Kɔ Zo Di Wɔ Baebolo Ɛgengalɛ Nwo Ngyehyɛleɛ Ne Azo

Kɛmɔ ɛlɛ gyima dɔɔnwo ɛyɛ la ati, asoo ɔyɛ se ɔmaa wɔ kɛ ɛbali ngyehyɛleɛ mɔɔ ɛfa ɛkenga Nyamenle Edwɛkɛ ne kenle ko biala la azo ɔ? (Dwɔh. 1:8) Saa ɔle zɔ a, ɛnee sɔ nzuzulɛ ɛhye mɔ anu ko nea:

• Yɛ debie mɔɔ ɔbahakye wɔ la. Ɛbahola wɔasɛte alarm wɔ wɔ fonu ne azo amaa mekɛ dwu a yeazu yeahakye wɔ yeamaa wɔagenga Baebolo ne.

• Fa wɔ Baebolo ne to ɛleka mɔɔ ɛbanwu ye la. Saa Baebolo ne mɔɔ bɛpelente la bie a ɛkenga a, ɛbahola wɔava wɔado ɛleka mɔɔ ɛ nye babɔ zo dahuu la.—Dit. 11:18.

• Tie ye ɔdio. Mekɛ mɔɔ ɛlɛyɛ wɔ alehyenlɛ ne anu gyima ngakyile la, ɛbahola wɔadie Baebolo ne ɔdio. Tara mɔɔ le adekpakyelɛnli nee ɛrɛladane na ɔyɛ gyima nɔsolɛ nu la hanle kɛ, “Saa melɛyɛ me sua nu gyima na metie Baebolo ne ɔdio a, ɔboa me ɔmaa medi me Baebolo ɛgengalɛ ngyehyɛleɛ ne azo dahuu.”

• Mmamaa ɛ sa nu to. Saa debie bie ati wɔangola wɔ Baebolo ne kenga kɛ mɔɔ ɛhyehyɛle ye la a, bɔ mɔdenle kenga Baebolo ngyehyɛnu bie mɔ kolaa na wɔala. Saa bɔbɔ ngyehyɛnu ekyi bie ala a ɛkola ɛkenga ye kenle ko biala a, ɛbanyia zolɛ nvasoɛ kpalɛ.—1 Pita 2:2.