Kilehile Maa Nuhua Ɛla Ɛkɛ
1. Ngilehilelɛ kpalɛ mɔɔ nuhua la ɛkɛ la foa mɔɔ hyia la a le boni?
1 Adenle sikalɛ mɔɔ bɛdua zo bɛkilehile la boa menli maa bɛsukoa. Saa yɛsuzu adenle mɔɔ Gyisɛse mɔɔ le Kilehilevolɛ Kpole ne la luale zo hilehilele la anwo a, ɔbaboa yɛ yeamaa ‘yɛahilehile kpalɛ.’—2 Tem. 4:2; Dwɔn 13:13.
2. Ngilehilelɛ mɔɔ nuhua la ɛkɛ la kile duzu, na tumi boni a wɔ nu a?
2 Tendɛ Maa Nuhua Ɛla Ɛkɛ: Nɔhalɛ edwɛkɛ mɔɔ anwo hyia mɔɔ bɛha ye ɛlɛ la bie mɔ wɔ Boka ne azo Edwɛkpa ne anu, na bɛhanle ɔ muala bɛmanle nuhua lale ɛkɛ. (Mat., tile 5-7) Gyisɛse “ngilehilelɛ ne zinle menli dɔɔnwo ne anwo.” Sinzavolɛma mɔɔ bɛzoanle bɛ kɛ bɛhɔhye ye la bɔbɔ buale kɛ: “Awie biala ɛtɛtendɛle kɛ nrenya ɛhye tendɛ la.” (Mat. 7:28, 29; Dwɔn 7:46) Ɔngyia kɛ yɛka edwɛkɛ mgbole mɔɔ ɔbo ɛdelɛ yɛ se anzɛɛ yɛfa fatonwo ndendenle yɛkilehile edwɛkɛ nu na yɛamaa awie mɔ ade nɔhalɛ ne abo. Yɛbahola yɛava ninyɛne mɔɔ bɛze la yɛahilehile nɔhalɛ ne anu wienyi.
3. Kɛmɔti a bie mɔ babɔ mɔdenle kɛ bɛka edwɛkɛ dɔɔnwo bɛahile bɛ tievolɛma ɛ, na kɛzi bɛbahola bɛahoati ɛhye ɛ?
3 Suzu Dodo ne Anwo: Gyisɛse zuzule ye tievolɛma ne anwo amaa yeanwu edwɛkɛ dodo mɔɔ ɔwɔ kɛ ɔka ɔkile bɛ la. (Dwɔn 16:12) Ɔwɔ kɛ yɛdayɛ noko yɛnwu yɛ tievolɛma ngyianlɛ na yɛdi nwolɛ gyima, titile wɔ mekɛ mɔɔ yɛlɛdi yɛ nwo amra, anyelielɛma mɔɔ bɛle fofolɛ anzɛɛ ngakula daselɛ la. Ɔwɔ kɛ yɛnea boɛ na yɛanga edwɛkɛ dɔɔnwo yɛangile bɛ wɔ mekɛ bɔbɔ mɔɔ le kɛ asɛɛ bɛlɛtie yɛ la. Menli mɔɔ lɛ ahonle kpalɛ la bahɔ zo anyia nɔhalɛ Nyamenle Gyihova anwo ndelebɛbo.—Dwɔn 17:3; 1 Kɔl. 3:6.
4. Duzu ati a ɔhyia kɛ yɛkɛhwe adwenle yɛkɛhɔ edwɛkɛtitile ne mɔ azo tɛla kɛ yɛkɛha edwɛkɛ dɔɔnwo ɛ?
4 Twe Adwenle Kɔ Edwɛkɛtitile ne mɔ Azo: Gyisɛse anga ninyɛne dɔɔnwo anwo edwɛkɛ wɔ mekɛ mɔɔ ɛnee ɔlɛkilehile la. Mekɛ mɔɔ ɔhanle kɛ, ‘Mɔwuamra amuala vi bɛ nla ne mɔ anu bɛbavinde la,’ yeanga mɔɔ bado menli ekpunli nwiɔ ne mɔɔ bɛbadwazo bɛ la anwo edwɛkɛ dɔɔnwo. (Dwɔn 5:28, 29) Saa yɛlɛyɛ Baebolo ɛzukoalɛ a, ɔwɔ kɛ yɛtwe adwenle yɛkɔ edwɛkɛtitile ne mɔ azo na yɛgyakyi kɛ yɛkɛva edwɛkɛ dɔɔnwo mɔɔ anwo ɛngyia la yɛkɛboka nwo.
5. Saa yɛkilehile yɛmaa nuhua da ɛkɛ a nyilalɛ boni a yɛbanyia a?
5 Nea kɛzi yɛ nye die kɛ Gyihova ɛhilehile debie biala mɔɔ ɔwɔ kɛ yɛnwu ye la anu wienyi ɛ! (Mat. 11:25) Ɔrɛla ye kɛ yɛbazukoa kɛzi yɛkilehile yɛmaa nuhua da ɛkɛ la, amaa yɛ nye alie kɛ yɛ ɛzonlenlɛ gyima ne ɛlɛso ma la.