Mɔlebɛbo ne, ɛnee abɔdeɛ muala de koyɛlɛ nee anzodwolɛ nu

Kɛmɔti A Yɛhyia Nyamenle Belemgbunlililɛ Ne Ɛ?

Wɔ alesama mɔlebɛbo, ɛnee yɛ Bɔvolɛ ne mɔɔ bɛfɛlɛ ye Gyihova la angome a di tumi a. Ɔlile tumi wɔ ɛlɔlɛ nu. Ɔyɛle tola kɛnlɛma bie wɔ Yidɛn kɛ alesama ɛdɛnla nu. Ɔmaanle bɛ aleɛ dɔɔnwo. Eza ɔmaanle bɛ gyima kpalɛ kɛ bɛyɛ. (Gyɛnɛsese 1:28, 29; 2:8, 15) Saa alesama veale Nyamenle ɛlɔlɛ tumililɛ bo a, anrɛɛ yɛtɛdɛ anzodwolɛ.

Adam lɛ bakama ne mɔɔ bɛdua bɛ kɛ bɛmmadi la ɔ sa nu. — Alesama mɔɔ limoa la dele Nyamenle Tumililɛ nwo atua

Baebolo ne ka kɛ anwumabɔvolɛ bie dele atua tiale adenle mɔɔ Nyamenle lɛ di tumi la, na bɛravɛlɛle ye Seetan Abɔnsam. Ɔhilele kɛ alesama ɛngyia Nyamenle adehilelɛ nee ye tumililɛ na bɛ nye alie. Ɔyɛ alɔbɔlɛ kɛ, yɛ awovolɛ mɔɔ bɛlimoa, Adam nee Yive zukoale Seetan na bɛdele Nyamenle anwo atua la.—Gyɛnɛsese 3:1-6; Yekile 12:9.

Kɛmɔ Adam nee Yive kpole Nyamenle kɛ bɛ Tumivolɛ la ati, bɛ Paladaese awuke ne yɛɛ dahuu ngoane mɔɔ kpɔkɛdelɛ mɔɔ di munli boka nwo la bɔle bɛ. (Gyɛnɛsese 3:17-19) Bɛ kpɔkɛzilɛ ne vale ngyegyelɛ rɛlɛle bɛ bo zo amra. Baebolo ne ka kɛ, Adam ɛtane ne ati, “ɛtane rale ewiade na ewule luale ɛtane nwo zo rale.” (Wulomuma 5:12) Eza ɔlua ɛtane ti: “Sonla di sonla nwo zo tumi maa ɔnwu amaneɛ.” (Nolobɔvo 8:9) Kile kɛ, sonla di sonla nwo zo tumi a, ngyegyelɛ ngome.

DASANLI TUMILILƐ MƆLEBƐBO

Nemelɔdo gyi ye adubɛnwo nu. Menli ɛlɛsi sua wɔ ɔ nzi nehane. — Nemelɔdo dele Gyihova anwo atua

Sonla mɔɔ limoa mɔɔ Baebolo ne bɔle ye duma kɛ ɔlile tumi la a le Nemelɔdo. Na ɔdwazole ɔtiale Gyihova tumililɛ. Ɔvi Nemelɔdo mekɛ zo mɔɔ ba la, menli mɔɔ lɛ tumi la ɛnva ɛnli gyima wɔ adenle kpalɛ zo. Ɛvolɛ 3,000 mɔɔ ɛze ɛhɔ la, Belemgbunli Sɔlɔmɔn hanle kɛ: “Menwunle menli mɔɔ bɛlɛsisi bɛ la monle, na awie ɛnle ɛkɛ mɔɔ kyekye bɛ rɛle a. Menli mɔɔ ɛlɛsisi bɛ la lɛ tumi.”—Nolobɔvo 4:1.

Ninyɛne ɛtɛkakyile ɛnɛ. Wɔ 2009, Maamgbole Koyɛlɛ Eku ne buluku bie hanle kɛ, tumililɛ mɔɔ bɛnva bɛnli gyima kpalɛ la “boka ninyɛne mɔɔ maa ninyɛndane kɔ zo wɔ ewiade la anwo.”

MEKƐ ƐDWU KƐ BƐYƐ NWOLƐ DEBIE!

Alesama hyia tumivolɛ kpalɛ yɛɛ arane kpalɛ. Na ɛhye a yɛ Bɔvolɛ ne ɛbɔ nwolɛ ɛwɔkɛ a!

Nvoninli: Mɔɔ ɛvi sonla tumililɛ nu ɛra la. 1. Asia raalɛ bie de evinli nu wɔ gua zo na ɔ ra la ɔ gyakɛ azo ɛlɛsu. 2. Nrenyia kpanyinli bie mɔɔ ɛnde kpɔkɛ la la asopiti ɛkpa zo. 3. Sogyama ɛlɛtoto adu. 4. Atuadelɛma bie ɛlɛteɛdea nu. 5. Raalɛ bie nee ɔ ra raalɛ gyi bɛ sua ne anyunlu na bɛnwu ye kɛ bɛ anlenkɛ ne neanleɛ ne ɛbɔ. 6. Suakpole bie mɔɔ zolɛ le esike nee ninyɛne mɔɔ fa esike ne kɔ anwuma yɛɛ laete nyɛma ngakyile ngome la. — Sonla arane mɔɔ ɔse ɔle kpalɛ bɔbɔ la, angola anli alesama ngyegyelɛ nwo gyima

Nyamenle ɛva Belemgbunlililɛ anzɛɛ arane bie ɛzie ɛkɛ mɔɔ ɔbagyinla alesama tumililɛ muala agyakɛ anu a, na “ɔ ngomekye a ɔbagyinla ɛkɛ ne dahuu a.” (Daneɛle 2:44) Ɛhye a le Belemgbunlililɛ ne mɔɔ menli mgbe dɔɔnwo yɛ nwolɛ asɔne la. (Mateyu 6:9, 10) Noko tɛ Nyamenle mumua ne a bali arane ɛhye azo a. Emomu, yekpa awie mɔɔ yedɛnla aze ɛlɛ kɛ dasanli la kɛ zolɛ Tumivolɛ. Nwane ɔ?