Edwɛkɛhanlɛ Gyima Kpole Kpalɛ Mɔɔ Bɛyɛ wɔ Ewiade!
Bɛva mɔɔ bo ɛvolɛ kɛyɛ ɛya ko bɛhyehyɛ Gyihova Alasevolɛ bɛmaa bɛbɔ edwɛkpa ne nolo. (1 Kɔl. 9:23) Wɔ edwɛkɛhanlɛ gyima kpole kpalɛ mɔɔ bɛyɛ wɔ ewiade ɛhye anu, yɛka edwɛkɛ ne wɔ aneɛ ɛya ɛya dɔɔnwo anu. Yɛka edwɛkɛ ɛhye wɔ azɛlɛ mɔɔ bo 230 la azo. (Mat. 24:14) Duzu ati a gyima ɛhye anwo hyia ɛ? Na kɛzi bɛlɛyɛ ye wɔ ewiade amuala ɛ?
Video ne mɔ se Jehovah’s Witnesses—Organized to Share the Good News dua gyima ɛhye mɔɔ bɛlɛyɛ ye wɔ adenle ngakyile dɔɔnwo azo wɔ maanle maanle ne mɔ anu anwo neɛnleanu mɔɔ kɔ moa la azo ye kpuyia ɛhye mɔ anloa. Mekɛ mɔɔ ɛlɛnea la, suzu kpuyia ɛhye mɔ anwo: (1) Kɛzi bɛhyehyɛ yɛ gyima ne na bɛkile ye adenle ɛ? (2) Kɛzi Writing, Translation Services, Art, yɛɛ Audio/Video Services Ɛleka ne mɔ boa maa bɛbɔ edwɛkpa ne nolo ɛ? (3) Bodane boni yɛɛ yɛ mbuluku dɔɔnwo ne mɔɔ yɛyɛ na yɛfa yɛnwa la gyi zo a? (Dwɔn 17:3) (4) Mbuluku nyɛ a bɛyɛ ye wɔ ɛvolɛ ko anu a? (5) Duzu a ɛvi yɛ mbuluku ne mɔ mɔɔ yɛyɛ la anu ɛra a? (Hib. 4:12) (6) Duzu a bɛlɛyɛ bɛava bɛaboa menli mɔɔ anye ɛzi anzɛɛ anzo ɛdi la ɛ? (7) Kɛzi bɛtua yɛ gyima ne anwo kakɛ ɛ? (8) Nvasoɛ boni a yɛnyia yɛfi gyima mɔɔ Hospital Information Services, Service Department, yɛɛ Convention Department yɛ la anu a? (9) Kɛ Gyihova Alasevolɛ la, kɛzi video ɛhye ɛmaa wɔnyia anyezɔlɛ kpole wɔmaa (a) mɔdenle mɔɔ Gyihova ahyehyɛdeɛ ne ɛlɛfa abɔ edwɛkpa ne nolo? (b) Bɛtɛle mbusua mɔɔ bo 100 mɔɔ wɔ ewiade? (d) ndetelɛ mɔɔ bɛfa bɛmaa neavolɛma nee edwɛkpatɛlɛvolɛma? (ɛ) nvasoɛ mɔɔ wɔ zo kɛ bɛfa Baebolo tɛkese bie bɛbɔ alehyenlɛ biala abo na bɛsiezie bɛ nwo bɛmaa dapɛne biala debiezukoalɛ? (e) nvasoɛ mɔɔ wɔ zo kɛ yɛkɛhɔ yɛ Keleseɛne nyianu ne mɔ? (f) duzu a azɛlɛ ye azo Paladaese bahile a? (Aye. 11:9) (g) Yɛ nwo mɔɔ yɛfa yɛawula ɛbuhenle gyima ne mɔɔ ɛlɛkɔ zo la anu ɛ?—Dwɔn 4:35.
Mekɛ mɔɔ ɛ nwo amra, ɛ gɔnwo mɔ, ɛziale ɛhɔkpɔlale na wɔ Baebolo sukoavoma nleanle video ɛhye la, edwɛkɛ kpalɛ boni a bɛhanle ye wɔ nwolɛ a? Bɔ mɔdenle yɛ ye ndɛndɛ maa awie gyɛne ɛnlea na ka edwɛkpa ne anwo edwɛkɛ kile ye.—Mat. 28:19, 20.