ƐZUKOALƐDEƐ 8
Duzu Ati A Nyamenle Maa Amaneɛnwunlɛ Nwo Adenle A?
1. Kɛzi ɛtaneyɛlɛ bɔle ɔ bo ɛ?
Nyamenle ɛmaa alesama ɛli tumi mekɛ tendenle yemaa yela ali kɛ bɛnlɛ alesama ngyegyelɛ ne sɔbelɛ
Seetan bɔle adalɛ mɔɔ limoa la yɛɛ ɛtaneyɛlɛ bɔle ɔ bo wɔ azɛlɛ ye azo a. Ɛnee Seetan le anwumabɔvolɛ mɔɔ di munli, noko “yeandɛnla nɔhalɛ ne anu.” (Dwɔn 8:44) Ɔ nye bolole ɛzonlenlɛ mɔɔ le Nyamenle angome ɛdeɛ la. Seetan bɔle adalɛ hilele Yive na ɔmaanle ɔdiele ye ɔgyakyile Nyamenle. Adam nee Yive andie Nyamenle. Adam kpɔkɛzilɛ ne vale amaneɛnwunlɛ nee ewule rale.—Kenga Gyɛnɛsese 3:1-6, 19.
Mɔɔ Seetan hanle kɛ Yive mmatie Nyamenle la, ɛnee ɔlɛmaa bɛade Nyamenle tumililɛ anzɛɛ ye tumi mɔɔ ɔlɛ kɛ Anwuma Anwumanli la anwo atua. Menli dɔɔnwo nee Seetan ɛyɛ ko na bɛkpo Nyamenle kɛ bɛ Belemgbunli. Ɛhye ati, Seetan a “nea ewiade ye azo” a.—Kenga Dwɔn 14:30; 1 Dwɔn 5:19.
2. Asoo Nyamenle ambɔ ninyɛne boɛ?
Nyamenle gyima kɔsɔɔti di munli. Menli nee anwumabɔvolɛma mɔɔ Nyamenle bɔle bɛ la kola tie Nyamenle. (Ditilɔnomi 32:4, 5) Nyamenle bɔle yɛ wɔ adenle mɔɔ maa yɛkola yɛkpa kɛ yɛbayɛ kpalɛ anzɛɛ ɛtane la azo. Ɛhye maa yɛkola yɛda ɛlɔlɛ mɔɔ yɛlɛ yɛmaa la Nyamenle ali.—Kenga Gyemise 1:13-15; 1 Dwɔn 5:3.
3. Duzu ati a Nyamenle ɛmaa amaneɛnwunlɛ nwo adenle a?
Gyihova ɛmaa bɛde ye tumililɛ ne anwo atua wɔ mekɛ ekyi anu. Duzu ati ɔ? Amaa yeala ali kɛ tumililɛ biala mɔɔ ɛnvi ye ɛkɛ la ɛnrɛboa menli. (Nolobɔvo 7:29; 8:9) Alesama tetedwɛkɛ ɛvolɛ 6,000 mɔɔ ɛze ɛhɔ la ɛmaa nɔhalɛ ne ɛla ali. Alesama tumililɛ ɛtɛkolale ɛtɛtule konle, ɛtanelilɛ, nzisi nee ewule bo.—Kenga Gyɛlɛmaya 10:23; Wulomuma 9:17.
Noko menli mɔɔ die Nyamenle tumililɛ ne to nu la nyia zolɛ nvasoɛ. (Ayezaya 48:17, 18) Ɔnrɛhyɛ, Gyihova bazɛkye alesama tumililɛ kɔsɔɔti. Menli mɔɔ kulo Nyamenle tumililɛ ne la angome a badɛnla azɛlɛ ye azo a.—Ayezaya 11:9.—Kenga Daneɛle 2:44.
Nea Duzu Ati A Nyamenle Maa Amaneɛnwunlɛ Nwo Adenle A? vidio ne.
4. Duzu a Nyamenle abotane ne maa yɛkola yɛyɛ a?
Seetan se angomedi ti a dasanli biala sonle Gyihova a. Ɛkulo kɛ ɛmaa ɔyɛ adalɛ ɔ? Ɛbahola! Nyamenle abotane ne maa yɛnyia adenle yɛkile kɛ yɛkulo Nyamenle tumililɛ anzɛɛ dasanli tumililɛ. Yɛfa yɛ ɛbɛlabɔlɛ a yɛkile a.—Kenga Dwobu 1:8-12; Mrɛlɛbulɛ 27:11.
5. Kɛzi yɛkola yɛfa Nyamenle yɛyɛ yɛ Belemgbunli ɛ?
Yɛ kpɔkɛzilɛ a kile kɛ saa yɛkulo kɛ Nyamenle yɛ yɛ Belemgbunli a
Saa yɛsukoa nɔhalɛ ne mɔɔ gyi Nyamenle Edwɛkɛ Baebolo ne azo la na yɛfa yɛbɔ yɛ ɛbɛla a ɛnee yɛlɛfa Nyamenle yɛayɛ yɛ Belemgbunli. (Dwɔn 4:23) Saa yɛtwe yɛ nwo yɛfi maanyɛlɛ nee konle nwo kɛ mɔɔ Gyisɛse yɛle la a ɛnee yɛkpo Seetan.—Kenga Dwɔn 17:14.
Seetan fa ye tumi ne si ɛbɛlatane nee nyɛleɛ mɔɔ boda menli la adua. Saa yɛkpo nyɛleɛ zɛhae mɔ a, yɛ gɔnwo mɔ nee yɛ mbusuafoɔ bie mɔ bagolo yɛ nwo anzɛɛ badwazo atia yɛ. (1 Pita 4:3, 4) Ɔti ɔwɔ kɛ yɛsi kpɔkɛ. Yɛbava menli mɔɔ kulo Nyamenle la agɔnwolɛ ɔ? Yɛbali ye mɛla mɔɔ ɛlɔlɛ nee nrɛlɛbɛ wɔ nu la azo ɔ? Saa yɛyɛ zɔ a, yɛbahile kɛ edwɛkɛ mɔɔ Seetan hanle kɛ awie biala kɔ ngyegyelɛ nu a ɔnrɛdie Nyamenle la le adalɛ.—Kenga 1 Kɔlentema 6:9, 10; 15:33.
Ɛlɔlɛ mɔɔ Nyamenle lɛ maa alesama la kile kɛ amaneɛnwunlɛ bavi ɛkɛ. Menli mɔɔ da ye ali kɛ bɛdie ɛhye bɛdi la bɛadɛnla azɛlɛ ye azo dahuu.—Kenga Dwɔn 3:16.