Edwɛkɛ Mɔɔ Anwo Hyia

Baebolo ne le ngakyile fi asɔne buluku biala anwo. Buluku gyɛne biala ɛnle ɛkɛ mɔɔ ɛhakyi menli dɔɔnwo diedi wɔ ɛvolɛ dɔɔnwo mɔɔ ɛze la anu a. Eza buluku gyɛne biala ɛnle ɛkɛ mɔɔ menli ɛyɛ nuhua neɛnleanu dɔɔnwo na bɛdendɛ bɛtia ye a.

Kɛ neazo la, nwomama bie mɔ ɛnlie ɛnli kɛ bɛgyinlanle mɔlebɛbo ngɛlɛlera ne azo a bɛhɛlɛle ɛnɛ Baebolo ne a. Nwomanli bie mɔɔ sukoa ɛzonlenlɛ nwo debie la ka kɛ, “Yɛnlie yɛnli kɛ yɛ sa ɛha mɔlebɛbo edwɛkɛ ne pɛpɛɛpɛ. Mɔɔ yɛlɛ la le nvonleɛ ngome, na bɛyɛle mɔlebɛbo ɛdeɛ ne la ɛvoya dɔɔnwo anzi kolaa na bɛayɛ ɛhye mɔ yɛɛ bɛle ngakyile wɔ ndenle dɔɔnwo azo.”

Ɔlua ɛzonlenlɛ mɔɔ bɛwole bie mɔ bɛdole nu la ati, ɔmaa bɛsu kpolera kɛ Baebolo ne anu edwɛkɛ ne ɛnle nɔhalɛ. Kɛ neazo la, Faizal mɔɔ ye awovolɛ ɛnle Kilisienema la hilehilele ye kɛ Baebolo ne le buluku nwuanzanwuanza noko bɛhakyi nuhua edwɛkɛ ne. Ɔka kɛ, “Ɛhye ati, saa menli kulo kɛ bɛka Baebolo nu edwɛkɛ bɛkile me a, ɛnee me adwenle nu ɛyɛ me kesee. Ɔluakɛ, bɛnlɛ mɔlebɛbo Baebolo ne. Bɛhakyi ye!”

Saa bɛhakyi Baebolo ne anzɛɛ bɛtɛkakyile ye a, asoo yemɔ a anwo hyia? Suzu kpuya ɛhye mɔ anwo nea: Ɛbahola wɔava ɛ nwo wɔado Baebolo ne ɛwɔkɛ ne mɔ mɔɔ yɛ arɛlekyekyelɛ la azo, saa ɛnze kɛ ɛwɔkɛ ɛhye mɔ wɔ mɔlebɛbo edwɛkɛ ne anu a? (Wulomuma 15:4) Saa menli mɔɔ hɛlɛle la yɛle nvonleɛ wɔ nu a, asoo anrɛɛ ɛbava Baebolo ngyinlazo wɔazi kpɔkɛ mɔɔ anwo hyia wɔ gyima, abusua anzɛɛ ɛzonlenlɛ nwo ɔ?

Mɔlebɛbo Baebolo mbuluku ne mɔ abo zo ɛminli ɛdeɛ, noko yɛbahola yɛanlea mɔɔ bɛhɛlɛle ye wɔ tete ne, mɔɔ Baebolo bɛsanloangɛlɛleraa dɔɔnwo boka nwo la anu. Kɛ ɔyɛle mɔɔ bɛsanloangɛlɛlera ɛhye mɔ anzɛkye, gyinlanle dwazotia nloa na bɛangola bɛangakyi edwɛkɛ ne ɛ? Kɛzi ɛzɛkyelɛ mɔɔ bɛangola ye sɛkye la maa ɛnyia anwodozo kɛ ɛnɛ Baebolo nu edwɛkɛ ne le nɔhalɛ ɛ? Suzu kpuya ɛhye mɔ anwo mualɛ ne mɔ anwo wɔ edwɛkɛ mɔɔ doa zo la anu.