“Bɛla Badoa Me”
1. Nwolɛ adenle boni a Asafo Baebolo Ɛzukoalɛ ne bamaa yɛanyia wɔ siane ne mɔ mɔɔ ɛlɛba la anu a?
1 Gyisɛse azɛlɛ ye azo ɛbɛlabɔlɛ nwo edwɛkɛ mɔɔ wɔ Edwɛkpa nna ne anu la maa yɛnwu Nyamenle Ra ne kpalɛ kpalɛ. Kɛmɔ ɔwɔ kɛ Keleseɛnema fa “ɔ gyakɛ” la ati, yɛkulo kɛ yɛsiezie yɛ nwo kpalɛ na yɛtie ye boɛ wɔ mekɛ mɔɔ yɛlɛsukoa buluku ne mɔɔ ati se “Bɛla Badoa Me” wɔ Asafo Baebolo Ɛzukoalɛ bo wɔ dapɛne ne mɔɔ bɔ ɔ bo March 1 la. (1 Pita 2:21; Mak. 10:21) Ninyɛne mɔɔ fɛta kɛ yɛsuzu nwolɛ titile la a le Gyisɛse ɛbɛlabɔlɛ afoa ne mɔ mɔɔ bamaa yɛ anwosesebɛ wɔ yɛ ɛzonlenlɛ gyima ne anu la.
2. Kɛ ɔkɛyɛ na kpundii mɔɔ Gyisɛse gyinlanle la aboa yɛ ɛ?
2 Neazo Mɔɔ Gyisɛse Yɛle La: Ɛ nee awie mɔɔ anye ɛnlie edwɛkɛ ne anwo la ɛyia ɛlɛ wɔ mekɛ mɔɔ ɛlɛyɛ azua nu daselɛlilɛ la ɔ? Saa yɛyia dwazotia zɛhae a, ɔmaa yɛnwu nvasoɛ mɔɔ wɔ edwɛkɛ ɛhye mɔɔ Gyisɛse hanle la azo kɛ: “Saa bɛyɛle me kpɔdekpɔde a ɛnee bɛbayɛ bɛdabɛ noko kpɔdekpɔde.” (Dwɔn 15:20) Ɔle nɔhalɛ kɛ, tɛ mualɛ kɔsɔɔti mɔɔ ɛnle kpalɛ la a kile dwazotia a. Noko akee, anyelielɛ mɔɔ ɛnee la Gyisɛse anyunlu la a boale ye manle ɔholale ɔgyinlanle sɔnea kɔsɔɔti anloa a. Yɛdayɛ noko yɛbahola yɛava yɛ adwenle yɛazie Gyihova anyunlu ɛlolɛ nee yɛ nɔhalɛlilɛ nwo ahatualɛ ne azo. Ɛhye baboa yɛ amaa ‘yɛ rɛle ambɔ anzɛɛ yɛ gyakɛ anzi antuto.’ (Hib. 12:2, 3; Mrɛ. 27:11) Mekɛ mɔɔ yɛlɛkɔ zo wɔ ɛzonlenlɛ gyima ne anu la, yɛbahola yɛanyia anwodozo kɛ Kelaese Gyisɛse baboa yɛ.—Mat. 28:20.
3. Kɛ ɔkɛyɛ na yɛazukoa kɛzi Gyisɛse bule ɛzonlenlɛ gyima ne la ɛ?
3 “Ɛhye Ati Yɛɛ Nyamenle Zoanle Me A”: Belemgbunlililɛ nolobɔlɛ gyima ne ɛnee le debie mɔɔ nwolɛ hyia wɔ Gyisɛse ɛbɛlabɔlɛ nu a. (Luku 4:43) Ɔvi atiakunlukɛnlɛma nu ɔvale ɔ nwo ɔmanle wɔ ɛzonlenlɛ gyima ne anu. Ɔbule ye kɛ nwolɛ hyia ndɛndɛ na dahuu ɔkpondɛle kɛ ɔkɛnyia adenle ɔkɛha Belemgbunlililɛ ne anwo edwɛkɛ. Kɛmɔ yɛdoa Gyisɛse la ati, nienwu a ye neazo ne bava yɛ ahɔ a? Mekɛ mɔɔ yɛlɛyɛ yɛ alehyenlɛ biala gyima la, asoo menli wɔ ɛkɛ mɔɔ yɛbahola yɛaha edwɛkpa ne yɛahile bɛ ɔ? Ɔrɛla ye kɛ Kelaese ɛlɔlɛ ne baha yɛ yeamaa yɛabɔ edwɛkpa ne nolo yɛahile menli dɔɔnwo!—2 Kɔl. 5:14.
4. Ndenle boni azo a yɛbahola yɛamaa kɛzi yɛkilehile wɔ daselɛlilɛ nu la anyia anyuhɔlɛ ɛ?
4 “Awie Biala Ɛtɛtendɛle Kɛ Nrenya Ɛhye Tendɛ La”: Adenle mɔɔ Gyisɛse luale zo hilehilele la zinle menli ne anwo. (Dwɔn 7:46; Mat. 7:28, 29) Duzu a manle ɔyɛle ngakyile ɔvile kilehilevolɛma mɔɔ ɛha la anwo a? Ɔhulole nɔhalɛ ne mɔɔ ɔhilehilele la, ɔhulole menli mɔɔ ɔhilehilele bɛ la na ɔluale ndenle ngakyile zo ɔhilehilele. Saa yɛsukoa Kilehilevolɛ Kpole ne a, ɔbamaa kɛzi yɛkilehile wɔ daselɛlilɛ nu la anyia anyuhɔlɛ.—Luku 6:40.
5. Duzu a ɔwɔ kɛ yɛfa yɛyɛ yɛ bodane wɔ mekɛ mɔɔ yɛlɛsukoa “Bɛla Badoa Me” ne la ɛ?
5 Ninyɛne ngɛnlɛma ekyi mɔɔ ɛla ali wɔ Gyisɛse ɛbɛlabɔlɛ nu la ɛne. Ninyɛne ngɛnlɛma gyɛne boni a ɛbahola wɔanwu ye a? Mekɛ mɔɔ yɛlɛsuzu Gyisɛse ɛbɛlabɔlɛ nwo wɔ Asafo Baebolo Ɛzukoalɛ ne anu la, fa yɛ wɔ bodane kɛ ɛbanwu ‘Kelaese ɛhulolɛ ne’ ɔlua ye edwɛkɛ nee ye nyɛleɛ mɔɔ ɛbazukoa la azo.—Ɛfɛ. 3:19.