Fa Nɔhalɛlilɛ Boa Kelaese Amediema Ne Mɔ

1, 2. (a) Mrɛlɛ boni a Gyisɛse bule hilele ɔ gɔnwo mɔ a? (Nea mɔlebɛbo nvoninli.) (b) Duzu a ɔwɔ kɛ yɛnwu ye wɔ mboane nee mbɔnkye ne anwo ɛrɛlɛ ne anwo a?

ƐNEE Gyisɛse ɛlɛka debie mɔɔ yɛ anyelielɛ kpalɛ la anwo edwɛkɛ ahile ɔ gɔnwo mɔ, Pita, Andelu, Gyemise nee Dwɔn. Mekɛ mɔɔ ɔbule akɛlɛ nɔhavo nee nrɛlɛbɛvolɛ ne, mbɛlɛra bulu ne, yɛɛ nzunza ne anwo mrɛlɛ ne mɔ ɔwiele la, Gyisɛse bule ɛrɛlɛ fofolɛ hilele ɔ gɔnwo mɔ. Ɔhanle mekɛ mɔɔ “Sonla Ra” ne babua “aleɛabo amra amuala” ndɛne la anwo edwɛkɛ. Ɔhanle kɛ “Sonla Ra” ne bahyɛ menli nu ekpunli nwiɔ, ɔhanle ekpunli ko anwo edwɛkɛ kɛ mboane yɛɛ ko ne noko anwo edwɛkɛ kɛ mbɔnkye la. Akee ɔhanle ekpunli bie mɔɔ tɔ zo nsa mɔɔ bɛ nwo hyia kpalɛ la anwo edwɛkɛ, Belemgbunli ne ‘amediema’ ne mɔ.​—Kenga Mateyu 25:31-46.

² Kɛmɔ ɛzoanvolɛ ne mɔ yɛle la, Gyihova azonvolɛ mɔɔ wɔ ɛkɛ ɛnɛ la noko anye ɛlie ɛrɛlɛ ɛhye anwo ɔluakɛ ɔfane menli ngoane nwo. Gyisɛse hanle kɛ bie mɔ banyia dahuu ngoane yɛɛ bɛbazɛkye bie mɔ. Ɛhye ati a ɔhyia kpalɛ kɛ yɛnwu mɔɔ ɛrɛlɛ ne kile nee mɔɔ ɔwɔ kɛ yɛyɛ na yɛanyia dahuu ngoane la. Yemɔti wɔ edwɛkɛ ɛhye anu, yɛbabua kpuyia ɛhye mɔ: Kɛzi Gyihova ɛmaa yɛde ɛrɛlɛ ɛhye abo ɛ? Kɛzi yɛnwu kɛ ɛrɛlɛ ne twe adwenle kɔ edwɛkɛhanlɛ gyima ne azo ɛ? Nwane mɔ a ɔwɔ kɛ ka edwɛkɛ ne a? Na kɛmɔti a ɔhyia kɛ menli di nɔhalɛ maa “Belemgbunli” ne nee ɔ “mediema” ne mɔ wɔ mekɛ ɛhye anu ɛ?

KƐZI GYIHOVA ƐMAA YƐDE ƐRƐLƐ NE ABO Ɛ?

3, 4. (a) Duzu a ɔwɔ kɛ yɛnwu ye na yɛade ɛrɛlɛ ɛhye abo a? (b) Wɔ 1881 ne anu, kɛzi Watch Tower ne hilehilele ɛrɛlɛ ɛhye anu ɛ?

³ Saa yɛbade mboane nee mbɔnkye ne anwo ɛrɛlɛ ne abo a, ɔwɔ kɛ yɛnwu kɛ (1) nwane a le “Sonla Ra” anzɛɛ “Belemgbunli” ne, nwane mɔ a le mboane ne nee mbɔnkye ne, yɛɛ nwane mɔ a le Belemgbunli ne ‘amediema’ ne mɔ? (2) mekɛ boni a “Sonla Ra” ne bahyɛ bɛ nu anzɛɛ babua mboane ne nee mbɔnkye ne ndɛne a? na (3) kɛmɔti a bɛse bie mɔ le mboane na bie mɔ le mbɔnkye ɛ?

⁴ Wɔ 1881 ne anu, Watch Tower ne hanle kɛ “Sonla Ra” ne anzɛɛ “Belemgbunli” ne a le Gyisɛse. Na ɔhilehilele nu kɛ tɛ Belemgbunli ne ‘amediema’ ne mɔ a le bɛdabɛ mɔɔ bɛ nee Gyisɛse bali tumi wɔ anwuma la angome, emomu, menli noko mɔɔ bɛbali munli na bɛadɛnla azɛlɛ ye azo la. Watch Tower ne hanle kɛ bɛbahyɛ menli ne anu wɔ Kelaese Ɛvolɛ Apenle Ko Tumililɛ Ne Anu na menli mɔɔ bazukoa Nyamenle ɛlɔlɛ ne wɔ debie biala mɔɔ bɛyɛ anu la a bɛbabu bɛ kɛ bɛle mboane a.

5. Wɔ 1923 ne anu, kɛzi Nyamenle menli dele ɛrɛlɛ ne abo ɛ?

⁵ Nzinlii, Gyihova boale ye menli ɔmanle bɛdele ɛrɛlɛ ɛhye abo wienyi. Wɔ 1923, October 15, Watch Tower ne hanle kɛ “Sonla Ra” ne a le Gyisɛse. Akee ɔvale Baebolo ngyehyɛnu ɔhilehilele nu kɛ “mediema” ne mɔ mɔɔ wɔ ɛrɛlɛ ne anu la a le menli mɔɔ Gyisɛse nee bɛ bali tumi la, na ɛnee bɛ muala bɛwɔ anwuma wɔ Ɛvolɛ Apenle Ko Tumililɛ ne anu. Eza ɔhanle kɛ mboane ne gyi ɛkɛ maa bɛdabɛ mɔɔ bɛbadɛnla azɛlɛ ye azo wɔ Gyisɛse nee ɔ mediema ne mɔ tumililɛ ne abo la. Kɛmɔ ɛrɛlɛ ne hanle kɛ menli ɛhye mɔ boa Belemgbunli ne amediema ne mɔ la ati, ɔwɔ kɛ bɛ nu ɛhyɛlɛ anzɛɛ ndɛnebualɛ ne si wɔ mekɛ mɔɔ Kelaese amediema ɛhye mɔ mɔɔ bɛkpokpa bɛ tɛbɔ azɛlɛ ye azo la kolaa na Ɛvolɛ Apenle Ko Tumililɛ ne abɔ ɔ bo. Edwɛkɛ ne eza hanle kɛ mboane ne bayɛ bɛdabɛ mɔɔ bɛdie Gyisɛse bɛdi na bɛdie bɛdi kɛ Belemgbunlililɛ ne bamaa bɛ nwo adɔ bɛ la.

6. Wɔ 1995 ne anu, kɛzi ɛrɛlɛ ne anwo ndelebɛbo mɔɔ yɛlɛ la hakyile ɛ?

⁶ Wɔ ɛvolɛ dɔɔnwo anu, ɛnee yɛsuzu kɛ bɛbalua edwɛkɛhanlɛ gyima ne azo bɛabua menli ndɛne wɔ awieleɛ mekɛ ɛhye anu. Saa bɛtie yɛ edwɛkɛ ne a, ɛnee ɔkile kɛ bɛle mboane na saa bɛkpo edwɛkɛ ne a ɔkile kɛ bɛle mbɔnkye. Noko wɔ 1995 anu, kɛzi ɛnee yɛte ɛrɛlɛ ne abo la hakyile. The Watchtower ne vale Mateyu 24:29-31 (kenga) dole Mateyu 25:31, 32 (kenga) anwo na ɔhilehilele nu kɛ Gyisɛse babua menli ndɛne wɔ anwongyelelɛ kpole ne anu wɔ mekɛ mɔɔ Sonla Ra ne bara wɔ ye “anyunlunyia” nu la.a

7. Duzu a ɛrɛlɛ ne kile a?

⁷ Ɛnɛ, yɛde mboane nee mbɔnkye ne anwo ɛrɛlɛ ne abo wienyi. Yɛze kɛ “Sonla Ra” anzɛɛ “Belemgbunli” ne a le Gyisɛse. Belemgbunli ne ‘amediema’ ne mɔ a le bɛdabɛ mɔɔ bɛva sunsum nwuanzanwuanza ne bɛkpokpa bɛ mɔɔ bɛ nee Gyisɛse bali tumi wɔ anwuma la. (Wulomuma 8:16, 17) “Mboane” ne nee “mbɔnkye” ne a le menli mɔɔ bɛvi maanle kɔsɔɔti anu la. Bɛbabua bɛ ndɛne wɔ mekɛ mɔɔ anwongyelelɛ kpole ne ɛlɛkɔ ye awieleɛ la, ɔnrɛhyɛ na ɛhye abɔ ɔ bo. Yɛɛ yɛze kɛ Gyisɛse babua menli ndɛne ɔlua mɔɔ bɛbayɛ bɛamaa menli mɔɔ bɛkpokpa bɛ mɔɔ bɛtɛbɔ azɛlɛ ye azo la azo. Yɛda Gyihova ase kɛ yemaa yɛde ɛrɛlɛ ɛhye nee mrɛlɛ mɔɔ ɛha mɔɔ wɔ Mateyu 24 nee 25 abo la!

ƐRƐLƐ NE MAA YƐNWU KƐ EDWƐKƐHANLƐ GYIMA NE ANWO HYIA KPALƐ

8, 9. Duzu ati a Gyisɛse vɛlɛle mboane ne “menli kpalɛ” ɛ?

⁸ Gyisɛse anga edwɛkɛhanlɛ gyima ne anwo edwɛkɛ wɔ mboane nee mbɔnkye ɛrɛlɛ ne anu. Yemɔti kɛzi yɛnwu kɛ ɛrɛlɛ ne kile kɛ edwɛkɛhanlɛ gyima ne anwo hyia kpalɛ ɛ?

⁹ Amaa yɛanwu mualɛ ne la, ɔwɔ kɛ yɛkakye kɛ ɛnee Gyisɛse ɛlɛbu ɛrɛlɛ ne ava ahile debie. Ɛnee tɛ mboane nee mbɔnkye kpalɛ a ɔlɛka bɛ nwo edwɛkɛ a. Zɔhane ala a yeanga kɛ ɔwɔ kɛ awie biala mɔɔ bɛbabua ye ndɛne kɛ boane la maa menli mɔɔ bɛkpokpa bɛ la aleɛ nee adɛladeɛ, ɔnea bɛ wɔ mekɛ mɔɔ bɛnde kpɔkɛ, anzɛɛ ɔkɔkpɔla bɛ wɔ efiade a. Gyisɛse hanle menli mɔɔ bɛle kɛ mboane la anwo edwɛkɛ kɛ “menli kpalɛ” ɔluakɛ bɛbu menli mɔɔ bɛkpokpa bɛ la kɛ Kelaese amediema na bɛdi nɔhalɛ bɛmaa menli mɔɔ bɛkpokpa bɛ wɔ awieleɛ mekɛ ɛhye mɔɔ anu yɛ se la anu la.​—Mateyu 10:40-42; 25:40, 46; 2 Temɔte 3:1-5.

10. Kɛ ɔkɛyɛ na mboane ne aboa Kelaese amediema ne mɔ ɛ?

¹⁰ Mekɛ mɔɔ Gyisɛse bule mboane nee mbɔnkye ne anwo ɛrɛlɛ ne la, ɛnee ɔlɛka mɔɔ bazi wɔ awieleɛ mekɛ ne anu la anwo edwɛkɛ. (Mateyu 24:3) Kɛ neazo la, ɔhanle kɛ: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala.” (Mateyu 24:14) Noko, ɔbule nzunza ne anwo ɛrɛlɛ ne kolaa na yeaha mboane nee mbɔnkye ne anwo edwɛkɛ. Gyisɛse bule ɛrɛlɛ ɛhye ɔmanle menli mɔɔ bɛkpokpa bɛ la nwunle ye kɛ ɔwɔ kɛ bɛyɛ gyima ɛsesebɛ wɔ edwɛkɛhanlɛ gyima ne anu. Noko bɛ nuhua ekyi bie ala a ɛha wɔ azɛlɛ ye azo a, yɛɛ bɛlɛ gyima dɔɔnwo bɛyɛ! Bɛha bɛhile menli mɔɔ bɛkpokpa bɛ la kɛ bɛha edwɛkɛ ne bɛhile “aleɛabo amra kɔsɔɔti” kolaa na awieleɛ ne ara. Kɛmɔ yɛnwunle ye wɔ mboane nee mbɔnkye ne anwo ɛrɛlɛ ne anu la, “mboane” ne baboa Gyisɛse amediema ne mɔ. Adenle kpalɛ ko mɔɔ bɛbahola bɛalua zo bɛayɛ ɛhye la a le kɛ bɛbaboa Gyisɛse amediema ne mɔ wɔ edwɛkɛhanlɛ gyima ne anu. Noko saa bɛye ezukoa bɛboa gyima ne anzɛɛ bɛsi bɛ adua kɛ bɛyɛ edwɛkɛhanlɛ gyima ne a, ɛnee bɛwie ɔ?

NWANE MƆ A ƆWƆ KƐ KA EDWƐKƐ NE A?

11. Kpuyia boni a bie mɔ babiza a, na kɛmɔti ɛ?

¹¹ Ɛnɛ, Gyisɛse ɛdoavolɛma mgbe mɔtwɛ a wɔ ɛkɛ a, yɛɛ bɛ nuhua dɔɔnwo ɛmboka menli mɔɔ bɛkpokpa bɛ la anwo. Gyisɛse anva nzunza ammaa bɛ. Ɔvale nzunza ne ɔmanle ɔ mediema ne mɔɔ bɛkpokpa bɛ la. (Mateyu 25:14-18) Yemɔti bie mɔ babiza kɛ, ‘Saa Gyisɛse anva nzunza ne amaa bɛ a, ɛnee ɔhyia kɛ bɛka edwɛkɛ ne ɔ?’ Ɛhɛe. Bɛmaa yɛnlea deɛmɔti ɔle zɔ la.

12. Duzu a yɛsukoa yɛfi Gyisɛse edwɛkɛ ne mɔɔ wɔ Mateyu 28:19, 20 la anu a?

¹² Gyisɛse hanle kɛ ye ɛdoavolɛma kɔsɔɔti ɛha edwɛkɛ ne. Bɛdwazole Gyisɛse la, ɔhanle ɔhilele ye ɛdoavolɛma kɛ ‘bɛmaa menli ɛrayɛ ɛdoavolɛma’ na ‘bɛhilehile bɛ debie biala mɔɔ yeha yehile bɛ la.’ Yemɔti ɛnee ɔwɔ kɛ ɛdoavolɛ ɛhye mɔ noko tie Gyisɛse na bɛka edwɛkɛ ne. (Kenga Mateyu 28:19, 20.) Ɔda ali wienyi kɛ ɔwɔ kɛ yɛ muala yɛka edwɛkɛ ne, saa yɛ nye la kɛ yɛbahɔ anwuma anzɛɛ yɛbadɛnla azɛlɛ ye azo bɔbɔ a.​—Gyima ne 10:42.

13. Duzu a yɛsukoa yɛfi yekile ne mɔɔ Dwɔn nwunle ye la anu a?

¹³ Yɛnwu ye wɔ Yekile buluku ne anu kɛ menli mɔɔ bɛkpokpa bɛ la nee awie mɔ a bayɛ edwɛkɛhanlɛ gyima ne a. Gyisɛse manle ɛzoanvolɛ Dwɔn nwunle “atɔfolɛ” bie mɔɔ ɛlɛka ahile menli kɛ bɛrɛla bɛranlo nzule mɔɔ maa ngoane la. Atɔfolɛ ne gyi ɛkɛ maa menli 144,000 ne mɔɔ bɛkpokpa bɛ mɔɔ bɛ nee Gyisɛse bali tumi wɔ anwuma la. (Yekile 14:1, 3; 22:17) Nzule ne gyi ɛkɛ maa Gyisɛse ɛkpɔnenlɛ afɔlebɔlɛ ne mɔɔ baboa menli yeamaa banyia ngoane mɔɔ ɛtane nee ewule ɛnle nu la. (Mateyu 20:28; Dwɔn 3:16; 1 Dwɔn 4:9, 10) Menli mɔɔ bɛkpokpa bɛ la bɔ mɔdenle kilehile menli ɛkpɔnedeɛ ne nee kɛzi bɛbahola bɛanyia zolɛ nvasoɛ la anwo debie. (1 Kɔlentema 1:23) Noko yekile ne ka menli ekpunli bie mɔɔ bɛtɛkpokpale bɛ noko bɛ nye la kɛ bɛbadɛnla azɛlɛ ɛhye azo la anwo edwɛkɛ. Bɛha bɛhile bɛdabɛ noko kɛ bɛze menli kɛ ‘bɛrɛla!’ Bɛtie zɔhane edwɛkɛ ne ɔlua awie mɔ mɔɔ bɛkilehile bɛ edwɛkpa ne la azo. Yemɔti yekile ɛhye kile kɛ menli kɔsɔɔti mɔɔ tie edwɛkpa ne la ɔwɔ kɛ ka bie kile awie mɔ.

14. Kɛzi yɛdi “Kelaese mɛla ne azo” ɛ?

¹⁴ Ɔwɔ kɛ bɛdabɛ mɔɔ bɛdi “Kelaese mɛla ne azo” la kɔsɔɔti ka edwɛkɛ ne. (Galeehyeama 6:2) Gyihova kulo kɛ menli kɔsɔɔti mɔɔ tie ye la di mɛla ko ne ala azo. Tete ne, ɔmanle Yizilayɛma nee nyɛvolɛ mɔɔ wɔ bɛ avinli la lile ye mɛla zo. (Adendulɛ 12:49; Sɛlɛvolɛma 24:22) Nɔhalɛ nu, ɛnɛ ɔngyia kɛ yɛdi mɛla kɔsɔɔti mɔɔ bɛvale bɛmanle Yizilayɛma la azo. Emomu, bɛkpokpa yɛ o, bɛtɛkpokpale yɛ o, ɔwɔ kɛ yɛdi “Kelaese mɛla ne azo.” Debie ko mɔɔ anwo hyia mɔɔ Gyisɛse hilehilele yɛ la a le kɛ yɛnyia ɛlɔlɛ. (Dwɔn 13:35; Gyemise 2:8) Ɔwɔ kɛ yɛkulo Gyihova, Gyisɛse nee menli. Na adenle titile mɔɔ yɛdua zo yɛkile zɔhane ɛlɔlɛ ne la a le kɛ yɛbaha Belemgbunlililɛ ne anwo edwɛkpa ne yɛahile menli.​—Dwɔn 15:10; Gyima ne 1:8.

15. Kɛmɔti a yɛkola yɛka kɛ Gyisɛse hanle kɛ ye ɛdoavolɛma kɔsɔɔti ɛha edwɛkɛ ne ɛ?

¹⁵ Mɔɔ Gyisɛse hanle hilele ye ɛdoavolɛma ekyi la kola fane ye ɛdoavolɛma dɔɔnwo anwo wɔ mekɛ bie anu. Kɛ neazo la, Gyisɛse nee ye ɛdoavolɛma 11 ala a yɛle ngyekyeleɛ na ɔbɔle bɛ ɛwɔkɛ kɛ ɔ nee bɛ bali tumi wɔ anwuma a. Noko menli 144,000 a nee ye bali tumi a. (Luku 22:29, 30; Yekile 5:10; 7:4-8) Mekɛ mɔɔ bɛdwazole Gyisɛse la, ye ɛdoavolɛma ekyi bie ala a dele kɛ ɔlɛka kɛ bɛha edwɛkɛ ne a. (Gyima ne 10:40-42; 1 Kɔlentema 15:6) Noko Gyisɛse ɛdoavolɛma mɔɔ wɔ ɛvoya mɔɔ lumua la anu la lile zɔhane edwɛkɛ ne azo. (Gyima ne 8:4; 1 Pita 1:8) Ɛnɛ, yɛdayɛ noko yɛze kɛ ɔwɔ kɛ yɛka edwɛkɛ ne, ɔnva nwo kɛ yɛtɛtele kɛ Gyisɛse ɛlɛka kɛ yɛyɛ gyima ɛhye la. Nɔhalɛ nu, yɛle mgbe mɔtwɛ a yɛlɛka edwɛkɛ ne a. Yɛze kɛ yɛdua edwɛkɛhanlɛ gyima ne azo yɛkile kɛ yɛlɛ Gyisɛse anu diedi kpalɛ.​—Gyemise 2:18.

MEKƐ ƐHYE ANU A ƆWƆ KƐ YƐDI NƆHALƐ A

16-18. Kɛ ɔkɛyɛ na yɛava nɔhalɛlilɛ yɛaboa Kelaese amediema ne mɔ ɛ, na kɛmɔti a ɔwɔ kɛ yɛyɛ zɔ wɔ mekɛ ɛhye anu a?

¹⁶ Seetan ɛlɛko kpalɛ atia Kelaese amediema mɔɔ bɛtɛbɔ azɛlɛ ye azo mɔɔ bɛkpokpa bɛ la, na ɔze kɛ “ye mekɛ ɛha ekyi bie ala.” (Yekile 12:9, 12, 17) Noko ɔnva nwo biala mɔɔ Seetan kɛyɛ la, menli mɔɔ bɛkpokpa bɛ la kɔ zo di edwɛkɛhanlɛ ne anyunlu na menli dɔɔnwo ɛlɛtie edwɛkpa ne adɛla mekɛ biala. Ɔda ali wienyi kɛ Gyisɛse nee menli mɔɔ bɛkpokpa bɛ la lua yɛɛ ɔlɛkile bɛ adenle.​—Mateyu 28:20.

¹⁷ Yɛte nganeɛ kɛ ɔle enililɛ kɛ yɛbaha edwɛkɛ ne yɛaboa Kelaese amediema ne mɔ. Yɛdua ndoboa mɔɔ yɛye yɛɛ mɔdenle mɔɔ yɛbɔ yɛsisi Belemgbunlililɛ Asalo, Nyianu Asalo yɛɛ ɔfese ngakyile la azo yɛboa. Saa yɛfa nɔhalɛlilɛ yɛtie mgbanyima nee mediema mrenya gyɛne mɔɔ ‘akɛlɛ nɔhavo nee nrɛlɛbɛvolɛ ne’ ɛkpa bɛ la a, yɛmaa ɔda ali kɛ yɛkulo kɛ yɛboa Kelaese amediema ne mɔ.​—Mateyu 24:45-47; Hibuluma 13:17.

¹⁸ Ɔnrɛhyɛ, menli mɔɔ bɛkpokpa bɛ mɔɔ ɛha la banyia bɛ nzonlɛyɛlɛ mɔɔ li awieleɛ la. Akee anwumabɔvolɛma ne bagyakyi “anwoma ngakyile nna ne anu,” amaa anwongyelelɛ kpole ne abɔ ɔ bo. (Yekile 7:1-3) Kolaa na Amagɛdɔn ne abɔ ɔ bo la, Gyisɛse bava menli mɔɔ bɛkpokpa bɛ la ahɔ anwuma. (Mateyu 13:41-43) Yemɔti saa yɛkulo kɛ bɛbua yɛ ndɛne kɛ yɛle mboane wɔ mekɛ mɔɔ Gyisɛse bara la a, mekɛ ɛhye anu a ɔwɔ kɛ yɛdi nɔhalɛ yɛmaa Kelaese amediema ne mɔ a.