Mekɛ Mɔɔ Asetɛnla Nu Kɛyɛ Se Kpalɛ La

Kɛ neazo la, mekɛ mɔɔ ahumuakyima bie maanle Sallya mɔɔ wɔ United States minlinle ye agyapadeɛ kɔsɔɔti la, ɔhilele nu kɛ: “Mendele nganeɛ fane dɔɔnwo kɛ menrɛhola ɔ nloa gyinla bieko, ɛnee me anwosesebɛ ɛwie.”

Na saa wɔ kulovolɛ bie ɛwu ɛ? Janice mɔɔ vi Australia la hanle kɛ: “Mekɛ mɔɔ me mra mrenyia nwiɔ ne wule la, me nwo bubule me kpalɛ, menwiele debie yɛ. Menzɛlɛle Nyamenle kɛ: ‘Menrɛhola nyanelilɛ ɛhye anu sɔ bieko! Wɔmɔ maa menwu. Mengulo kɛ metɛnla aze bieko.’”

Daniel mɔɔ ɔ ye anli nɔhalɛ ammaa ye la noko ɛbɛlabɔlɛ yɛle basaa. Ɔhanle kɛ: “Mɔɔ me ye hanle kɛ yeva nrenyia fofolɛ la, ɛnee ɔle kɛ asɛɛ bɛva dadeɛ bɛwɔ me ahonle nu la. Nganeɛdelɛ ɛhye hyɛle kpalɛ.”

Ɛzinzalɛ Arane ɛhye bamaa yɛanwu kɛ nvasoɛ wɔ zo kɛ yɛbadɛnla ngoane nu saa bɔbɔ

• Esiane si a

• Yɛ kulovolɛ bie wu a

• Yɛ ye anzɛɛ yɛ hu anli nɔhalɛ a

• Yɛgyi anwodolɛ mɔɔ anu yɛ se la anloa a

• Asetɛnla nu yɛ se kpalɛ a

Mɔɔ limoa, saa esiane si a, kɛ ɔkɛyɛ na yɛagyinla ɔ nloa ɛ?