Jehovah’s Witnesses—Faith in Action, Part 1: Out of Darkness
Wɔ Baebolo ne anu, wienyi nee nɔhalɛ a lua, yɛɛ awozinli nee adalɛ a lua a. (Edw. 43:3; Aye. 5:20) Seetan vale awozinli rale ewiade wɔ mekɛ mɔɔ ɔbɛlɛbɛlale Yive la, na awieleɛ bɔkɔɔ ne ɔvale alesama kɔsɔɔti ɔhɔle awozinli nu. (Yek. 12:9) Video ne mɔɔ se, Jehovah’s Witnesses—Faith in Action, Part 1: Out of Darkness la maa yɛnwu kɛzi sunsum nu wienyi ne bɔle ɔ bo vile awozinli ne anu la. (Aye. 60:1, 2) Saa ɛnea video ne ɛwie a, asoo ɛbahola wɔabua kpuyia ɛhye mɔ?
(1) Kɛzi awozinli ne bɔle ɔ bo kɛ ɔba wɔ ɛzoanvolɛ ne mɔ ewule nzi ɛ? (2) Ɛvolɛ 1100 mɔɔ ba la, duzu a hɔle zo, mɔɔ boale menli manle bɛnwunle kɛ asɔne ne mɔ ɛngilehile nɔhalɛ ne ɛ? (3) Duzu a yɛze ye wɔ Henry Grew nee George Storrs anwo a? (4) Duzu a zile Charles Russell ɛbɛlabɔlɛ nu mɔɔ boale ye a? (5) Kɛzi Adiema Russell, ye papa nee ɔ gɔnwo mɔ ekyi yɛle bɛ Baebolo ɛzukoalɛ ne ɛ, na duzu a bɛluale Ngɛlɛlera ne azo bɛnwunle ye a? (6) Kɛzi Baebolo ɛzukoalɛ ekpunli ɛhye nee Nelson Barbour’s ekpunli ne bɔle nu ɛ, noko duzu a manle Adiema Russell hwenle ɔ nwo a? (7) Duzu a zile wɔ July 1879 mɔɔ manle sunsum nu wienyi fofolɛ bɔle ɔ bo a? (8) Ɛhye anzi, duzu a Baebolo Sukoavoma mɔɔ bɛ nwo ɛlɛso la yɛle manle edwɛkpa ne anu dɛlɛle a? (9) Ɛvolɛ dɔɔnwo na yeara la, duzu a Baebolo Sukoavoma nwunle kɛ ɔbazi wɔ 1914 a? (10) Adiema Russell ewule ne anzi, ngyegyelɛ boni a Baebolo Sukoavoma yiale a? (11) Mekɛ mɔɔ bɛyele Adiema Rutherford nee ɔ gɔnwo mɔ bɛvile efiade la, duzu a Baebolo Sukoavoma ne yɛle a? (12) Kɛzi video ɛhye mɔɔ wɔnlea la ɛmaa wɔnyia anyezɔlɛ kpole wɔmaa Gyihova ahyehyɛdeɛ ne ɛ? (13) Kɛzi video ɛhye ɛmaa kpɔkɛ mɔɔ wɔbɔ kɛ ɛkɔ zo wɔali daselɛ ɔnva nwo ngyegyelɛ biala la ɛyɛ kpole ɛ? (14) Kɛzi yɛbahola yɛava video ɛhye yɛaboa yɛ nwo amra, Baebolo sukoavoma nee awie mɔ ɛ?
Nea sunsum nu agyapadeɛ mɔɔ sonle bolɛ mɔɔ alumua Baebolo Sukoavoma gyakyile manle yɛ a! Bɛvale akɛnrasesebɛ bɛbɔle mɔdenle bɛmanle wienyi ne dale wɔ ewiade mɔɔ wɔ sunsum nu awozinli nu la anu. Bɛmaa yɛzukoa bɛ neazo ne amaa yɛahɔ zo yɛabɔ yɛ “ɛbɛla kɛ menli mɔɔ wɔ wienyi nu la.”—Ɛfɛ. 5:8.