ASOO ƐZE?

Wɔ Baebolo mekɛ zo, ɛnee kɛzi bɛyɛ nwomamobɔleɛ ɛ, na bɛfa bɛyɛ duzu?

Luku Edwɛkpa ne ka Gyisɛse mɔɔ bukele Ayezaya nwomamobɔleɛ ne anu, ɔgengale na ɔbubule ye bieko la anwo edwɛkɛ. Pɔɔlo noko hanle nwomamobɔleɛ bie anwo edwɛkɛ wɔ mekɛ mɔɔ ɔzele Temɔte kɛ ɔva ɔrɛlɛ ye la.​—Luku 4:16-20; 2 Temɔte 4:13.

Kɛzi ɛnee bɛyɛ nwomamobɔleɛ ɛ? Bɛfa ninyɛne azinli mɔɔ le kɛ nane nwoma anzɛɛ kɛlata azinli bɛsosɔ zolɛ bɛmaa ɔyɛ kɛlata mɔɔ bɛbubu la. Akee bɛfa bɛbɛka baka bie anwo bɛmaa ɛleka mɔɔ bɛhɛlɛ la kɔ ɔ kunlu. Bɛkɛlɛ bɛmaa ɔgyinlegyinla wɔ zolɛ amuala. Saa nwomamobɔleɛ ne le tendenle a, bɛyɛ mbaka nwiɔ wɔ ɔ ti nee ɔ ti amaa kengavolɛ ne azɔ nu yeava ɔ sa ko yeabuke nu na yeava ko yeabubu kɔkpula kɛ ɔbanwu mɔɔ ɔkpondɛ la.

The Anchor Bible Dictionary ne ka kɛ, “Nwomamobɔleɛ ko tendenle [kɛyɛ futu 33 (m 10)], saa bɛbubu a ɔkola ɔfa edwɛkɛ mɔɔ wɔ buluku ekyii bie anu la amuala.” Kɛ neazo la, mgbondabulɛ kile kɛ Luku Edwɛkpa ne bahyia nwomamobɔleɛ mɔɔ ye tendenle le futu 31 (m 9.5) la. Ɔdwu mekɛ ne bie a, bɛtwɔlɔ nwomamobɔleɛ ne ati zo nee ɔ bo bɛmaa ɔyɛ ekyii na bɛtwi nwo bɛmaa ɔyɛ monlomonlo na akee bɛaha ye ayile.

Wɔ Kilisienema Giliki Ngɛlɛlera ne anu, “Sɛlɛvolɛ mgbanyinli” ne mɔ a le nwane mɔ?

Mekɛ mɔɔ ɛsɔfolilɛ ngyehyɛleɛ ne bɔle ɔ bo wɔ Yizilayɛ la, ɛnee sonla ko ala a sonle kɛ ɛsɔfo kpanyinli kɔkpula kɛ ɔbawu. (Ɛdianlɛ 35:25) Aalɔn a limoale zonlenle kɛ ɛsɔfo kpanyinli a. Amozii, ɛnee saa ɛsɔfo ne wu a ɔ ra nrenyia kpanyinli a bɛfa ye bɛsie ɛkɛ a. (Adendulɛ 29:9) Aalɔn abusua ne anu amra mrenyia dɔɔnwo zonlenle kɛ ɛsɔfoma, noko bɛ nuhua ekyii bie a yɛle ɛsɔfo mgbanyinli a.

Mekɛ mɔɔ ɛnee Yizilayɛma wɔ maanle gyɛne abo la, ɛnee tumivolɛma mɔɔ bɛnle Yizilayɛma la kpa Dwuuma ɛsɔfo mgbanyinli na eza bɛye bɛ ali wɔ mekɛ biala mɔɔ bɛkulo la. Noko ɔbayɛ kɛ ɛnee menli ɛhye mɔ mɔɔ bɛkpa bɛ fofolɛ la vi mbusua mɔɔ bɛlɛ nwolɛ adenle, mɔɔ bɛvi Aalɔn abusua ne anu la anu. Edwɛkɛkpɔkɛ “sɛlɛvolɛ mgbanyinli” ne a le menli titili mɔɔ bɛwɔ ɛsɔfolilɛ abusua ne anu la. Bie a ɛsɔfo kpanyinli ne anu amra bie a le mgbanyima 24 mɔɔ bɛhyɛ bɛ nu wɔ ɛsɔfolilɛ ne anu; mbusua mɔɔ ɛsɔfo mgbanyima mɔɔ lɛ dibilɛ wɔ nu; yɛɛ ɛsɔfo mgbanyinli mɔɔ bɛyele bɛ ali mɔɔ bie a le Anase la.​—1 Edwɛkɛsisilɛ 24:1-19; Mateyu 2:4; Maake 8:31; Gyima ne 4:6.