Mekɛ Mɔɔ Esiane Kɛzi La

“Mekɛ mɔɔ boka bie dele guale na azuyilɛ vale yɛ la, yɛminlinle yɛ debie biala na yɛ anyelazo wiele.”—Andrew, Sierra Leone.

“Wɔ ahumuakyima ne anzi, yɛziale yɛrale yɛ sua nu. Pini bɔbɔ anga. Yɛ nloa hale nwolɛ. Me ra raalɛ ne butule na ɔzunle.”—David, Virgin Islands.

SAA esiane ɛdo wɔ ɛlɛ a, bie a ɛbade menli gyɛne mɔɔ bɛdabɛ noko bie ɛdo bɛ ɛlɛ la edwɛkɛ bo kpalɛ: azibɛnwo, anyezota, adwenleadwenle yɛɛ ɛlalɛ mgbane mgbane ɛhanlɛ. Menli dɔɔnwo mɔɔ nyia bɛ ti wɔ esiane nu la te nganeɛ kɛ bɛnrɛyɛ kpalɛ bieko.

Saa esiane ɛmaa wɔ ninyɛne ɛvi ɛ sa a, bie a ɛbade nganeɛ kɛ ɛnrɛhola tɛnlabelɛ ne anloa gyinla bieko na ɛwule bɔbɔ a anrɛɛ ɔle kpalɛ. Noko, Baebolo ne kile kɛ nvasoɛ wɔ ɛ nwo zo na ɛbahola wɔalie wɔali kɛ ninyɛne bayɛ boɛ kenle bie.

BAEBOLO NU NƆHALƐ NE MAA YƐ ANYELAZO

Nolobɔvo ne 7:8 ka kɛ: “Debie biala awieleɛ le kpalɛ tɛla ye mɔlebɛbo.” Saa bɔ zo mɔɔ ɛ nye zo ɛlɛtete wɔ avi esiane bie mɔɔ dole wɔ la anwo a, bie a ɛbade nganeɛ kɛ ɛnlɛ anyelazo biala. Noko mekɛ mɔɔ ɛlɛbɔ mɔdenle wɔayɛ biala mɔɔ ɛbahola wɔ ɛbɛlabɔlɛ nu la, ninyɛne bayɛ boɛ.

Baebolo ne ka mekɛ mɔɔ ‘yɛnrɛde ɛzunlɛ yɛɛ nyanenwunlɛ ɛnelɛ’ la anwo edwɛkɛ. (Ayezaya 65:19) Ɛhye bara nu wɔ mekɛ mɔɔ azɛlɛ ne ɛhakyi ɛyɛ paladaese wɔ Nyamenle Belemgbunlililɛ ne abo la. (Edwɛndolɛ 37:11, 29) Ɔnrɛhyɛ esiane ɛnrɛzi bieko. Nyane biala mɔɔ esiane maa yɛte la bavi ɛkɛ bɔkɔɔ. Ɔluakɛ Tumivolɛ Nyamenle ne ɛbɔ ɛwɔkɛ kɛ: “Ninyɛne dɛba ne mɔ abo zo baminli mɔɔ awie ɛnrɛhakye bɛ bieko a.”—Ayezaya 65:17.

Suzu nwo nea: Bɔvolɛ ne ɛyɛ ngyehyɛleɛ kɛ ɔbamaa ‘yɛ tɛnlabelɛ nu ayɛ boɛ na yɛanyia anyelazo’—ɛbɛlabɔlɛ mɔɔ anzodwolɛ wɔ nu wɔ Nyamenle tumililɛ bo. (Gyɛlɛmaya 29:11) Nɔhalɛ edwɛkɛ ɛhye baboa wɔ yeamaa wɔanwu kɛ nvasoɛ wɔ zo kɛ ɛbadɛnla ngoane nu. Sally, mɔɔ yɛlimoa yɛha ɔ nwo edwɛkɛ la hanle kɛ, “Saa ɛkakye nwanwane ninyɛne mɔɔ Nyamenle Belemgbunlililɛ ne bayɛ amaa yɛ kenle bie la a, ɔbaboa wɔ yeamaa wɔaye wɔ adwenle wɔavi ninyɛne mɔɔ ɛzi la azo na wɔava wɔ adwenle wɔazie moalɛ mɔɔ ɛlɛnyia ye kɛkala la azo.”

Duzu ati a ɛnzukoa mɔɔ Nyamenle Belemgbunlililɛ ne bayɛ amaa alesama kenle nsa ye la anwo edwɛkɛ dɔɔnwo a? Saa ɛyɛ zɔ a, ɔnva nwo esiane mɔɔ ɛdo wɔ la, ɛbanyia anwodozo kɛ nvasoɛ wɔ zo kɛ ɛbadɛnla ngoane nu kɛkala wɔ mekɛ mɔɔ ɛlɛkendɛ kenle bie mɔɔ esiane biala ɛnle ɛkɛ ne la. Kɛkala bɔbɔ, Baebolo ne fa adehilelɛ kpalɛ mɔɔ baboa wɔ yeamaa wɔagyinla esiane nloa la maa. Suzu neazo ekyi ɛhye anwo.

Ngɛlɛlera Mɔɔ Baboa Wɔ

Da maa ɔde wɔ.

“Bɛ menle ɛlielɛ ekyi le kpalɛ tɛla gyima ɛsesebɛ ɛyɛlɛ nee anwoma mɔɔ bɛpele bɛtoa ye la.”—Nolobɔvo ne 4:6, NW.

Menli mɔɔ yɛ neɛnleanu la ka kɛ saa awie fa tɛnlabelɛ mɔɔ anu yɛ se la anu na “yeannyia nafelɛ kpalɛ a, ɔkola ɔmaa ngyegyelɛ ne kɔ ɔ nyunlu.” Yemɔti ɔle kpalɛ kɛ ɛbanyia mekɛ wɔala kpalɛ.

Ka wɔ nganeɛdelɛ ne anwo edwɛkɛ.

“Adwenleadwenle maa sonla yɛ basaa, na edwɛkɛ kpalɛ maa sonla di fɛlɛko.”—Mrɛlɛbulɛ 12:25.

Ka nwolɛ edwɛkɛ kile wɔ busuanli anzɛɛ ɛ gɔnwo kpalɛ bie. Wɔ mekɛ mɔɔ wɔ mbusuafoɔ anzɛɛ ɛ gɔnwo mɔ ɛlɛtie wɔ la bɛbakyekye ɛ rɛle na bɛava moalɛ mɔɔ fɛta la bamaa wɔ.a

Dwenle kenle bie mɔɔ ninyɛne bayɛ kpalɛ la anwo.

“Na kɛ mɔɔ ye ɛwɔkɛ ne kile la, yɛlɛkendɛ anwuma fofolɛ nee azɛlɛ fofolɛ, na ɛhye mɔ anu a tenleneyɛlɛ badɛnla a.”—2 Pita 3:13.

a Saa adwenleadwenle tɔ awie anwo mekɛ tendenle a, ɔbayɛ kpalɛ kɛ ɔbahɔ asopiti.