Fa Wɔ Mekɛ Di Gyima Kpalɛ wɔ Daselɛlilɛ Nu
1 Yɛlɛ gyima dɔɔnwo yɛyɛ amgba wɔ yɛ daselɛlilɛ gyima ne anu, yɛɛ mekɛ ne ɛwie. (Dwɔn 4:35; 1 Kɔl. 7:29) Saa yɛyɛ ngyehyɛleɛ kpalɛ na yɛdumua yɛsiezie yɛ nwo a yɛbahola yɛava yɛ mekɛ ngyehyɛleɛ mɔɔ yɛyɛ la yɛali gyima kpalɛ wɔ daselɛlilɛ nu.
2 Siezie Ɛ Nwo: Kolaa na wɔahɔ daselɛlilɛ ayia ne abo la, ɔwɔ kɛ ɛnwu ye kɛ ɛlɛ mbuluku mɔɔ ɛbahyia la yɛɛ edwɛkɛ mɔɔ ɛbaha la wɔ wɔ adwenle nu. Saa bɛyɛ asɔne na bɛkpɔne a, bɔ daselɛlilɛ bo. Ɛhye bamaa wɔanyia adenle na ɛ nee menli mɔɔ nee wɔ lua la ahola ayɛ dɔɔnwo wɔ mekɛ ne mɔɔ bɛlɛfa bɛali daselɛ la anu.
3 Saa bɛkpa wɔ kɛ ɛnlea daselɛlilɛ ayia ne azo a, bɔ ɔ bo wɔ mekɛ nloa. Maa nyianu ne ɛyɛ sikalɛ—mɔɔ ɔmbo mitini 10 kɔdwu 15 a. Kolaa na bɛavi ɛkɛ ne la, nea kɛ awie biala banwu ahenle mɔɔ ɔ nee ye balua yɛɛ azɛlɛsinli mɔɔ ɔbayɛ nuhua gyima la.
4 Wɔ Daselɛlilɛ Nu: Saa ɔkɛyɛ boɛ a, mekɛ mɔɔ ɛlɛkyɛ nolobɔlɛma la suzu mekɛ mɔɔ bɛ nuhua ko biala bava akpɔne la anwo. Saa tɛ gyinlabelɛ bie mɔɔ esiane kpole wɔ nu a, ɔkɛyɛ kpalɛ kɛ nolobɔlɛma nwiɔ kɛlua. Ɛhye maa yɛdi Gyisɛse neazo ne anzi na ɔmaa awie biala fa ye mekɛ di gyima kpalɛ wɔ daselɛlilɛ nu. (Luku 10:1; Organized, m. 86, ɛden. 2; m. 108, ɛden. 2; km 10/04 m. 8) Saa ɛ nee menli ekpunli bie a vale kale hɔle daselɛlilɛ a, suzu menli mɔɔ bie a bɛlɛkendɛ wɔ bɛamaa wɔawie wɔ adawubɔlɛ ne la anwo. Ɛhye kile kɛ ɛbahola wɔavi nrɛlɛbɛ nu wɔapɛ awie mɔɔ su kpolera la adawubɔlɛ ne azo anzɛɛ wɔayɛ ngyehyɛleɛ na wɔazia wɔahɔkpɔla awie mɔɔ kɛhile edwɛkɛ ne anwo anyelielɛ la.—Mat. 10:11.
5 Saa ɛlɛyɛ sia kɔkpɔla a amaa wɔanzɛkye ezukoa nee mekɛ la, ɛbahola wɔakpɔla menli mɔɔ de ɛleka ko la kolaa na wɔahɔ ɛleka gyɛne. Ɔkɛyɛ kpalɛ kɛ ɛkɛvɛlɛ menli bie mɔ na ɛkɛnwu kɛ bɛwɔ sua nu na wɔahɔ. (Mrɛ. 21:5) Saa ɛnea na wɔ ɛkpɔlalɛ ne kɛhyɛ a, ɛbahola wɔayɛ ngyehyɛleɛ wɔamaa menli mɔɔ boka ɛ nwo la ali daselɛ anzɛɛ ayɛ sia kɔkpɔla wɔ ɛleka mɔɔ bikye la.
6 Yɛwɔ mekɛ mɔɔ bɛlɛyɛ sunsum nu bɛyɔba gyima kpole la anu. (Mat. 9:37, 38) Ɔnrɛhyɛ, zɔhane gyima ne bara awieleɛ. Ɛhye ati, ɔwɔ kɛ yɛnyia ɛhulolɛ kɛ yɛbava yɛ mekɛ yɛali gyima kpalɛ wɔ daselɛlilɛ nu.