“Bɛva Me Gyɛnvayile ne Bɛdo Bɛ Kɔme Zo”
1 Ewiade ye mɔɔ ngyegyelɛ nee adwenledwenle ɛyi ye tɛkɛɛ la anu, yɛ nwo ɛdɔ yɛ kɛ yɛlie ɛsalɛ mɔɔ Gyisɛse ɛlɛto avɛlɛ menli kɛ bɛrɛla na ɔbamaa bɛ nye alie wɔ ye gyɛnvayile ne abo la azo a. (Mat. 11:29, 30) Ɛdoavolɛyɛlɛ gyɛnvayile ne mɔɔ yɛva yɛdo yɛ kɔme zo la, kile kɛ ɔwɔ kɛ yɛyɛ gyima mɔɔ yɛ se noko eza ɔyɛ anyelielɛ la. Ɔkile kɛ ɔwɔ kɛ yɛbɔ Nyamenle Belemgbunlililɛ ne anwo edwɛkpa ne nolo, na yɛboa awie mɔ yɛmaa bɛ nye die wɔ Gyisɛse gyɛnvayile ne mɔɔ le felafela la abo.—Mat. 24:14; 28:19, 20.
2 Daselɛlilɛ Maa Yɛ Nye Die: Gyisɛse anga angile ye ɛdoavolɛma ne kɛ bɛva ye adesoa ɛdeɛ ne bɛboka mɔɔ bɛzo la anwo. Ɔvɛlɛle bɛ kɛ bɛva bɛ ɛdeɛ anu ɛnlomboɛ ne bɛrɛla na bɛlie ye ɛdeɛ ne mɔɔ ɛnyɛ ɛnlomboɛ la. Yɛmmaa ewiade ɛtane ɛhye mɔɔ anyelazo ɛnle nu nee nuhua adwenledwenle ɛngyegye yɛ; yɛɛ yɛnyɛ anwonyia mɔɔ pɛ nu se la anwo gyima. (Luku 21:34; 1 Tem. 6:17) Ɔwɔ nuhua kɛ yɛnlɛ alagye, yɛɛ ɔwɔ kɛ yɛyɛ gyima amaa yɛ sa aha alehyenlɛ biala anu ninyɛne mɔɔ yɛhyia la ɛdeɛ, noko yɛmaa Nyamenlezonlenlɛ dumua wɔ yɛ ɛbɛlabɔlɛ nu. (Mat. 6:33) Saa yɛnyia ninyɛne mɔɔ hyia la anwo adwenle kpalɛ a, dahuu yɛbabu daselɛlilɛ kɛ ɔmaa yɛ nye die na ɔnle adesoa.—Fel. 1:10.
3 Yɛta yɛka ninyɛne mɔɔ yɛ nye die nwolɛ kpalɛ la anwo edwɛkɛ. (Luku 6:45) Gyihova nee Belemgbunlililɛ ne anu nyilalɛ mɔɔ yeva yebɔ ɛwɔkɛ la le debie mɔɔ Keleseɛnema kɔsɔɔti anye die nwolɛ kpole a. Ɛhye ati, nea kɛzi yɛ nye die kɛ yɛkɛbɔ “edwɛkɛ kpalɛ” nwo nolo wɔ daselɛlilɛ nu na yɛkɛgyakyi alehyenlɛ biala adwenledwenle mɔɔ yɛlɛ la yɛkɛzie ye ahane ɛ! (Wulo. 10:15) Nɔhalɛ nu, saa yɛkɔ zo yɛyɛ debie a, ɔmaa yɛnwu ye yɛ na yɛ nye die. Yemɔti saa yɛkola yɛnyia mekɛ dɔɔnwo yɛkɔ daselɛlilɛ a, ɔbamaa yɛ nye alie kpole. Na saa menli tie yɛ nolobɔlɛ ne a, nea kɛzi yɛdi nwolɛ fɛlɛko a! (Gyi. 15:3) Saa yɛyia menli mɔɔ anye ɛnlie edwɛkɛ ne anwo anzɛɛ dwazotia bɔbɔ, na yɛkakye kɛ mɔdenle mɔɔ yɛlɛbɔ la sɔ Gyihova anye na ɔbayila zo yeamaa yeazo ma kpalɛ a, daselɛlilɛ ne bamaa yɛ nye alie wɔ sunsum nu.—Gyi. 5:41; 1 Kɔl. 3:9.
4 Saa yɛdie Gyisɛse ɛsalɛdolɛ ne azo a, ɔbamaa yɛ nee ye abɔ nu azonle kɛ Gyihova Alasevolɛ. (Aye. 43:10; Yek. 1:5) Debie biala ɛnyɛ anyelielɛ kpole ɛndɛla ɛhye!