Baebolo Ɛzukoalɛ Kenle Titile
1 Ɔvi January mɔɔ kɔ la, asafo biala baye dapɛne awieleɛ ko azie ɛkɛ wɔ siane biala anu, bie a mɔɔ lumua la, kɛ bɛfa bɛayɛ Baebolo ɛzukoalɛ. Ɛhye bahola ayɛ Folɛ anzɛɛ Molɛ, nuhua biala mɔɔ le kpalɛ maa bɛ la. Wɔ zɔhane kenle ne anu, saa suamenle ne mɔ kpo kɛ bɛkɛzukoa Baebolo ne a, nolobɔlɛma bahola ahɔ zo ava Baebolo ne Kilehile buluku ne anzɛɛ magazine fofolɛ mɔɔ bɛlɛ la amaa. Ɔwɔ kɛ mgbanyima nee azonvolɛ muala yɛ ngyehyɛleɛ fa bɛ nwo wula gyima ɛhye anu na bɛboa nolobɔlɛma bɛmaa bɛbɔ Baebolo ɛzukoalɛ bo.
2 Asafo Ɛzonlenlɛ Kɔmatii ne bahile dapɛne awieleɛ mɔɔ nuhua a bɛbaye kenle bazie ɛkɛ kɛ bɛbava bɛayɛ Baebolo ɛzukoalɛ la. Ɔvi mekɛ mɔɔ kɔ mekɛ la, ɔwɔ kɛ bɛkakye nolobɔlɛma amaa bɛaziezie bɛ nwo na bɛabɔ mɔdenle kpalɛ bɛayɛ Baebolo ɛzukoalɛ wɔ sua nu nee sua nu yɛɛ mekɛ mɔɔ bɛlɛkpɔla menli mɔɔ hilele edwɛkɛ ne anwo anyelielɛ la.
3 Kɛzi Yɛbaziezie Yɛ Nwo: Yɛbahola yɛanwu nzuzulɛ mɔɔ bɛfa bɛbɔ Baebolo ɛzukoalɛ bo la wɔ kɛlata mɔɔ vea March 2006 Our Kingdom Ministry ne anu la anu yɛɛ Reasoning buluku ne mukelɛ 12. Bie mɔ bahola ava tract mɔɔ le kɛ Ɛkulo kɛ Ɛnwu Nɔhalɛ ne Ɔ? la ali gyima. Bieko, August 2007 Yɛ Belemgbunlililɛ Gyima ne mukelɛ 3 fa nzuzulɛ mɔɔ bɛfa bɛbɔ Baebolo ɛzukoalɛ bo wɔ mekɛ mɔɔ yɛlɛkɔ yɛahɔkpɔla menli mɔɔ liele magazine la maa. Bɛbayɛ ngyehyɛleɛ bɛamaa mgbanyima nee azonvolɛ ava mitini 10 kɔdwu 15 ayɛ daselɛlilɛ nyianu sikalɛ, na bɛaha nzuzulɛ ko anzɛɛ nwiɔ mɔɔ fɛta mɔɔ bɛfa bɛbɔ Baebolo ɛzukoalɛ bo la anwo edwɛkɛ anzɛɛ bɛayɛ nwolɛ yɛkile.
4 Nɔhalɛ nu, tɛ awie biala a balie Baebolo ɛzukoalɛ ado nu anzɛɛ bahɔ zo azukoa ye mekɛ tendenle a. Ɔnle kɛ ɛhye maa yɛgyakyi kɛ yɛkɛyɛ Baebolo ɛzukoalɛ, ɔluakɛ Gyihova a twe menli mɔɔ bɛ subane le kɛ mboane la ba ye ahyehyɛdeɛ ne anu a. (Dwɔn 6:44) Tɛ yɛ gyima a le kɛ yɛdua nɔhalɛ ma ne ala, na emomu, yɛdua na yɛagugua mɔɔ yɛlua la azo nzule, ɛhye kile kɛ ɔwɔ kɛ yɛ nee ahonlekpalɛma sukoa Baebolo ne. Saa yɛyɛ ɛhye a, ɛnee yɛlɛsonle kɛ Nyamenle agɔnwo gyimayɛvoma.—1 Kɔl. 3:9.