Ninyɛne Bulu Nee Nwiɔ Mɔɔ Maa Yɛdi Daselɛ La

Duzu ati a yɛbɔ edwɛkpa ne nolo na yɛkilehile ɛ? Asoo ahonlekpalɛma mɔɔ yɛboa bɛ yɛamaa bɛalua ngoane adenle ne anu la a hyia yɛ titile a? (Mat. 7:14) Yemɔ a le debie mɔɔ lumua mɔɔ bɛhile wɔ ɔ bo ɛkɛ ne a, noko tɛ yemɔ a le nuhua titile ne a. Ninyɛne 12 mɔɔ doɔdoa zo mɔɔ maa yɛkɔ daselɛlilɛ la boni a ɛsuzu kɛ nwolɛ hyia kpalɛ a?

1. Ɔboa ɔmaa bɛdie menli ngoane.—Dwɔn 17:3.

2. Ɔbɔ ɛtanevolɛma kɔkɔ.—Yiz. 3:18, 19.

3. Ɔboa ɔmaa Baebolo ngapezo ba nu.—Mat. 24:14.

4. Ɔmaa Nyamenle tenleneyɛlɛ ne da ali. Awie biala ɛnrɛhola ɛnrɛha kɛ Gyihova ammaa ɛtanevolɛma adenle kɛ bɛnlu bɛ nwo kolaa na yeazɛkye bɛ.—Gyi. 17:30, 31; 1 Tem. 2:3, 4.

5. Ɔmaa yɛdi ɛzonlelilɛ mɔɔ yɛlɛ kɛ yɛfa sunsum nu moalɛ yɛamaa menli mɔɔ bɛva Gyisɛse mogya ne bɛdɔ bɛ la anwo gyima.—Wulo. 1:14, 15.

6. Ɔmmaa yɛnli mogya nwo ɛzonle.—Gyi. 20:26, 27.

7. Ɔle debie mɔɔ ɔwɔ kɛ yɛyɛ na yɛanyia ngoane.—Yiz. 3:19; Wulo. 10:9, 10.

8. Ɔkile ɛlɔlɛ mɔɔ yɛlɛ yɛmaa yɛ gɔnwo la.—Mat. 22:39.

9. Ɔmaa yɛtie Gyihova nee ɔ Ra ne.—Mat. 28:19, 20.

10. Ɔboka yɛ ɛzonlenlɛ ne anwo.—Hib. 13:15.

11. Ɔmaa Nyamenle anwo ɛlɔlɛ mɔɔ yɛlɛ la da ali.—1 Dwɔn 5:3.

12. Ɔboa ɔmaa bɛte Gyihova duma ne anwo.—Aye. 43:10-12; Mat. 6:9.

Nɔhalɛ nu, tɛ ninyɛne ɛhye angome ala ati a yɛkɔ daselɛlilɛ a. Kɛ neazo la, daselɛlilɛ maa yɛnyia diedi kpole na ɔmaa yɛnyia adenle yɛyɛ Nyamenle agɔnwo gyimayɛvoma. (1 Kɔl. 3:9) Noko akee, debie mɔɔ hyia kpalɛ mɔɔ ɔti yɛkɔ daselɛlilɛ la a le mɔɔ tɔ zo 12 la. Saa bɛtie yɛ o, bɛandie yɛ o, daselɛlilɛ ne boa maa bɛte Nyamenle duma nwo, na ɔmaa Gyihova nyia edwɛkɛ bua ahenle mɔɔ tendɛ tia ye la. (Mrɛ.  27:11) Nɔhalɛ nu, yɛlɛ debie mɔɔ ɔti ɔwɔ kɛ yɛkɔ zo ‘yɛbɔ edwɛkɛ ne nolo dahuu a.’—Gyi. 5:42.