Ɛlɛsiezie Ɛ Nwo Wɔamaa Ngakyelɛlilɛ Ne Ɔ?

Ɛnee Gyisɛse Akpabɛnwo mɔɔ li awieleɛ la le ngakyile bɔkɔɔ. Kɛmɔ ɛnee ye ewule ne ɛbikye la ati, ɛnee ɔkulo kɛ ɔ nee ye ɛzoanvolɛ ne mɔ di Akpabɛnwo aleɛ ne, na ɔfa Awulae Nɔsolɛ Aleɛ ne mɔɔ ɔle ɛvoyia fofolɛ mɔɔ bɛbali ye ɛvolɛ biala la ɔsie ɛkɛ. Ɔzoanle Pita nee Dwɔn kɛ bɛhɔziezie sua ne mɔɔ bɛbali aleɛ ne wɔ nu la anu. (Lu 22:7-13; nea ɔ nyunlu nvoninli ne.) Ɛhye kakye yɛ kɛ ɔwɔ kɛ yɛsiezie yɛ nwo yɛmaa March 27 Ngakyelɛlilɛ ne. Ɔda ali kɛ asafo ngakyile ne mɔ ɛyɛ tendɛvolɛ, paano nee nwanye ne nee ninyɛne gyɛne nwo ngyehyɛleɛ ɛwie. Noko akee, duzu a yɛ nuhua ko biala bahola ayɛ aziezie ɔ nwo amaa Ngakyelɛlilɛ ne a?

Siezie wɔ ahonle. Dwenledwenle Ngakyelɛlilɛ Baebolo ɛgengalɛ ne anwo. Ɛbanwu Baebolo ɛgengalɛ ne anwo ngyehyɛleɛ wɔ Neɛnlea Ngɛlɛlera Ne Anu Dahuu buluku ne anu. Yɛɛ nwolɛ edwɛkɛ dɔɔnwo wɔ Mokanwo B12 mɔɔ wɔ Ngɛlɛlera Nwuanzanwuanza Ewiade Fofolɛ Ngilebɛbo ne anu la anu. (Eza nea April 2020 Yɛ Ɛbɛlabɔlɛ Nee Yɛ Ɛzonlenlɛ Nyianu Buluku ne anu.) Mbusua bahola anyia deɛmɔti ɛkpɔnedeɛ ne anwo hyia la anwo edwɛkɛ dɔɔnwo wɔ Gyihova Alasevolɛ Neɛnleanu Buluku ne anu mɔɔ bɛbahola bɛava bɛayɛ abusua ɛzonlenlɛ a.

To ɛsalɛ fɛlɛ awie mɔ. Fa ɛ nwo wula Ngakyelɛlilɛ nolobɔlɛ ne anu. Dwenle menli mɔɔ ɛbahola wɔado ɛsalɛ wɔavɛlɛ bɛ, le kɛ wɔ sia kɔkpɔla ngakyile, menli mɔɔ ɛnee ɛ nee bɛ sukoa Baebolo ne la, ɛ gɔnwo mɔ yɛɛ wɔ mbusuafoɔ. Mgbanyima ne mɔ bado ɛsalɛ avɛlɛ menli mɔɔ ɛgyakyi daselɛlilɛ nee debiezukoalɛ ɛhɔlɛ la. Saa ɛkulo kɛ ɛboa awie mɔɔ ɔnde wɔ kpalɛ ne azo la ɛmaa ɔnwu mekɛ yɛɛ ɛleka mɔɔ bɛbayɛ Ngakyelɛlilɛ ne wɔ ɛleka mɔɔ ɔde la a, tinli YƐ NWO EDWƐKƐ mɔɔ wɔ jw.org/nzi anwuma ɛkɛ ne la azo na kpa “Ngakyelɛlilɛ.”

Duzu bieko a yɛbahola yɛayɛ yɛava yɛaziezie yɛ nwo a?