“Mɛla Ɛhye . . . Ɛdɛnla Bɛ Ahonle Nu”

Awovolɛ le kɛ mboaneneavolɛ. Bɛ mra ne mɔ bahola aminli yemɔti ɔwɔ kɛ bɛnea bɛ boɛ. (Mrɛ. 27:23) Kɛ ɔkɛyɛ na awovolɛ ali ɛhye anwo gyima ɛ? Ɔwɔ kɛ bɛnyia mekɛ alehyenlɛ biala bɛ nee bɛ di adwelie amaa bɛanwu mɔɔ wɔ bɛ adwenle nee bɛ ahonle nu la. (Mrɛ. 20:5) Eza ɔwɔ kɛ awovolɛ fa ninyɛne mɔɔ senle ɛngola bɛ yela la boa bɛ maa bɛ diedi ne anu mia kpalɛ. (1 Kɔl. 3:10-15) Vidio ne mɔɔ se “Mɛla Ɛhye . . . Ɛdɛnla Bɛ Ahonle Nu” la maa yɛnwu kɛzi abusua ɛzonlenlɛ nwo hyia la. Kɛ abusua la, bɛbɔ nu bɛnlea na bɛzuzu kpuya ɛhye mɔ anwo.

(1) Nzɔne a maanle Roman abusua ne sunsum nu gyinlabelɛ zɛkyele a? (2) Nzɔne ati a mɔdenle mɔɔ Adiema Roman limoale bɔle la anyɛ boɛ ɛ? (3) Ngɛlɛlera ne anu adehilelɛ fɔɔnwo boni a boa wɔ ngakula ɛtetelɛ nu kpalɛ a? (Mɛla 6:6, 7) (4) Nzɔne a bahola amaa adawubɔlɛ kpalɛ ahɔ zo wɔ abusua nu a? (5) Nzɔne afɔle a ngakula kpondɛ kɛ bɛ awovolɛ bɔ a? (6) Kɛzi adiema Barrow nee ɔ ye boale Roman abusua ne ɛ? (Mrɛ. 27:17) (7) Nzɔne a ɔwɔ kɛ abusua tile dimoa yɛ na abusua ɛzonlenlɛ ne ahɔ zo a? (8) Nzɔne a adiema Roman yɛle maanle ninyɛne yɛle kpalɛ wɔ ye abusua ne anu a? (9) Saa abusua ɛzonlenlɛ ne toa zo a, kɛzi ɔboa ɛ? (Ɛfɛ. 6:4) (10) Ninyɛne mɔɔ bɛbahola bɛazuzu nwo wɔ abusua ɛzonlenlɛ bo la bie a le boni mɔ? (11) Kɛzi Adiema Roman nyianle abotane noko ɔzile pi wɔ mekɛ mɔɔ ɔboa Marcus yeamaa yeanwu deɛmɔti ɔhyia kɛ ɔyɛ mɔɔ tenrɛ la ɛ? (Gyɛ. 17:9) (12) Kɛzi Adiema Roman nee ɔ ye boale Rebecca amaa yeazi kpɔkɛ kpalɛ wɔ ɔ nee Justin agɔnwolɛvalɛ ne anu ɛ? (Maake 12:30; 2 Tem. 2:22) (13) Kɛzi Adiema Roman nee ɔ ye lale diedi ali wɔ mekɛ mɔɔ bɛyɛ nzenzaleɛ wɔ bɛ asetɛnla nu la ɛ? (Mat. 6:33) (14) Kɛzi vidio ɛhye ɛmaa mbusua tile ɛnwu kɛ ɔwɔ kɛ bɛnea bɛ mbusua wɔ sunsum nu ɛ? (1 Tem. 5:8) (15) Kɛ abusua tile la, nzɔne kpɔkɛ a wɔbɔ a?

MBUSUA TILE ƐYƐ YE NZONLƐ: Bɛyɛle ɛnɛ mekɛ ye anu drama ɛhye wɔ 2011 maanzinli nyianu ne abo. Wɔ zɔhane mekɛ ne, asoo ɛnwunle kɛ ɔhyia kɛ ɛnyia anyuhɔlɛ wɔ wɔ abusua ɛzonlenlɛ ne anu ɔ? Na kɛkala noko ɛ? Saa ɔwɔ kɛ ɛyɛ nzenzaleɛ a, yɛsɛlɛ wɔ fa asɔneyɛlɛ suzu nwo na yɛ maa ɔboa wɔ abusua ne mekɛ biala.​—Ɛfɛ. 5:15-17.