Daselɛlilɛ Hyia Abotane
1 Ɛzoanvolɛ Pɔɔlo vale ɛvolɛ mɔɔ bo 30 la yɛle gyima mɔɔ ahunlundwolɛ wɔ nu la kɛ edwɛkpakavolɛ. Kɛmɔ ɔde wɔ gyima kpalɛ biala anwo la, ɛnee ngyegyelɛ dɔɔnwo wɔ ye daselɛlilɛ gyima ne anu. (2 Kɔl. 11:23-29) Noko akee, Pɔɔlo asa nu ando. (2 Kɔl. 4:1) Ɔdele ɔ bo kɛ anwosesebɛ mɔɔ ɔbava yeagyinla kpundii yeayɛ ye daselɛlilɛ gyima ne la vi Gyihova ɛkɛ. (Fel. 4:13) Kɛmɔ Pɔɔlo yɛle nɔhalɛlilɛ mɔɔ bɛfa bɛgyinla la anwo neazo la ati, ɔholale ɔhanle kɛ “bɛva me gyakɛ, kɛmɔ meva Kelaese agyakɛ la.”—1 Kɔl. 11:1.
2 Gyinla Sɔnea Nloa Ɛnɛ: Alehyenlɛ biala, bɛgolo yɛ mediema dɔɔnwo anwo, bɛdwazo bɛtia bɛ, anzɛɛ bɛ mbusua, bɛ gɔnwo mɔ gyimayɛvoma nee sukuluma anye ɛnlie bɛ nwo. (Mat. 10:35; Dwɔn 15:20) Bie a gyinlabelɛ zɛhae bie ɛdo wɔ. Wɔ adenle fofolɛ zo, bie a ɛ nee anwodolɛ bie ɛlɛko anzɛɛ bie a ɔwɔ kɛ dahuu ɛko ɛtia ninyɛne mɔɔ sɔ wɔ diedi nea na ɔmmaa ɛngola gyinla la. Saa yɛsuzu tete nɔhalɛ azonvolɛ nee yɛ mediema Keleseɛnema mɔɔ wɔ ɛkɛ ne ɛnɛ mɔɔ ngyegyelɛ ɛdo bɛ na bɛli zolɛ konim la neazo nwo a, yɛbanyia anwosesebɛ.—1 Pita 5:9.
3 Saa yɛbɔ mɔdenle yɛwula “Nyamenle konle tɛladeɛ ne mɔ amuala” a, yɛbahola yɛanyia tumi yɛagyinla kpundii wɔ yɛ ɛzonlenlɛ gyima ne anu. (Ɛfɛ. 6:10-13, 15) Ɔhyia noko kɛ yɛyɛ asɔne mɔɔ bamaa yɛagyinla kpundii la. Nyamenle fa ye sunsum nwuanzanwuanza ne maa yɛ amaa yɛahola yɛagyinla sɔnea nloa. (2 Kɔl. 6:4-7) Amaa yɛali konim wɔ yɛ sunsum nu konle ne anu la, ɔwɔ kɛ yɛtie Nyamenle ngakyelɛ ne mɔ na yɛanyia sunsum nu anwosesebɛ. (Edw. 119:24, 85-88) Kɛmɔ kakula fa anyelielɛ kenga kɛlata mɔɔ selɛ kulovolɛ kɛhɛlɛ ye fane dɔɔnwo la, zɔhane ala a Baebolo mɔɔ yɛbagenga ye dahuu la bamaa yɛ nee Gyihova agɔnwolɛvalɛ ne anu amia a. Saa yɛsukoa debie dahuu a ɔbamaa yɛanwu nrɛlɛbɛ mɔɔ yɛbava yɛagyinla sɔnea nloa la, yɛamaa Nyamenle adwenle ahile kpɔkɛ mɔɔ ɔwɔ kɛ yɛsi na yɛ nɔhalɛlilɛ ne anu ayɛ se.—Mrɛ. 2:10, 11.
4 Abotane Fa Nyilalɛ Ba: Kɛmɔ ɛnee ɔde wɔ Pɔɔlo afoa nu la, saa yɛfa nɔhalɛlilɛ yɛgyinla yɛyɛ ɛzonlenlɛ gyima ne a ɔmaa Gyihova anye die na ɔfa nyilalɛ ɔbɛlɛ yɛ nee awie mɔ. (Mrɛ. 27:11) Bɛmaa yɛbɔ mɔdenle kɛ yɛkɔ zo yɛayɛ daselɛlilɛ gyima ne na yɛva yɛhile kɛ yɛ diedi gyi kpundii na ‘ɔhyia ɔtɛla ezukoa nvutuke bɔbɔ mɔɔ bɛfa senle bɛnea kɛ ɔle kpalɛ noko ɔsɛkye la.’—1 Pita 1:6, 7.