Boa Baebolo Sukoavoma Maa Bɛyɛ Belemgbunlililɛ Edwɛkpa ne Nolobɔlɛma
1 Gyima mɔɔ Gyisɛse vale manle ye ɛdoavolɛma mɔɔ bɛha nwolɛ edwɛkɛ wɔ Mateyu 28:19, 20 la ɛnee bahɔ moa kpalɛ. Bɛhanle bɛhilele Kelaese ɛdoavolɛma kɛ bɛyɛ menli dɔɔnwo ɛdoavolɛma na bɛdabɛ noko bɛdoa ɛdoavolɛyɛlɛ gyima ne azo. Ngyehyɛleɛ mɔɔ bɛbalua zo bɛabɔ Nyamenle Belemgbunlililɛ ne anwo edwɛkpa ne nolo wɔ ewiade amuala wɔ mekɛ ɛhye mɔɔ anwo hyia mɔɔ nuhua a yɛwɔ la ɛnee babɔ ɔ bo.—Mat. 24:14.
2 Yɛ Baebolo sukoavoma bahola ayɛ yɛ mra anzɛɛ menli mɔɔ kulo kɛ bɛ nee yɛ sukoa Baebolo ne la. Yɛkulo kɛ yɛboa menli ɛhye mɔ nɔhalɛ nu yɛmaa bɛdie bɛto bɛ nwo zo kɛ bɛkɛboa awie mɔ bɛkɛmaa bɛkɛyɛ Gyisɛse Kelaese ɛdoavolɛma.—Luku 6:40.
3 Siezie Bɛ Maa Bɛli Daselɛ: Wula menli mɔɔ ɛ nee bɛ sukoa la anwosesebɛ maa bɛha mɔɔ bɛlɛsukoa la anwo edwɛkɛ bɛhile awie mɔ. Ka daselɛlilɛ nu anwubielɛ mɔɔ maa anwosesebɛ mɔɔ wɔnyia la kile bɛ. Tete ɛ mra ne mɔ fi bɛ ngakula nu maa bɛnyia daselɛlilɛ nu kyɛfoa mɔɔ hyia kɛmɔ bɛkɛhola la. (Edw. 148:12, 13) Maa wɔ ɛdendɛlɛ nee wɔ nyɛleɛ ɛhile anyezɔlɛ mɔɔ ɛlɛ wɔ daselɛlilɛ gyima ne anwo la.—1 Tem. 1:12.
4 Menli mɔɔ die Gyihova tenlene ngyinlazo ne mɔ to nu na bɛdi zolɛ la ala a ɔfa bɛ ɔdi gyima a. Ɔwɔ nuhua kɛ nolobɔlɛma mɔɔ le fofolɛ la ɛnlɛ anwubielɛ kɛ Belemgbunlililɛ azonvolɛ mɔɔ bɛyila bɛ nwo zo, na bɛzɔne bɛ la ɛdeɛ, noko ɔwɔ kɛ menli mɔɔ le fofolɛ la die Baebolo ne anu ngilehilelɛ mɔɔ hyia la di na bɛkola bɛkilehile nuhua. (Nea Organized, m. 79-82.) Ɔwɔ kɛ bɛyɛ menli mɔɔ bɛhwe bɛ nwo bɛvi ‘Babelɔn Kpole’ ne nee maamulɛ edwɛkɛ nu, na bɛkɔ debiezukoalɛ dahuu a.—Yek. 18:2, 4; Dwɔn 17:16; Hib. 10:24, 25.
5 Saa ɛnwu kɛ wɔ Baebolo sukoavoma ne anu ko ɛfɛta kɛ ɔsonle kɛ nolobɔlɛnli mɔɔ bɛtɛsɔnenle ye a, ka nwolɛ edwɛkɛ kile ebianutɛnlavolɛ ne. Ɔbayɛ ngyehyɛleɛ yeamaa asafo nu mgbanyinli nwiɔ nee wɔ yɛɛ wɔ Baebolo sukoavo ne ayia na bɛanlea kɛ saa ɔfɛta kɛ ɔsonle wɔ asafo ne anu kɛ Belemgbunlililɛ edwɛkpa ne anwo nolobɔlɛnli mɔɔ bɛtɛsɔnenle ye la a. Mekɛ mɔɔ wɔ Baebolo sukoavo ne nee wɔ ɛlɛkɔ daselɛlilɛ la akee ɛbanyia nwolɛ adenle wɔamaa ye ndetelɛ dɔɔnwo.