YƐ KILISIENE ƐBƐLABƆLƐ
Kakye Kɛ Ɛbazɛlɛ Wɔamaa Kilisienema Mɔɔ Bɛlɛyɛ Bɛ Kpɔdekpɔde La
Baebolo ne hanle dole ɛkɛ ne kɛ Seetan bayɛ yɛ kpɔdekpɔde yeava yeazi yɛ ɛzonlenlɛ gyima ne adenle. (Dwn 15:20; Ye 12:17) Kɛ ɔkɛyɛ na yɛaboa yɛ gɔnwo mɔ Kilisienema mɔɔ bɛlɛyɛ bɛ kpɔdekpɔde wɔ maanle gyɛne zo la ɛ? Yɛbahola yɛazɛlɛ yɛamaa bɛ. “Sonla tenlene biala nzɛlɛlɛ yɛ nla eza tumi wɔ nu.”—Gye 5:16.
Nzɔne a yɛkola yɛyɛ nwolɛ nzɛlɛlɛ a? Yɛkola yɛsɛlɛ Gyihova kɛ ɔmaa yɛ mediema mrenyia nee mraalɛ akɛnrasesebɛ amaa bɛanzulo. (Ay 41:10-13) Eza yɛbahola yɛazɛlɛ yɛamaa menli mɔɔ tumi wɔ bɛ sa nu la kɛ bɛnyia yɛ daselɛlilɛ ne anwo adwenle kpalɛ, “amaa yɛ nwo adɔ yɛ na yɛanyia anzonudwolɛ yɛabɔ yɛ ɛbɛla.”—1Te 2:1, 2.
Mɔɔ bɛyɛle Pɔɔlo nee Pita kpɔdekpɔde la, alimoa Kilisienema bɔle bɛ aluma zɛlɛle maanle bɛ. (Gyi 12:5; Wlo 15:30, 31) Saa yɛnze menli mɔɔ bɛlɛkpɔ bɛ ɛnɛ la amuala aluma bɔbɔ a, asoo yɛbahola yɛabɔ bɛ asafo nee maanle mɔɔ bɛvi nu la aluma ɔ?