NYAMENLE EDWƐKƐ NE AZO NVASOƐ | LUKU 8-9
Bɛla Badoa Me—Duzu A Hyia A?
Saa awie bahola avundu azɛlɛ yeamaa yeadenrɛ a, ɔnle kɛ ɔto ɔ nye ɔ nzi amaa ninyɛne andwehwe ye adwenle. Zɔhane ala a ɔnle kɛ Kilisienenli maa ewiade ne anu ninyɛne mɔɔ yegyakyi ye ɔ nzi la twehwe ye a.—Fe 3:13.
Saa yɛlɛyia tɛnlabelɛ mɔɔ anu yɛ se a, ɔnyɛ se kɛ yɛ nwo balɔ ɛbɛlabɔlɛ bie mɔɔ ɛnee yɛwɔ nu, bie a mekɛ mɔɔ ɛnee yɛtɛbale nɔhalɛ ne anu la. Ɛhye maa yɛte nganeɛ kɛ yɛamba nɔhalɛ ne anu a, anrɛɛ ɔle kpalɛ na anrɛɛ yɛnrɛyia ngyegyelɛ zɔhane ɛlɛ. Zɔhane ala a Yizilayɛma ne yɛle wɔ mekɛ mɔɔ bɛvile Yigyibiti la. (Ɛd 11:5, 6) Saa yɛdwenle ninyɛne ɛhye mɔ anwo a, ɔbahola yeamaa yɛazia yɛahɔyɛ ninyɛne mɔɔ ɛnee yɛyɛ ye dɛba la. Ɔle kpalɛ kɛ yɛbadwenle nyilalɛ mɔɔ yɛlɛnyia ye kɛkala la anwo na yɛava yɛ adwenle yɛazie kenle bie anyelielɛ mɔɔ yɛbanyia ye wɔ Belemgbunlililɛ ne abo la azo!—2Kɔ 4:16-18.