Fa Anyelielɛ Siezie Wɔ Ahonle Maa Ngakyelɛlilɛ Ne
1. Ngakyelɛlilɛ ne le mekɛ titile mɔɔ yɛfa yɛyɛ duzu?
1 Ngakyelɛlilɛ ne mɔɔ yɛbayɛ ye Dwɛkɛ, March 26 la, bamaa yɛanyia adenle mɔɔ Nyamenle luale zo liele yɛ ngoane la anwo anyelielɛ kpole. (Aye. 61:10) Kolaa na mekɛ ne adwu la, anyelielɛ bamaa yɛaziezie yɛ nwo kpalɛ. Adenle boni azo?
2. Duzu a ka yɛ maa yɛsiezie yɛ nwo yɛmaa Ngakyelɛlilɛ ne a?
2 Siezie Ɛ Nwo Maa Ɛvoyialilɛ Ne: Awulae Nɔsolɛ Aleɛ ne le ɛvoyialilɛ kpole noko bɛyɛ ye sikalɛ. Noko akee, ɔwɔ kɛ yɛdumua yɛsiezie yɛ nwo kpalɛ amaa yɛambu yɛ nye yɛangua ninyɛne mɔɔ hyia la azo. (Mrɛ. 21:5) Ɔwɔ kɛ bɛnwu mekɛ nee ɛleka kɛnlɛma mɔɔ bɛbayɛ ye la. Ɔwɔ kɛ bɛnyia nza nee paano mɔɔ fɛta mɔɔ bɛbava bɛayɛ la. Ɔwɔ kɛ bɛnea kɛ bɛziezie ɛleka mɔɔ bɛbayia la bɛwie. Ɔwɔ kɛ ahenle mɔɔ bamaa ɛdendɛlɛ ne la siezie ɔ nwo kpalɛ, na bɛkile menli mɔɔ bava aleɛ ne ava menli ne anyunlu yɛɛ menli mɔɔ balie nyɛvolɛ kɛzi bɛbayɛ bɛ gyima ne la. Yɛdie yɛdi kɛ bɛlumua bɛyɛ ninyɛne ɛhye mɔ. Ɛkpɔnedeɛ ne mɔɔ bɛbalua zo bɛalie yɛ ngoane la anwo anyezɔlɛ ka yɛ maa yɛsiezie yɛ nwo yɛmaa ɛvoyialilɛ nwuanzanwuanza ɛhye.—1 Pita 1:8, 9.
3. Kɛ ɔkɛyɛ na yɛaziezie yɛ nwo yɛamaa Awulae Nɔsolɛ Aleɛ ne ɛ?
3 Siezie Ahonle Ne: Ɔhyia noko kɛ yɛsiezie yɛ ahonle amaa yɛade nvasoɛ mɔɔ wɔ Ngakyelɛlilɛ ne azo la abo. (Ɛzl. 7:10) Amaa yɛahola yɛayɛ zɔ la, ɔwɔ kɛ yɛnyia mekɛ yɛfa yɛsuzu Ngakyelɛlilɛ Baebolo ɛgengalɛ titile ne anwo na yɛsuzu Gyisɛse azɛlɛ ye azo mekɛ mɔɔ li awieleɛ la anwo. Saa yɛdwenledwenle Gyisɛse anwofamaa sunsum ne anwo a ɔbaha yɛ yeamaa yɛazukoa ye.—Gal. 2:20.
4. Ɛkpɔnedeɛ ne azo nvasoɛ boni a maa ɛ nye die kpole a?
4 Kolaa na yɛawie ɛvoyialilɛ ne nee mekɛ mɔɔ yɛkɛwie la, saa yɛdwenledwenle nvasoɛ mɔɔ wɔ ɛkpɔnedeɛ ne azo la anwo a ɔbamaa yɛ nye alie kpole. Yɛnva mekɛ ɛhye yɛndo ɛkponle anzɛɛ yɛngɛlɛ edwɛkɛ wɔ moba zo kɛ yɛfa yɛayɛ yɛ gɔnwo mɔ mo. Emomu, ɔle mekɛ mɔɔ yɛ nuhua ko biala fa dwenledwenle ninyɛne nwo a. Kelaese ewule ne bua Gyihova tumililɛ ne benle. Ɔdie yɛ ɔfi ɛtane nee ewule nu. (1 Dwɔn 2:2) Ɔmaa anzondwolɛ tɛnla yɛ nee Nyamenle avinli na yɛnyia dahuu ngoane. (Kɔl. 1:21, 22) Eza ɔboa ɔmaa kpɔkɛ mɔɔ yɛbɔ kɛ yɛbɔ yɛ ɛbɛla kɛ menli mɔɔ yɛyila yɛ nwo zo yɛmaa Gyihova na yɛagyinla kpundii kɛ Kelaese ɛdoavolɛma la anu mia kpalɛ. (Mat. 16:24) Ɔrɛla ye kɛ ɛbava anyelielɛ kpole wɔaziezie ɛ nwo wɔamaa Ngakyelɛlilɛ ne mɔɔ ɛlɛba la!