Maa me anzodwolɛ nee anyelielɛ ɛvolɛ ko ala

ME ƐBƐLA DƐBA:

Me nee me abusua ne dɛnlanle Tellancourt, namule bie mɔɔ wɔ France sɔlɔ aduduleɛ la azo. Ɛnee me papa vi France, yɛɛ me mame vi Italy. Menyianle ɛvolɛ mɔtwɛ la, yɛhɔdɛnlanle sua bie mɔɔ bɛdi ehyia mɔɔ wɔ Wulomu, Italy la azo. Asetɛnla nu rayɛle se wɔ ɛkɛ. Kɛmɔ me awovolɛ ɛnlɛ ezukoa la ati, ɛnee bɛta bɛdi butule.

Menyianle ɛvolɛ 15 la, me mame zele me kɛ menvi sua nu mengɔkpondɛ agɔnwolɛma. Yemɔti ɛnee mefinde a memba sua nu. Yeangyɛ yɛɛ menvale me nwo membɔle agɔnwolɛ ɛtane a. Kenle ko, nrenyia bie mɔɔ kulo me edwɛkɛ la bikyele me. Ɔmaanle me nyiletane, na menonle ɔluakɛ ɛnee mekpondɛ kɛ meyɛ me nwo kɛ menyi. Yeangyɛ yɛɛ menvale me nwo menwulale nyiletane ɛnlonlɛ nee adwɔmanebɔlɛ nu a. Fane dɔɔnwo ne ala bɛdole me bɔna. Ɛbɛlabɔlɛ ne vonlenle me; ɛnee ɔnvale me nwo kɛ mebadɛnla ngoane nu anzɛɛ mebawu. Ɛnee me nwo yɛ me koonwu kpalɛ. Menyianle ɛvolɛ 16 la, menyɛle kɛ meku me nwo yemɔti menonle nza mɔɔ anu yɛ se la toba ko na mengɔndɔle azule kpole bie anu. Ɛhye maanle me nye zo bulule me kenle nsa.

Membɔle mɔdenle kɛ me nwo kɛdɔ me, noko menyɛle basabasa nee mɛlɛbɛla sonla. Ɛnee me nee mraalɛ da, memaa bɛ nyiletane na mewua bɛ debie biala mɔɔ sonle bolɛ la. Amumuyɛma ekpunli maa mekɔtɔne nyiletane wɔ Italy maanle ne anu ɛleka biala. Ɛnee kpolisima ta gyegye me. Ɛnee nvasoɛ ɛnle me ɛbɛlabɔlɛ zo. Noko, ɛnee medie medi kɛ debie bie ati a mede aze a. Menzɛlɛle Nyamenle kɛ ɔmaa me anzodwolɛ nee anyelielɛ ɛvolɛ ko ala.

KƐZI BAEBOLO NE HAKYILE ME LA:

Menyianle ɛvolɛ 24 la, menzile kpɔkɛ kɛ mekɔ England. Ɔluakɛ me nee menli mɔɔ tɔne nyiletane la yɛ gyima la ati, ɛnee me ngoane la esiane nu. Kolaa na meahɔ la, mengɔle me mame anwo lɔ na ɔzinle me nwo kɛ menwunle nrenyia bie mɔɔ bɛfɛlɛ ye Annunziato Lugarà la kɛ ɔlɛka Baebolo ne anu edwɛkɛ yeahile ye.a Kɛmɔ ɛnee meze kɛ ɔyɛ basabasa la ati, me ahonle dule na membizale ye deɛmɔti yera ɛkɛ ne la. Ɔhanle nzenzaleɛ mɔɔ ɔyɛle wɔ ye ɛbɛlabɔlɛ nu amaa yeayɛ Gyihova Dasevolɛ la ɔhilele me na ɔmaanle membɔle ye ɛwɔkɛ kɛ saa medwu England a mebala me nwo ali meahile Alasevolɛ ne mɔ. Menganle kɛ mebayɛ ye zɔ. Noko, mendwule ɛkɛ ne la, mendoale me ɛbɛla dɛba ne azo.

Kenle ko bie, menyiale Dasevolɛ bie mɔɔ ɛnee ɔlɛfa Watchtower nee Awake! magazine ne yeamaa wɔ London awɔdenle bie mɔɔ menli dɔɔnwo fa zo la azo. Mengakyele ɛwɔkɛ mɔɔ membɔle Annunziato la na membizale ye saa ɔbahola ɔ nee me azukoa Baebolo ne a.

Mɔɔ menzukoale menvile Baebolo ne anu la zinle me nwo. Kɛ neazo la, edwɛkɛ ne mɔɔ wɔ 1 Dwɔn 1:9 ka ye wɔ Nyamenle anwo kɛ: “Saa yɛka yɛ ɛtane ne mɔ yɛkile ye a, ɔkɛva ɔkɛhyɛ yɛ na ɔkɛde yɛ nwo ɔkɛvi nyɛleɛ mɔɔ ɛndenrɛ la amuala anwo.” Ɛhye hanle me ahonle. Ngyɛnu ɛhye nyianle me nwo zo tumi ɔluakɛ ɛnee mete nganeɛ kɛ me ɛbɛlabɔlɛ ɛnle kpalɛ. Yeangyɛ membɔle ɔ bo kɛ mekɔ debiezukoalɛ wɔ Gyihova Alasevolɛ Belemgbunlililɛ Asalo. Alasevolɛ ne mɔ liele me kɛnlɛma. Ɛnee mekulo agɔnwolɛvalɛ, yemɔti mekɛ mɔɔ menwunle koyɛlɛ mɔɔ wɔ asafo ne anu amra avinli la ɛnee mekpondɛ kɛ meboka bɛ nwo.

Ɛnee ɔnyɛ se kɛ mebagyakyi nyiletane ɛnlonlɛ nee adwɔmane ɛbɛla ne ɛdeɛ, noko ɛnee ɔyɛ se kɛ mebahakyi me subane. Menwunle kɛ ɔwɔ kɛ mebu menli na medwenle bɛ nwo. Nɔhalɛ nu, metɛko kɛ mebagyakyi me subane ɛtane ne mɔ. Noko ɔlua Gyihova moalɛ zo, menyia anyuhɔlɛ. Membɔle ɔ bo kɛ mesukoa Baebolo ne la ye siane nsia yɛɛ bɛzɔnenle me kɛ Gyihova Dasevolɛ a. Ɛhye zile wɔ 1997.

KƐZI YEBOA ME:

Me ɛzɔnenlɛ ne anzi, mengyale Barbara mɔɔ ɛnee ɔdaye noko ɔrayɛle Gyihova Dasevolɛ ɛtɛkyɛle la. Mɔɔ me gɔnwo dɛba bie nwunle kɛzi mehakyi la, ɔbɔle ɔ bo kɛ ɔsukoa Baebolo ne. Nzinlii, ɔ nee ɔ diema raalɛ ko rayɛle Alasevolɛ. Akee me nana adiema raalɛ mɔɔ ɛnyia ɛvolɛ mɔɔ bo 80 la bɔle ɔ bo kɛ ɔsukoa Baebolo ne na bɛzɔnenle ye kolaa na yeawu.

Kɛkala mele asafo nu kpanyinli, na me nee me ye ɛlɛfa yɛ mekɛ kɔsɔɔti yɛaboa menli mɔɔ ka Italy aneɛ wɔ London la yɛamaa bɛade Baebolo ne abo. Ɔyɛ a, me ɛbɛla dɛba ne maa me rɛle bɔ, noko Barbara ɛyɛ me moalɛ kpole. Kɛkala, akee menyia abusua asetɛnla kpalɛ nee Selɛ kulovolɛ mɔɔ ɛnee melɛkpondɛ la. Menzɛlɛle Nyamenle kɛ ɔmaa me anzodwolɛ nee anyelielɛ ɛvolɛ ko ala, noko mɔɔ yeva yemaa me la zonle somaa!