Fa Wɔ ‘Ɛbɛlabɔlɛ Boka Nwo’ Boa Wɔ Sukoavoma
1. Duzu a hyia na yɛaboa Baebolo sukoavo bie ɛ?
1 Amaa yɛaboa Baebolo sukoavo bie na yeayila ɔ nwo zo la, dɔɔnwo hyia tɛla dahuu Baebolo ɛzukoalɛ mɔɔ yɛ nee ye kɛyɛ la ala. Ɛzoanvolɛ Pɔɔlo vale agɔnwolɛvalɛ mɔɔ ɛnee la menli mɔɔ ɔhilele bɛ debie avinli la dole ɛrɛladane mɔɔ ɛlɛdi ɔ mra adane la anwo. Yɛdayɛ noko, yɛ nye die kɛ yɛbava yɛ mekɛ anzɛɛ yɛ ‘ɛbɛlabɔlɛ yɛaboka nwo’ yɛaboa yɛ sukoavoma amaa bɛanyi wɔ sunsum nu.—1 Tɛs. 2:7-9.
2. Kɛmɔti a ɔwɔ kɛ yɛda ye ali kɛ yɛ nye die sukoavo ne anwo ɛ, na kɛzi yɛbahola yɛayɛ ɛhye ɛ?
2 Maa Ɛ Nye Ɛlie Ɔ Nwo: Mekɛ mɔɔ Baebolo sukoavo bie ɛlɛfa mɔɔ yezukoa yeali gyima la, ye adwenle baha ye yeamaa yeagyakyi kɛ ɔ nee menli mɔɔ ɛnli Baebolo ngyinlazo zo la kɛdu. (1 Pita 4:4) Ye abusua ne bahola akpo ye. (Mat. 10:34-36) Yɛbahola yɛaboa ye yɛamaa yeali nganeɛdelɛ ɛhye anwo gyima, ɔlua kɛzi yɛ nye balie ɔ nwo kpalɛ la azo. Edwɛkpatɛlɛvolɛ ko mɔɔ bɔ mɔdenle la tu folɛ kɛ: “Ɛ nee sukoavo ne sukoa wie a, mmayɛ ye ndɛndɛ ɛfi ɛkɛ. Saa ɔkɛyɛ boɛ a, kendɛ na fa mekɛ ekyi ɛ nee ye ɛli adwelie.” Fa moalɛ biala mɔɔ hyia la maa wɔ sukoavo ne. Kɛ neazo la, saa ɔnde kpɔkɛ a, asoo ɛbahola wɔavɛlɛ ye wɔ telefuu zo anzɛɛ wɔahɔkpɔla ye ɔ? Saa ɔfɛta a, asoo ɛ nee wɔ sukoavo ne badɛnla nwolɛ wɔ debiezukoalɛ bo na wɔazɔ ɔ mra ne mɔ bie ɔ?
3. Kɛ ɔkɛyɛ na yɛaboa yɛ sukoavo ne yɛamaa yeanyia anwosesebɛ yeavi asafo ne anu ɛ?
3 Asafo Ne Moalɛ: Saa ɛkɔ daselɛlilɛ wɔ azɛlɛsinli mɔɔ bikye wɔ sukoavo ne sua nu la anu a, duzu ati a ɛnva mekɛ ekyi na ɛngile ye ahenle mɔɔ ɛ nee ye lua nwo la ɛ? Saa ɔkɛyɛ boɛ a, to ɛ sa fɛlɛ nolobɔlɛma fofolɛ, mɔɔ mgbanyima boka nwo la, maa bɛboka ɛ nwo na bɛyɛ debiezukoalɛ ne. Bieko, ɛhyehyɛ debiezukoalɛ bie ɛwie ala a, maa wɔ Baebolo sukoavo ne anwosesebɛ kɛ ɔhɔ debiezukoalɛ wɔ Belemgbunlililɛ Asalo ɛkɛ. Ɛhye baboa yeamaa ɔ nee asafo ne anu amra mɔɔ bahola arayɛ ye sunsum nu abusua la anyia agɔnwolɛvalɛ mɔɔ maa anwosesebɛ la.—Mak. 10:29, 30; Hib. 10:24, 25.
4. Kɛzi bɛbayila yɛ mɔdenlebɔlɛ ne azo ɛ?
4 Awovolɛ mɔɔ bɔ mɔdenle boa ɔ mra sunsum nu la anye die kpole wɔ mekɛ mɔɔ bɛkɛzonle Gyihova na bɛkɛlua nɔhalɛ ne anu la. (3 Dwɔn 4) Saa yɛtu yɛ nwo yɛmaa yɛfa yɛboa yɛ Baebolo sukoavoma a, yɛbahola yɛanyia anyelielɛ ko ne ala bie.