Kpondɛ Menli Mɔɔ Lɛ Ahonle Kpalɛ La
1. Kɛzi yɛkile anyezɔlɛ wɔ nwolɛ adenle mɔɔ yɛlɛ wɔ ɛzonlenlɛ gyima ne anu la anwo ɛ?
1 Wɔ Gyisɛse ɛzonlenlɛ gyima ne anu, ɔbɔle mɔdenle ɔvale edwɛkpa ne ɔkyekyele menli mɔɔ le bɛlɛvo la arɛle. (Aye. 61:1, 2) Kɛ menli mɔɔ yɛgyi Kelaese agyakɛ anu ɛnɛ la, ɔwɔ kɛ yɛsukoa ye na yɛbɔ mɔdenle yɛkpondɛ menli mɔɔ lɛ ahonle kpalɛ mɔɔ wɔ yɛ azɛlɛsinli ne anu la.—Mat. 10:11; 2 Kɔl. 5:20.
2. Kɛzi ɛnee Pɔɔlo kakyihakyi ye daselɛlilɛ ne anu ɛ, na duzu a vi nu rale a?
2 Kakyihakyi Nuhua: Ɛnee ɔle ɛzoanvolɛ Pɔɔlo subane kɛ ɔkɛlumua ɔkɛhɔ ɛzonlenlɛ sua ne anu na ɔkɛli Dwuuma nee bɛdabɛ mɔɔ bɛnle Dwuuma la daselɛ. (Gyi. 14:1) Wɔ Felepae, Pɔɔlo nee Saelase kpondɛle menli wɔ ɛleka mɔɔ ‘ɔyɛ a bɛyia bɛyɛ nzɛlɛlɛ la.’ Bɛlumuale bɛlile mraalɛ ekpunli bie daselɛ, na bɛ nuhua ko mɔɔ bɛfɛlɛ ye Ledea la diele edwɛkɛ ne ndɛndɛ.—Gyi. 16:12-15.
3. Ɛzonlenlɛ nwo adenle boni a yɛbahola yɛanyia yɛava yɛaboka yɛ azua nu azɛlɛsinli ne anwo a?
3 Asoo ɛbahola wɔayɛ azua nu daselɛlilɛ na eza wɔali daselɛ wɔ ɛleka mɔɔ menli wɔ mɔɔ le kɛ ɛleka mɔɔ ahale gyinla, ɛnwomenlelielɛ ɛleka, gyima nu, gua zo, ɛleka mɔɔ bɛdi gua, yɛɛ ɛleka mɔɔ bɛtɔne ninyɛne wɔ wɔ azɛlɛsinli ne anu la? Bie a ɛbahola wɔalua telefuu zo wɔali menli mɔɔ de azua mɔɔ bɛlie nwolɛ la anu la daselɛ. Saa ɛgua ɛ nye aze na ɛkakyihakyi wɔ daselɛlilɛ ne anu wɔ gyinlabelɛ biala anu wɔ wɔ azɛlɛsinli ne anu a, ɔbamaa ɛ nye abolo na wɔayɛ dɔɔnwo wɔ “Awulae gyima” ne anu.—1 Kɔl. 15:58.
4. Saa yɛ asafo ne azɛlɛsinli ne le ekyi a, duzu bieko a yɛbahola yɛayɛ a?
4 Nolobɔlɛma dɔɔnwo ɛnyia nwolɛ adenle ɛbuke bɛ ɛzonlenlɛ gyima ne anu, ɔluakɛ bɛhɔle asafo fofolɛ nu wɔ bɛ maanle nu anzɛɛ maanle gyɛne zo la ati. Bie mɔ noko ɛzukoa aneɛ fofolɛ amaa bɛahola bɛali menli mɔɔ bɛvi maanle gyɛne nu la daselɛ.
5. Kɛzi ɔwɔ kɛ yɛbu mekɛ ɛhye mɔɔ yɛde nu la ɛ, na duzu a ɔwɔ kɛ yɛbɔ kpɔkɛ kɛ yɛkɛyɛ a?
5 Ɔwɔ kɛ yɛ muala yɛkakye kɛ “ɛya ne a le ewiade” ne. (Mat. 9:37; 13:38) Kɛmɔ ewiade ɛtane ɛhye awieleɛ ne ɛbikye la ati, ɔwɔ kɛ yɛ nuhua ko biala suzu ye gyinlabelɛ, ye ahyɛlɛdeɛ, nwolɛ adenle mɔɔ ɔlɛ nee mɔɔ ɔbahola yeayɛ yeava yɛabuke ye ɛzonlenlɛ gyima ne anu la anwo kpalɛ. Gyihova ɛbɔ yɛ ɛwɔkɛ kɛ saa yɛfa Belemgbunlililɛ ne yɛdumua a, ɔbayila mɔdenle mɔɔ yɛlɛbɔ kɛ yɛbuke yɛ ɛzonlenlɛ gyima ne anu la azo.—Mat. 6:33.