Subane Mɔɔ Hyia Kpole Kɛ Kilehilevolɛ Kpalɛ Nyia La
1. Subane boni a hyia kpole kɛ kilehilevolɛ kpalɛ nyia a?
1 Duzu a boa awie maa ɔkilehile Baebolo ne kpalɛ a? Ewiade nwomazukoalɛ? Anwubielɛ? Mɔdenlebɔlɛ? Nɔhalɛ nu, yemɔ a le subane ko ne ala mɔɔ maa Mɛla ne ba nu, na ɔmaa bɛnwu Gyisɛse ɛdoavolɛma la, yemɔ a le Gyihova subane titile ne anu mɔɔ lumua na ɔyɛ anyelielɛ a. (Dwɔn 13:35; Gal. 5:14; 1 Dwɔn 4:8) Yemɔ a le ɛlɔlɛ. Kilehilevolɛma kpalɛ da ɛlɔlɛ ali.
2. Duzu ati a ɔhyia kɛ yɛnyia menli nwo ɛlɔlɛ a?
2 Kulo Menli: Gyisɛse, Kilehilevolɛ Kpole ne nyianle menli nwo ɛlɔlɛ, na ɛhye manle ɔdiele bɛ. (Luku 5:12, 13; Dwɔn 13:1; 15:13) Saa yɛdwenle menli nwo a, yɛbali daselɛ wɔ mekɛ biala anu. Ngyegyelɛ mɔɔ le kɛ kpɔdekpɔdeyɛlɛ nee anyetele la ɛnrɛzi yɛ adenle. Yɛbamaa yɛ nye alie menli mɔɔ yɛdi bɛ daselɛ la anwo, na yɛamaa adenle mɔɔ yɛdua zo yɛtendɛ la avane bɛ ngyianlɛ nwo. Saa yɛkɔ Baebolo sukoavo ko biala ɛkɛ a, yɛbanyia mekɛ yɛamaa ye na eza yɛanyia mekɛ yɛaziezie yɛ nwo yɛamaa debiezukoalɛ ko biala kolaa na yɛahɔ.
3. Kɛzi yɛkulo Baebolo ne anu nɔhalɛ ne a ɔbaboa yɛ wɔ daselɛlilɛ nu ɛ?
3 Kulo Baebolo Ne Anu Nɔhalɛ Ne: Gyisɛse eza hulole Baebolo ne anu nɔhalɛ ne na ɔbule ye kɛ ɔsonle bolɛ. (Mat. 13:52) Saa yɛlɛ nɔhalɛ ne anwo ɛlɔlɛ a, yɛbava anyelielɛ yɛadendɛ, na ɛhye bamaa yɛ tievolɛma anye alie. Ɛlɔlɛ zɛhae baboa yɛ yeamaa yɛava yɛ adwenle yɛazie edwɛkɛ mɔɔ nvasoɛ wɔ zo mɔɔ yɛlɛka la azo yɛadɛla mɔɔ yɛngola yɛnyɛ la, na ɛhye ɛnrɛmaa ɛzulolɛ ɛnrɛha yɛ wɔ daselɛlilɛ nu.
4. Kɛ ɔkɛyɛ na yɛanyia ɛlɔlɛ ɛ?
4 Nyia Ɛlɔlɛ: Kɛ ɔkɛyɛ na yɛanyia menli nwo ɛlɔlɛ ɛ? Saa yɛsuzu ɛlɔlɛ mɔɔ Gyihova nee ɔ Ra ne ɛla ye ali la anwo na yɛnea sunsum nu gyinlabelɛ ɛtane mɔɔ menli mɔɔ wɔ azɛlɛsinli ne anu wɔ nu la a ɔbamaa yɛanyia ɛlɔlɛ. (Mak. 6:34; 1 Dwɔn 4:10, 11) Saa dahuu yɛyɛ bɛtianwo debiezukoalɛ na yɛdwenledwenle nwolɛ a ɔbamaa yɛanyia Baebolo ne anu nɔhalɛ ne anwo ɛlɔlɛ. Ɛlɔlɛ le sunsum ma ne foa. (Gal. 5:22) Yemɔti yɛbahola yɛabodo Gyihova kɛ ɔmaa yɛnyia sunsum nwuanzanwuanza na yɛazɛlɛ ye kɛ ɔboa yɛ ɔmaa yɛnyia ɛlɔlɛ kpole. (Luku 11:13; 1 Dwɔn 5:14) Ɔnva nwo kɛzi yɛ nwomazukoalɛ, anwubielɛ mɔɔ yɛnyia wɔ nɔhalɛ ne anu anzɛɛ yɛ mɔdenlebɔlɛ de la, saa yɛda ɛlɔlɛ ali a yɛbahola yɛahilehile Baebolo ne anu kpalɛ.