Edwɛkɛ Mɔɔ Yɛbaha La Neazo

Fa bɔ Baebolo ɛzukoalɛ bo wɔ Folɛ mɔɔ lumua wɔ July

“Asɛɛ awie biala mɔɔ wɔ yɛ kpalɛ ye azo la kulo kɛ ɔtɛnla aze mekɛ tendenle wɔ anyelielɛ nu. Ɛhye ati, yɛkulo kɛ yɛnwu wɔ adwenle wɔ edwɛkɛ ɛhye anwo: Ɛdwenle kɛ abɔdeɛ nwo nrɛlɛbɛ nee ayileyɛlɛ bamaa yɛadɛnla aze dahuu mekɛ bie ɔ? [Maa ɔbua.] Tie edwɛkɛ ɛhye mɔɔ wɔ ɛke la.” Fa July 1 Ɛzinzalɛ Arane ne anzi kile ye, na bɛzuzu edwɛkɛ mɔɔ wɔ kpuyia mɔɔ lumua la abo nee ngɛlɛlera mɔɔ wɔ nu la ko anwo. Fa magazine ne maa ye, na yɛ ngyehyɛleɛ sia kɔ na bɛzuzu kpuyia mɔɔ doa zo la anwo.

Bɛyɛ ye nzonlɛ: Ɔwɔ kɛ bɛfa edwɛkɛ ɛhye bɛyɛ yɛkile wɔ daselɛlilɛ nyianu mɔɔ bɛbayɛ ye wɔ July 6 la anu.

Ɛzinzalɛ Arane July 1

“Menli dɔɔnwo mɔɔ yɛ nee bɛ tendɛ la kɔ bɛ asɔne. Noko bie mɔ ka kɛ bɛnlie ɛzonlenlɛ biala bɛnli. Kɛzi ɛte nganeɛ wɔ ɛzonlenlɛ nwo ɛ? [Maa ɔbua.] Gyisɛse manle yɛ ngyinlazo mɔɔ baboa yeamaa yɛanwu ɛzonlenlɛ bie la. [Kenga Luku 6:44a.] Magazine ɛhye ka ma ɛtane mɔɔ ɛzonlenlɛ ɛzo la bie mɔ anwo edwɛkɛ. Eza ɔbua kpuyia ne mɔɔ se, Asoo ɔfɛta kɛ ɛdie ɛzonlenlɛ bie ɛdi ɔ?”

Awake! July

“Yɛlɛkpɔla yɛ gɔnwo mɔ na yɛaha debie mɔɔ gyegye adwenle, mɔɔ le nzisi la anwo edwɛkɛ yɛahile bɛ. Menli bie mɔ yɛ yɛkile fa ko tia nzisi. Ɛdwenle kɛ menli mɔɔ yɛ yɛkile la kola fa nzenzaleɛ ba ɔ? [Maa ɔbua.] Tie mɔɔ Baebolo ne ka kɛ ɔbava nzenzaleɛ kpalɛ yeara azɛlɛ ye azo la. [Kenga Mateyu 6:9, 10.] Magazine ɛhye bua kpuyia ne mɔɔ se, Asoo ye sɔbelɛ a le yɛkile?”

Edwɛkpa Mɔɔ Vi Nyamenle Ɛkɛ!

“Yɛlɛkpɔla mbusua mɔɔ de wɔ ɛke la na yɛaha Baebolo ne anu edwɛkɛ mɔɔ yɛ anyelielɛ la yɛahile bɛ. Menli dɔɔnwo mɔɔ yɛ nee bɛ ɛdendɛ la ɛnnwu deɛmɔti Nyamenle mɔɔ lɛ ɛlɔlɛ la maa amaneɛnwunlɛ dɔɔnwo nwo adenle wɔ ewiade anu la. Ɛdwenle kɛ ɛnee amaneɛnwunlɛ boka Nyamenle mɔlebɛbo bodane mɔɔ ɔlɛ ɔmaa azɛlɛ ye la anwo ɔ?” Maa ɔbua. Akee buke Ɛzukoalɛdeɛ 5, bɛgenga na bɛzuzu ɛdendɛkpunli nwiɔ ne mɔɔ lumua nee ngɛlɛlera mɔɔ bɛhyea bɛ la anwo. Fa bulohyua ne maa ye, na yɛ ngyehyɛleɛ sia kɔ na bɛzuzu kpuyia mɔɔ doa zo mɔɔ bɛyɛ ye bile la anwo.