Asoo Bɛhakyi Nyamenle Edwɛkɛ Ne Anu Ɔ?

Menli bie mɔ ɛngola ɛnwu ye saa bɛhakyi Nyamenle Edwɛkɛ ne anu a? Ngapezonli Ayezaya hanle kɛ Nyamenle edwɛkɛ ne “wɔ ɛkɛ dahuu.” (Ayezaya 40:8) Duzu a kile kɛ bɛtɛkakyile Nyamenle ɛwɔkɛ ne mɔ anu a?

Nyamenle lɛ tumi mɔɔ ɔkola ɔbɔ ye Edwɛkɛ ne anwo bane amaa bɛanzɛkye ye. Wɔ tete ne mɔɔ ɛnee bɛfa bɛ sa bɛkɛlɛ la, menli mɔɔ hɛlɛle edwɛkɛ nwuanzanwuanza ne la dianle ngɛlɛlerakpɔkɛ biala mɔɔ ɛnee wɔ nu la pɛpɛɛpɛ nwunle kɛ bɛanva bie bɛamboka nwo, bɛangakyi bie anzɛɛ bɛanye bie bɛanvi nu. Noko, kɛmɔ yɛnli munli la ati nvonleɛ ngyikyi ngyikyi bie mɔ rale nuhua.

DASELƐ MƆƆ KILE KƐ BƐTƐKAKYILE NYAMENLE EDWƐKƐ NE ANU ƐNƐ LA

Tete bɛsanloangɛlɛlera apenle dɔɔnwo wɔ ɛkɛ. Saa bɛsanloangɛlɛlera ko anu edwɛkɛ bie le ngakyile ekyi bɔbɔ a, bɛkola bɛfa bɛtoto mɔɔ ɛha la anwo amaa bɛanwu mɔɔ le nɔhalɛ la. Amaa wɔanwu ɛhye anwo edwɛkɛ dɔɔnwo la, nea “Asoo Bɛhakyi Baebolo Ne Anu Edwɛkɛ Ne?” mɔɔ wɔ jw.org/nzi azo la.

Fa Nyevile Wulera Nwomamobɔleɛ ne mɔɔ bɛnwunle bɛ wɔ 1947 wɔ bolɛ mbɔne bie anu mɔɔ bikye Nyevile Wulera ne la kɛ neazo. Ɛnee Ngɛlɛlera Nwuanzanwuanza ne foa bie mɔɔ ɛbo ɛvolɛ apenle nwiɔ la boka tete ngɛlɛlera ɛhye mɔ anwo. Mbɔlɔba bie mɔ vale tete bɛsanloangɛlɛlera ne totole Ngɛlɛlera Nwuanzanwuanza ne mɔɔ yɛlɛ ye ɛnɛ la anwo. Boni a bɛnwunle ye a?

Bɛnwunle ye kɛ Nyamenle Edwɛkɛ ne mɔɔ yɛlɛ ye ɛnɛ la nee mɔlebɛbo ngɛlɛlera ne le ko.a Neɛnleanu mɔɔ bɛyɛle ye wɔ bɛsanloangɛlɛlera dɛba ne mɔ anu la di daselɛ kɛ edwɛkɛ mɔɔ yɛkenga ye ɛnɛ wɔ Ngɛlɛlera Nwuanzanwuanza ne anu la le Nyamenle mɔlebɛbo edwɛkɛ ne. Yɛkola yɛnyia anwodozo kɛ Nyamenle ɛbɔ ye Edwɛkɛ ne anwo bane ɛmaa yɛ ɛnɛ.

Ɛhye ati, yɛbahola yɛava anwodozo yɛagenga Nyamenle Edwɛkɛ ne ɔluakɛ ɔle pɛpɛɛpɛ. Bɛmaa yɛzuzu mɔɔ yɛbahola yɛazukoa yɛavi Nyamenle ngapezoma ne ɛkɛ ne la.