Kɔ Zo Sɛlɛ Nyamenle Nyilalɛ

Nyamenle ɛmaa alesama ahyɛlɛdeɛ mɔɔ le titili, yemɔ a le nwolɛ adenle mɔɔ yɛlɛ yɛka yɛ nganeɛdelɛ nwo edwɛkɛ yɛkile ye wɔ asɔneyɛlɛ nu la. Ngapezonli Devidi yɛle asɔne kɛ: “O asɔneyɛlɛ Tievolɛ, ɛ nwo ɛkɛ ne a menli ngakyile kɔsɔɔti ba a.” (Edwɛne 65:2) Noko kɛzi ɔwɔ kɛ yɛyɛ asɔne amaa Nyamenle adie na yeayila yɛ ɛ?

FI AHONLE NU YƐ ASƆNE

Bɛtianwo asɔneyɛlɛ baboa wɔ yeamaa ‘wɔaha wɔ ahonle nu edwɛkɛ wɔahile Nyamenle.’ (Edwɛne 62:8) Tumivolɛ Bedevinli ne anye die asɔneyɛlɛ mɔɔ bɛfi ahonle nu bɛyɛ la anwo.

FA NYAMENLE DUMA FƐLƐ YE

Nyamenle lɛ amodinli dɔɔnwo noko ye duma le ko pɛ. “Medame a mele Gyihova a. Me duma ɛne.” (Ayezaya 42:8) Duma Gyihova ne finde fane kɛyɛ 7,000 wɔ Ngɛlɛlera Nwuanzanwuanza ne anu. Ngapezoma dɔɔnwo vale Nyamenle duma ne vɛlɛle ye wɔ asɔneyɛlɛ nu. Ebileham hanle kɛ: ‘Gyihova mesɛlɛ wɔ, maa menga ɛhye mengile wɔ.’ (Gyɛnɛsese 18:30) Ɔwɔ kɛ yɛdayɛ noko yɛfa Nyamenle duma Gyihova ne yɛfɛlɛ ye wɔ asɔneyɛlɛ nu.

YƐ ASƆNE WƆ WƆ ANEƐ NU

Ɔnva nwo aneɛ mɔɔ ɛka la Nyamenle te wɔ nzuzulɛ nee wɔ nganeɛdelɛ bo. Ye Edwɛkɛ ne maa yɛ anwosesebɛ kɛ: “Nyamenle ɛnnea sonla nyunlu, na wɔ maanle biala anu awie biala mɔɔ sulo ye na ɔyɛ mɔɔ ɔle tenlene la, ɔdie ye ɔto nu.”​—Gyima ne 10:34, 35.

Noko akee tɛ asɔne ala a ɛyɛ a Nyamenle bayila wɔ a. Yɛbazuzu mɔɔ ɔhyia kɛ yɛyɛ la anwo wɔ edwɛkɛ mɔɔ doa zo la anu.