka bie mɔ, awovolɛ mɔɔ bɛnle Alasevolɛ la die ezukoa dɔɔnwo anzɛɛ ahyɛlɛdeɛ mɔɔ ye bolɛ yɛ se la wɔ mekɛ mɔɔ bɛlɛgya bɛ mra mraalɛ la. Bie a mediema mrenya mɔɔ bɛtɛgyale la ɛnrɛhola ɛnrɛdɔ ahyɛlɛdeɛ ɛhye mɔ. Ɔlua ɛhye ati, mediema mraalɛ bie mɔ ɛngola ɛnnwu ye saa bɛbanyia Adiema nrenya agya bɛ a.a

GYIHOVA ANU ANWODOZO HYIA

Saa wɔde nganeɛ zɛhae bie ɛlɛ a, ɛbahola wɔanyia anwondozo kɛ Gyihova te wɔ tɛnlabelɛ ne abo yɛɛ ɔze kɛzi ɛte nganeɛ la.​—2 Edwɛkɛsisilɛ 6:29, 30.

Noko, Gyihova ɛmaa yɛ mɛla wɔ Baebolo ne anu kɛ yɛgya Awulae anu ala. Kɛmɔti ɛ? Ɔboalekɛ ɔze mɔɔ ɔle kpalɛ ɔmaa yɛ la yɛɛ ɔkulo kɛ ɔbɔ yɛ nwo bane. Ɔngulo kɛ yɛsi kpɔkɛ ɛtane mɔɔ bagyegye yɛ anzɛɛ ɔnrɛmaa yɛ nye ɛnrɛlie a. Wɔ Nihɛmaya mekɛ zo ɛnee Dwuuma dɔɔnwo ɛlɛgya mraalɛ mɔɔ bɛnzonle Nyamenle la. Yemɔti Nihɛmaya hanle Sɔlɔmɔn neazo ɛtane ne anwo edwɛkɛ. “Ye Nyamenle ne hulole ye na ɔyɛle ye Yizilayɛ maanle ne kɔsɔɔti belemgbunli. Noko akee maanle maanle gyɛne nu mraalɛ ɛgyalɛ manle ɔdaye bɔbɔ ɔyɛle ɛtane.” (Nihɛmaya 13:23-26) Gyihova ze kɛ ye ngakyelɛ ne mɔ le kpalɛ maa yɛ, yemɔti a yeha yehile Keleseɛnema kɛ bɛgya Awulae anu ala la. (Edwɛndolɛ 19:7-10; Ayezaya 48:17, 18) Yɛda ye ase kɛ ɔtu yɛ folɛ mɔɔ ɛlɔlɛ wɔ nu na ɔle kpalɛ la. Saa yɛtie Gyihova kɛ yɛ Tumivolɛ a, yɛdie yɛto nu kɛ ɔlɛ adenle ɔkile yɛ mɔɔ ɔwɔ kɛ yɛyɛ la.​—Mrɛlɛbulɛ 1:5.

Nɔhalɛ nu, ɛmkpondɛ kɛ ‘ɛ nee bɛdabɛ mɔɔ bɛnlie Kelaese bɛnli la tu,’ kile kɛ, ɛbagya awie mɔɔ ɔngulo Gyihova la. Zɔhane sonla ne bahola amaa wɔagyakyi Nyamenle ɛzonlenlɛ. (2 Kɔlentema 6:14) Nyamenle folɛdulɛ boa dahuu, yɛɛ Keleseɛnema dɔɔnwo ɛvi nrɛlɛbɛ nu ɛzi kpɔkɛ ɛnɛ kɛ bɛbadie Gyihova. Noko, bie mɔ ɛnyɛ zɔ.

NRƐLƐBƐ TƐBƆ NU

Adiema raalɛ bie mɔɔ wɔ Australia mɔɔ bɛfɛlɛ ye Maggy la bɔle ɔ bo nee awie mɔɔ ɔnle nɔhalɛ Keleseɛnenli la dule.b Ɔse: “Ɛnee mengɔ debiezukoalɛ amaa meahola meahɔ ye ɛkɛ. Me sunsum nu gyinlabelɛ zɛkyele bɔkɔɔ.” Bɛlɛra bie mɔɔ wɔ India mɔɔ bɛfɛlɛ ye Ratana la bɔle ɔ bo kɛ ɔ nee ɔ gɔnwo mɔɔ ɔ nee ye kɔ sukulu mɔɔ ɔlɛsukoa Baebolo ne la tu. Noko, ɔ gɔnwo ne zukoale Baebolo ne ala amaa yeahola ɔ nee ye adu. Awieleɛ ne, bɛlɛra ne gyakyile Gyihova ɛzonlenlɛ hɔle asɔne fofolɛ amaa yeahola yeagya kpavolɛ ne.

Ndenguè mɔɔ ɔvi Cameroon la gyale awie mɔɔ ɛnzonle Gyihova la ɛnee yeli ɛvolɛ 19. Kolaa na bɛagya la, nrenya ne bɔle ye ɛwɔkɛ kɛ ɔbamaa yeazonle Gyihova dahuu. Noko akee, bɛgyale la anzi dapɛne nwiɔ pɛ, nrenya ne hanle hilele ye kɛ ɔnrɛmaa ɔnrɛhɔ debiezukoalɛ. Ɔse: “Me nwo yɛle me koonwu na menzule. Menwunle kɛ menlɛ me ɛbɛlabɔlɛ zo tumi. Ɛnee medi nyane dahuu.”

Ɔle nɔhalɛ kɛ Keleseɛnema bie mɔ ɛgya awie mɔɔ ɛnzonle Gyihova noko ɔ ti ɛnyɛ se yɛɛ ɔte edwɛkɛ bo. Noko akee, saa wɔ bokavolɛ mɔɔ ɛnzonle Gyihova la ati ɛnyɛ se bɔbɔ a, kɛzi ɔbaha agɔnwolɛvalɛ mɔɔ ɛ nee Gyihova lɛ la ɛ? Saa ɛnwu kɛ wɔandie folɛdulɛ mɔɔ ɔvale ɔmanle wɔ amaa ɛ nye alie la a, kɛzi ɛbade nganeɛ ɛ? Mɔɔ hyia kpalɛ la, kɛzi Gyihova bade nganeɛ wɔ mɔɔ wɔyɛ la anwo ɛ?​—Mrɛlɛbulɛ 1:33.

Mediema mrenya nee mraalɛ mɔɔ bɛwɔ ewiade amuala mɔɔ bɛdie Gyihova folɛdulɛ ne na bɛgya nɔhalɛ “Kelesɛenenli” la ɛnwu kɛ ɔle kpɔkɛzilɛ kpalɛ. Mediema mrenya nee mraalɛ mɔɔ bɛtɛgyale la ɛbɔ kpɔkɛ kɛ amaa Gyihova anye alie la, bɛbagya awie mɔɔ sonle ye la. Ɛnee Michiko mɔɔ vi Japan la ɛbɔ kpɔkɛ kɛ ɔbadie Nyamenle ɔnva nwo kɛ ɔ nwo amra bɔle mɔdenle kɛ bɛmaa yeagya awie mɔɔ ɔnzonle Gyihova la. Ɛnee ɔnla aze kɛ ɔbanwu kɛ ɔ gɔnwo mɔ bie ɛlɛgya nɔhalɛ Keleseɛnema na yemɔ bɛtɛgyale ye la. Ɔse: “Ɛnee meta meka mekile me nwo kɛ kɛmɔ Gyihova le ‘anyelielɛ Nyamenle’ la ati, yɛ anyelielɛ ne ɛngyi kɛ yɛgya anzɛɛ yɛtɛgyale la azo. Eza medie medi kɛ ɔmaa yɛnyia mɔɔ yɛkulo la. Yemɔti saa yɛkulo kɛ yɛgya na yɛtɛnyianle awie a, ɔle kpalɛ kɛ yɛbahendɛ.” (1 Temɔte 1:11) Nzinlii, Michiko nyianle adiema nrenya kɛnlɛma bie gyale ye, na ɔ nye die kɛ ɔdiele Gyihova folɛdulɛ ne la.

Mediema mrenya bie mɔ noko ɛlɛkendɛ kɛ bɛbanyia awie mɔɔ fɛta la bɛagya ye. Kɛ neazo la, ɛnee ɔdwu mekɛ ne bie a Bill mɔɔ vi Australia la anye die mraalɛ mɔɔ bɛnle mediema la anwo. Noko akee, yeanva bɛ agɔnwolɛ kyengye ɔluakɛ ɛnee ɔngulo kɛ ‘ɔ nee awie mɔɔ ɔnlie Kelaese ɔnli la badu.’ Ɛvolɛ dɔɔnwo anu, ɛnee ɔ nye die mediema mraalɛ ekyi anwo, noko ɛnee bɛ nye ɛnlie ɔ nwo. Bill hendɛle ɛvolɛ 30 kɔkpula kɛ ɔnyianle Keleseɛne raalɛ mɔɔ ɔ nee ye lɛ bodane ko la. Ɔse: “Metɛnunle me nwo. Menyia nyilalɛ ɔluakɛ yɛbɔ nu yɛkɔ daselɛlilɛ, yɛsukoa debie na yɛsonle. Me nye die kɛ mekola me nee me ye agɔnwo mɔ tu la ɔluakɛ bɛ muala bɛsonle Gyihova. Yɛfa Baebolo ngyinlazo yɛsiezie yɛ agyalɛ ne.”

MEKƐ MƆƆ ƐLƐKENDƐ GYIHOVA LA

Mekɛ mɔɔ ɛlɛ Gyihova folɛdulɛ ne anu anwondozo na ɛlɛkendɛ kɛ ɛbanyia nrenya anzɛɛ raalɛ mɔɔ sonle ye la, duzu a ɛbahola wɔayɛ a? Ɛbahola wɔazuzu deɛmɔti ɛtɛgyale la anwo. Saa ɛte nganeɛ kɛ ɛkulo kɛ ɛdi Gyihova mɛla zo la ati a, ɛnee ɛbahola wɔanyia anwodozo kɛ ɛhye maa ɔ nye die. (1 Samoɛle 15:22; Mrɛlɛbulɛ 27:11) Eza kɔ zo sɛlɛ Gyihova dahuu na ka kɛzi ɛte nganeɛ la kile ye. (Edwɛndolɛ 62:8) Mekɛ mɔɔ ɛlɛbɔ mɔdenle wɔaho wɔatia sɔnea nee atiakunluwɔzo ɛtane la, ɛ nee Gyihova agɔnwolɛvalɛ ne anu bamia alehyenlɛ biala. Ɛbahola wɔanyia anwodozo kɛ Gyihova dwenle mɔɔ ɛkulo nee wɔ ngyianlɛ nwo ɔluakɛ ɛsonle bolɛ ɛmaa ye. Ɔtɛbɔle awie biala ɛwɔkɛ kɛ ɔbamaa yeanyia kunli anzɛɛ yelɛ. Noko saa agyalɛ a hyia wɔ kpalɛ a, Gyihova ze adenle kpalɛ mɔɔ ɔdua zo a ɔbali wɔ ngyianlɛ nwo gyima la.​—Edwɛndolɛ 145:16; Mateyu 6:32.

Ɔdwu mekɛ ne bie a ɛbade nganeɛ kɛ Devidi mɔɔ ɔhanle kɛ: “O [Gyihova], ka ɛ nwo bua me! Me ɛnwomenle ɛwie! Mmafa ɛ nye ɛfea me” la. (Edwɛndolɛ 143:5-7, 10) Mmamaa ɛ sa nu to. Maa Gyihova mekɛ maa ɔhile wɔ mɔɔ ɔkulo kɛ ɛyɛ la. Kenga Baebolo ne na dwenledwenle mɔɔ wɔgenga la anwo fa tie Gyihova. Ɛhye bamaa wɔanwu mɔɔ Gyihova kpondɛ kɛ ɛyɛ la nee kɛzi yeboa ye azonvolɛ wɔ tete ne la. Saa ɛtie ye a, ɔbamaa wɔava anwondozo wɔahɔ zo wɔadie ye.

Duzu bieko a ɛbahola wɔayɛ amaa ɛ nye alie na wɔayɛ dɔɔnwo wɔ mekɛ mɔɔ ɛtɛgyale la ɛ? Ɛbahola wɔabɔ mɔdenle wɔamaa agɔnwolɛvalɛ mɔɔ ɛ nee Gyihova lɛ la anu amia na wɔanyia duma kpalɛ. Ɛbahola noko wɔazukoa kpalɛyɛlɛ, wɔayɛ gyima ɛsesebɛ, wɔayɛ awie mɔɔ bɛkola bɛwolo wɔ na ɔdi nɔhalɛ ɔmaa Gyihova la. Subane ɛhye mɔ hyia na agyalɛ ayɛ anyelielɛ. (Mɔlebɛbo 24:16-21; Wulutu 1:16, 17; 2:6, 7, 11; Mrɛlɛbulɛ 31:10-27) Fa Belemgbunlililɛ ne dumua wɔ ɛbɛlabɔlɛ nu na yɛ dɔɔnwo wɔ daselɛlilɛ nee asafo ne anu. Ninyɛne ɛhye mɔ babɔ ɛ nwo bane na wɔanzi kpɔkɛ ɛtane. Bill ka mekɛ mɔɔ ɛnee ɔtɛgyale la anwo edwɛkɛ kɛ: “Bɛpɛle nu ndɛndɛ! Menvale mekɛ ne menzonlenle Gyihova kɛ adekpakyelɛnli.”

Gyihova mɛla mɔɔ ɔse yɛgya nɔhalɛ “Keleseɛnenli” ala la ɛtɛkpale nwo. Saa yɛgya nɔhalɛ Keleseɛnenli a, yɛwula Gyihova anyunlunyia na yɛ nye balie. Baebolo ne se: “Nyilalɛ ɛha sonla ne mɔɔ sulo [Gyihova], na ɔ nye die ye mɛla ne mɔ anwo la. Ezukoa nee anwonyia wɔ ye sua nu; ye tenleneyɛlɛ ne wɔ ɛkɛ ne dahuu.” (Edwɛndolɛ 112:1, 3) Yemɔti bɔ kpɔkɛ kɛ ɛbadie Nyamenle mɛla mɔɔ ɔse bɛgya nɔhalɛ “Keleseɛnenli” la.