Ɔwɔ Kɛ Keleseɛne Azonvolɛ Yɛ Asɔne
1. Duzu a hyia na yɛahola yɛayɛ yɛ ɛzonlenlɛ gyima ne ɛ?
1 Yɛ ngomekye yɛnrɛhola ɛzonlenlɛ gyima ne yɛ. Gyihova a maa yɛ anwosesebɛ maa yɛyɛ gyima ne a. (Fel. 4:13) Ɔfa ye anwumabɔvolɛ ne mɔ ɔdi gyima ɔmaa bɛboa yɛ bɛmaa yɛkpondɛ menli mɔɔ le kɛ mboane la. (Yek. 14:6, 7) Gyihova a maa nɔhalɛ ne anwo ma mɔɔ yɛdua na yɛgua zolɛ nzule la nyi a. (1 Kɔl. 3:6, 9) Nea kɛzi nwolɛ hyia kɛ Keleseɛne azonvolɛ kɛva bɛ nwo kɛdo yɛ anwuma Selɛ ne anwo zo wɔ asɔneyɛlɛ nu a!
2. Ninyɛne boni mɔ a ɔwɔ kɛ yɛyɛ nwolɛ asɔne a?
2 Yɛmaa Yɛ Nwo: Ɔwɔ kɛ yɛyɛ asɔne mekɛ biala mɔɔ yɛlɛbɔ edwɛkpa ne nolo la. (Ɛfɛ. 6:18) Duzu ninyɛne a ɔwɔ kɛ yɛyɛ nwolɛ asɔne a? Yɛbahola yɛayɛ subane kpalɛ nee akɛnrasesebɛ mɔɔ ɔwɔ kɛ yɛnyia wɔ yɛ azɛlɛsinli ne anu la anwo asɔne. (Gyi. 4:29) Yɛbahola yɛazɛlɛ Gyihova kɛ ɔhile yɛ adenle ɔmaa yɛhɔ menli mɔɔ lɛ ahonle kpalɛ mɔɔ yɛbahola yɛ nee bɛ azukoa Baebolo ne la ɛkɛ. Saa suamenle bie biza yɛ kpuyia a, yɛbahola yɛayɛ asɔne sikalɛ wɔ yɛ ti anu yɛazɛlɛ Gyihova kɛ ɔboa yɛ ɔmaa yɛva mualɛ kpalɛ yɛmaa ye. (Nih. 2:4) Yɛbahola yɛazɛlɛ kɛ ɔmaa yɛ nrɛlɛbɛ amaa yɛahola yɛayɛ ɛzonlenlɛ gyima ne dahuu. (Gye. 1:5) Bieko, wɔ yɛ asɔneyɛlɛ nu saa yɛyɛ Gyihova mo wɔ nwolɛ adenle mɔɔ yɛnyia ye kɛ yɛle ye azonvolɛ la anwo a ɔ nye die.—Kɔl.3:15.
3. Kɛzi asɔne mɔɔ yɛyɛ yɛmaa awie mɔ la maa nolobɔlɛ gyima ne nyia anyuhɔlɛ ɛ?
3 Yɛmaa Awie Mɔ: Ɔwɔ kɛ yɛyɛ asɔne yɛmaa yɛ nwo ngoko, saa ɔbayɛ boɛ a yɛbahola yɛabɔ yɛ mediema azonvolɛ duma wɔ yɛ asɔneyɛlɛ nu. (Gye. 5:16; Gyi. 12:5) Asoo anwodolɛ ɛmmaa ɛngola ɛnyɛ dɔɔnwo wɔ nolobɔlɛ gyima ne anu ɔ? Ɛnee yɛ asɔne maa ɛ mediema azonvolɛ mɔɔ bɛte kpɔkɛ la. Mmabu mɔɔ wɔ asɔneyɛlɛ bayɛ amaa awie mɔ la debie ekyi! Eza ɔle kpalɛ kɛ yɛkɛyɛ asɔne yɛkɛmaa menli mɔɔ tumi wɔ bɛ sa nu la amaa bɛanyia nolobɔlɛ gyima ne anwo adwenle kpalɛ, na yɛ mediema ‘nwo adɔ bɛ na bɛava anzondwolɛ bɛabɔ bɛ ɛbɛla.’—1 Tem. 2:1, 2.
4. Duzu ati a ɔwɔ kɛ yɛyɛ asɔne dahuu a?
4 Edwɛkpa ne mɔɔ yɛbɔ ye nolo wɔ aleɛabo amuala la le gyima ɛsesebɛ. Saa yɛyɛ “nzɛlɛlɛ dahuu” a, ɔlua Gyihova moalɛ zo yɛbawie gyima ne.—Wulo. 12:12.