Yɛ Ɛzonlenlɛ Gyima Ne—Ɔkile Ɛlɔlɛ Mɔɔ Yɛlɛ Yɛmaa Nyamenle La
1. Duzu a Nyamenle anwo ɛlɔlɛ hanle Gyisɛse manle ɔyɛle a?
1 Ɛlɔlɛ hanle Gyisɛse manle ɔyɛle ye ɛzonlenlɛ gyima ne. Gyisɛse ɛzonlenlɛ gyima ne afoa biala di ɛlɔlɛ mɔɔ ɔlɛ ɔmaa Gyihova la anwo daselɛ bɔkɔɔ. Gyisɛse hanle kɛ: “Ɔwɔ kɛ ewiade nwu kɛ mekulo Selɛ ne; yemɔti meyɛ debie biala mɔɔ ɔkɛze me la.” (Dwɔn 14:31) Kɛ menli mɔɔ li Gyisɛse anzi la, yɛdayɛ noko yɛlɛ adenle yɛkile ɛlɔlɛ kpole mɔɔ yɛlɛ yɛmaa Nyamenle la wɔ yɛ ɛzonlenlɛ gyima ne anu.—Mat. 22:37; Ɛfɛ. 5:1, 2.
2. Kɛzi Gyihova anwo ɛlɔlɛ ka yɛ ɛzonlenlɛ gyima ne ɛ?
2 “Wɔ Duma Nwo Ɛde”: Saa yɛbɔ mɔdenle yɛdua adenle biala mɔɔ yɛkɛnyia la azo yɛka Gyihova nee ye Belemgbunlililɛ ne anwo edwɛkɛ yɛkile awie mɔ a, ɔkile kɛ yɛlɛ Nyamenle anwo ɛlɔlɛ na ɛnee yɛlɛboa yɛamaa bɛade ye duma ne anwo. (Edw. 83:18; Yiz. 36:23; Mat. 6:9) Kɛmɔ ɛnee Gyisɛse ɛzonlenlɛ gyima ne de la, zɔhane ala a yɛ ɛzonlenlɛ gyima ne kɔ zo kile ɛhulolɛ mɔɔ yɛlɛ kɛ Gyihova duma ne anwo bade na bɛayɛ ye ɛhulolɛdeɛ wɔ azɛlɛ ye azo la a.—Mat. 26:39.
3. Adenle boni azo a Gyihova anwo ɛlɔlɛ boa maa yɛdi ngyegyelɛ zo konim ɛ?
3 Ɛlɔlɛ Ka Yɛ Maa Yɛdi Ngyegyelɛ Zo Konim: Debie biala ɛnzi Gyihova anwo ɛlɔlɛ adenle. (1 Kɔl. 13:4, 7) Gyisɛse yiale ngyegyelɛ dɔɔnwo wɔ ye ɛbɛlabɔlɛ nu mɔɔ anrɛɛ ɔbahola yeamaa yeagyakyi ye ɛzonlenlɛ gyima ne a. Noko akee, mekɛ mɔɔ ɔyiale ngyegyelɛ ne mɔ la, Gyihova anwo ɛlɔlɛ kpole nee ɛhulolɛ mɔɔ ɔlɛ kɛ ɔyɛ ye ɛhulolɛdeɛ la boale ye manle ɔlile zolɛ konim. (Mak. 3:21; 1 Pita 2:18-23) Yɛdayɛ noko yɛyia ngyegyelɛ dɔɔnwo mɔɔ Nyamenle anwo ɛlɔlɛ baboa yeamaa yɛali zolɛ konim a. Saa yɛdi Kelaese neazo ne azo kpalɛ a, yɛbahola yɛabɔ mɔdenle biala yɛayɛ yɛ ɛzonlenlɛ gyima ne. Abusua nu dwazotia, anwodolɛ, kpanyinliyɛlɛ, anzɛɛ edwɛkɛ ne mɔɔ menli anye ɛnlie nwo la bahola aha yɛ ɛdeɛ, noko ɔnrɛmaa yɛnrɛgyakyi yɛ ɛlɔlɛ mɔɔ yɛkile yɛamaa Gyihova na ɔlua zo yɛayɛ yɛ ɛzonlenlɛ gyima ne kpalɛ wɔ adenle biala azo la.
4. Nwolɛ adenle boni a Gyihova anwo ɛlɔlɛ mɔɔ yɛlɛ la maa yɛnyia a?
4 Ɛlɔlɛ lɛ tumi, na bɛyila yɛ kɛ yɛkola yɛkile yɛ ahonle muala nu ɛlɔlɛ yɛmaa Nyamenle wɔ yɛ ɛzonlenlɛ gyima ne anu. (1 Kɔl. 13:13) Mekɛ mɔɔ yɛlɛbikye mekɛ mɔɔ bɛbade Gyihova duma ne anwo bɔkɔɔ la, ɔrɛla ye kɛ, ‘yɛbanyia ɛhulolɛ kpole.’—Fel. 1:9; Mat. 22:36-38.