Yɛbava Belemgbunlililɛ Edwɛkɛ 38 Ne Yɛamaa Wɔ December!
1. Kpuyia boni a menli lɛ wɔ mɔwuamra anwo a, na kɛzi bɛbanyia nwolɛ mualɛ wɔ December ɛ?
1 Ɔnva nwo diedi mɔɔ menli kɔsɔɔti lɛ la, ewule le bɛ kpɔvolɛ. (1 Kɔl. 15:26) Menli dɔɔnwo ɛnnwu ɛleka mɔɔ mɔwuamra wɔ la yɛɛ bɛnze saa bɛbanwu bɛ bieko a. Ɛhye ati, asafo mɔɔ wɔ ewiade amuala la bava Belemgbunlililɛ Edwɛkɛ 38 ne mɔɔ ati se, “Mɔwuamra Badɛnla Aze Bieko Amgba Ɔ?” la amaa wɔ siane ko anu. Nolobɔlɛ titile ɛhye babɔ ɔ bo wɔ December 1. Nolobɔlɛ titile ɛhye anzi, yɛbava Belemgbunlililɛ Edwɛkɛ 38 ne yɛamaa wɔ daselɛlilɛ nu kɛ trate la.
2. Kɛzi bɛyɛ Belemgbunlililɛ Edwɛkɛ 38 ne ɛ?
2 Kɛzi Bɛyɛ Ye La: Bɛyɛ Belemgbunlililɛ Edwɛkɛ 38 ne kɛ yɛbabu nuhua tendenle amaa bɛanwu zolɛ edwɛkɛ ne mɔɔ yɛ anyelielɛ yɛɛ edwɛkɛ ne mɔɔ se, “Asoo ɛbaha kɛ . . . ɛhɛe? kyɛkyɛ? wɔannea a?” la avinde zolɛ. Saa kengavolɛ ne buke Belemgbunlililɛ Edwɛkɛ ne anu a, ɔbanwu mɔɔ Baebolo ne ka fa bua edwɛkɛtile kpuyia ne yɛɛ mɔɔ Baebolo ne ɛwɔkɛ ne bahola ahile amaa ye la. Eza ɔbanwu debie mɔɔ ɔti ɔbahola yealie Baebolo ne yeali la. Kpuyia mɔɔ yɛ anyelielɛ mɔɔ ɔbadwenle nwolɛ la wɔ Belemgbunlililɛ Edwɛkɛ ne anzi na ɔka ɔkile ye kɛ ɔzukoa ninyɛne dɔɔnwo.
3. Kɛzi yɛbava Belemgbunlililɛ Edwɛkɛ 38 ne yɛamaa ɛ?
3 Kɛzi Yɛbava Yɛamaa La: Yɛbava ɛhye yɛamaa kɛmɔ yɛfa Ngakyelɛlilɛ nee maangyeba nyianu ɛsalɛdolɛ ngɛlata ne mɔ yɛmaa la. Mgbanyima ne mɔ bahile kɛzi bɛbayɛ azɛlɛsinli ne anu gyima kɛmɔ kɛlata mɔɔ bɛ sa hanle ye wɔ April 1, 2013, hilele la. Asafo mɔɔ bɛnlɛ azɛlɛsinli dɔɔnwo la bahola aboa asafo mɔɔ bikye na bɛlɛ azɛlɛsinli dɔɔnwo la. Saa ɛlɛdie Belemgbunlililɛ Edwɛkɛ 38 ne bie a, kakye kɛ ɛbalie dodo mɔɔ ɛbahyia nwolɛ wɔ dapɛne ko ala anu la. Nolobɔlɛ ne ɛlɛkɔ zo a, yɛbahola yɛava bie yɛamaa wɔ gua zo daselɛlilɛ nu wɔ mekɛ mɔɔ yɛva bie yɛhɔ azua mɔɔ wɔ azɛlɛsinli ne kɔsɔɔti anu yɛwie la. Saa yɛfa ɔ muala yɛmaa kolaa na siane ne adwu a, ɔwɔ kɛ yɛfa buluku mɔɔ yɛbava yɛamaa la yɛdi gyima. Wɔ Folɛ mɔɔ lumua la anu, yɛbava yɛ adwenle yɛazie nolobɔlɛ titile ne azo yɛadɛla kɛ yɛbabɔ Baebolo ɛzukoalɛ bo la. Wɔ dapɛne awieleɛ, saa ɔkɛyɛ boɛ a ɔwɔ kɛ yɛfa magazine ne mɔ noko yɛmaa. Ɛlɛyɛ wɔ ngyehyɛleɛ amaa wɔahola wɔayɛ dɔɔnwo wɔ nolobɔlɛ titile ɛhye anu ɔ?