EDWƐKƐ TITILE | DEƐMƆTI YƐDI NƆHALƐ LA
Asoo Nɔhalɛlilɛ Ɛkpa Nwo?
Ɛnee Hitoshi nea gyima bie mɔɔ wɔ Japan la ezukoa zo. Mekɛ bie mɔɔ ɛnee Hitoshi ɛlɛbu mgbonda ahile ye gyima nu kpanyinli ne la, kpanyinli ne zele ye kɛ ɔwua nu. Hitoshi hanle kɛ saa ɔbɔ adalɛ a ye adwenle babua ye fɔlɛ. Yemɔti ye gyima nu kpanyinli ne nwunlonwunlanle ye kɛ saa yeanyɛ a, ɔbaye ye gyima nu na amgba noko ɔyele ye ali.
Nzinlii, Hitoshi gyima ne mɔɔ vile ɔ sa la maanle ɔlile nyane. Kɛ neazo la, mekɛ bie mɔɔ bɛbizebiza ye edwɛkɛ na bɛava ye gyima nu la, Hitoshi hanle kɛ ɔnrɛhola ɔnrɛbɔ adalɛ wɔ gyima ne anu. Ahenle ne mɔɔ ɛlɛbizebiza ye edwɛkɛ ne la hanle kɛ, “Kɛzi ɛdwenle la le ngakyile!” Hitoshi abusua ne nee ɔ gɔnwo mɔ maanle ye anwosesebɛ kɛ ɔzi pi wɔ kpɔkɛ mɔɔ yebɔ kɛ ɔdi nɔhalɛ la anwo, noko ye adwenle nu yɛle ye kesee. Kɛ neazo la, ɔhanle kɛ, “Membizale me nwo kɛ saa medi nɔhalɛ wɔ me diedi ne ati a ɔle adwenle kpalɛ a.”
Hitoshi anwubielɛ ne kakye yɛ kɛ tɛ awie biala a kulo nɔhalɛlilɛ a. Nɔhalɛ nu, menli bie mɔ bu nɔhalɛlilɛ kɛ nvasoɛ ɛnle zo, titili wɔ gualilɛ nu. Raalɛ bie mɔɔ yɛ gyima wɔ South Africa la ka kɛ, “Me nee menli mɔɔ bɛnli nɔhalɛ la a yɛ gyima a, na wɔannea boɛ a bɛbamaa wɔayɛ bie.”
Adalɛbɔlɛ le debie mɔɔ ɛbu zo ɛnɛ. Ɛvolɛ bie mɔɔ ɛze la anu, abɔlɔba Robert S. Feldman mɔɔ wɔ University of Massachusetts Amherst la hanle kɛ yeanyɛ boɛ fee la, mgbanyinli ɛya ngyɛnu 60 bɔ adalɛ kɛyɛ ko wɔ mitini bulu adwelielilɛ nu. Feldman ka kɛ, “Mɔɔ menwunle ye la yɛ azibɛnwo. Yɛ nye ɛnla kɛ adalɛbɔlɛ bayɛ debie mɔɔ boka ɛbɛlabɔlɛ nwo a.” Asoo ɔnyɛ azibɛnwo kɛ menli dɔɔnwo ɛngulo kɛ bɛbabɔ adalɛ bɛahile bɛ noko menli dɔɔnwo ne ala bɔ adalɛ la ɔ?
Duzu ati a adalɛbɔlɛ, awule nee mɛlɛbɛla dɔɔnwo ɛbu zo ɛnɛ a? Kɛzi adalɛbɔlɛ sɛkye maanle ɛ? Na mɔɔ hyia kpalɛ la, kɛzi yɛbahola yɛahoati nyɛleɛ mɔɔ ɛngile nɔhalɛlilɛ la ɛ?