Ngakyelɛlilɛ Ne Mɔɔ Ɛlɛba La Bamaa Yɛahola Yɛahile Anyezɔlɛ

1. Adenle titile boni a Ngakyelɛlilɛ ne bamaa yɛanyia a?

¹ Ngakyelɛlilɛ ne mɔɔ bɛbayɛ ye April 14 la le adenle kɛnlɛma mɔɔ bamaa yɛanyia Gyihova kpalɛyɛlɛ ne anwo anyezɔlɛ na yɛala ye ali a. Edwɛkɛ ne mɔɔ wɔ Luku 17:11-18 la kile kɛzi Gyihova nee Gyisɛse bu anyezɔlɛ la. Ɔyɛ alɔbɔlɛ kɛ, kokobɛvolɛma bulu ne anu ko ala a hilele anyezɔlɛ a. Kenlebie, ɛkpɔnedeɛ ahyɛlɛdeɛ ne bamaa bɛanyia ewule kɔsɔɔti sɔbelɛ bɔkɔɔ, na yeamaa dahuu ngoane ahɔ zo! Ɔda ali kɛ, akee yɛbala Gyihova ase alehyenlɛ biala wɔ nyilalɛ ɛhye anwo. Noko kɛ ɔkɛyɛ na yɛahile yɛ anyezɔlɛ wɔ dapɛne mɔɔ ɛlɛba la anu ɛ?

2. Kɛ ɔkɛyɛ na yɛanyia ɛkpɔnedeɛ ne anwo anyezɔlɛ ɛ?

² Nyia Anyezɔlɛ: Yɛsuzu ninyɛne nwo a yɛɛ yɛnyia nwolɛ anyezɔlɛ a. Amaa yɛanyia ɛkpɔnedeɛ ne anwo anyezɔlɛ la, bɛyɛ Ngakyelɛlilɛ Baebolo ɛgengalɛ titile ne anwo ngyehyɛleɛ wɔ ɛleka le kɛ New World Translation fofolɛ ne mokanwo B12, kalenda yɛɛ Neɛnlea Ngɛlɛlera Ne Anu Dahuu. Duzu ati a bɛnzuzu edwɛkɛ ɛhye anwo kɛ abusua ɛ? Saa yɛyɛ zɔ a yɛbanyia ɛkpɔnedeɛ ne anwo anyezɔlɛ kpole. Ɛhye baha yɛ ɛbɛlabɔlɛ wɔ adenle kpalɛ zo.​—2 Kɔl. 5:14, 15; 1 Dwɔn 4:11.

3. Ndenle boni azo a yɛbahola yɛahile yɛ anyezɔlɛ wɔ Ngakyelɛlilɛ mekɛ ne anu a?

³ Kile Nwolɛ Anyezɔlɛ: Bɛfa nyɛleɛ a bɛkile anyezɔlɛ a. (Kɔl. 3:15) Kokobɛvolɛ ne mɔɔ nyianle anyezɔlɛ la kpondɛle Gyisɛse na ɔlale ye ase. Ɔda ali kɛ, ɔhanle nwanwane adenle zo ayile mɔɔ bɛyɛle ye la anwo edwɛkɛ ɔhilele awie mɔ. (Luku 6:45) Asoo ɛkpɔnedeɛ ne anwo anyezɔlɛ baha yɛ yeamaa yɛabɔ mɔdenle yɛayɛ Ngakyelɛlilɛ ne anwo nolobɔlɛ ne bie? Adenle ko mɔɔ yɛbahola yɛalua zo yɛahile nwolɛ anyezɔlɛ la a le kɛ yɛbayɛ adekpakyelɛ boavolɛ gyima anzɛɛ yɛbayɛ dɔɔnwo wɔ daselɛlilɛ nu wɔ Ngakyelɛlilɛ mekɛ ne anu. Nɔsolɛ ne mɔɔ bɛbayɛ Ngakyelɛlilɛ ne la anu, anyezɔlɛ bamaa yɛalie nyɛvolɛ na yɛanyia mekɛ yɛabua kpuyia mɔɔ bɛlɛ la.

4. Kɛ ɔkɛyɛ na yɛannu yɛ nwo wɔ Ngakyelɛlilɛ ɛhye anwo ɛ?

⁴ Yɛyɛ Ngakyelɛlilɛ ɛhye a yɛnrɛyɛ bieko ɔ? (1 Kɔl. 11:26) Yɛnze. Noko yɛze kɛ saa ɔpɛ nu a, adenle titile mɔɔ yɛbava yɛahile nwolɛ anyezɔlɛ la bapɛ nu. Ɛbava wɔali gyima ɔ? Ɔrɛla ye kɛ yɛ nloa edwɛkɛ mɔɔ kile anyezɔlɛ nee yɛ ahonle nu nzuzulɛ bamaa Gyihova, ɛkpɔnedeɛ Maavolɛ ahunlunyele ne anye alie.​—Edw. 19:14.